Exxon Mobil Ресейге оралу жөнінде жасырын келіссөздер жүргізді — WSJ
Exxon Mobil ресейлік мемлекеттік мұнай компаниясы «Роснефтьпен» «Сахалин-1» жобасын қайта бастау мүмкіндігі жөнінде құпия келіссөздер жүргізді. Бұл тек екі ел үкіметтері Украинаға қатысты бейбіт процес аясында «жасыл жарық» берген жағдайда жүзеге асады, деп хабарлады The Wall Street Journal дереккөздерге сілтеме жасап.
Егжей-тегжейі
Басылым мәліметінше, екі энергетикалық компанияның өкілдері Катардың астанасы Дохада Қиыр Шығыс шельфіндегі бірлескен өндіруді қайта жандандыру туралы ұсынысты талқылаған. Бұл әңгімеге Exxon Mobil-дің аға вице-президенті Нил Чапман қатысқан. Ал компанияның басшысы Даррен Вудс кейінгі апталарда Дональд Трамптың Ақ үйге оралуы жағдайында Ресейге қайта кіру мүмкіндігін сөз еткен.
WSJ сұхбаттастарының айтуынша, Exxon мен басқа да америкалық компанияларда АҚШ Қаржы министрлігінен лицензия бар. Ол оларға Ресейдегі қатып қалған активтер бойынша келіссөз жүргізуге мүмкіндік береді. Exxon мен «Роснефтьтің» диалогы шамамен қаңтарда, Трамптың инаугурациясы кезінде жанданды. АҚШ пен Ресейдің ресми өкілдері энергетикалық келісімдерді, оның ішінде Exxon-ның оралуын да талқылағанын Reuters те растады.
Exxon 2022 жылы Украинадағы қақтығыс басталғаннан кейін Ресейден кеткен. Компания Мәскеуді өз активтерін экспроприациялады деп айыптаған болатын.
Нарық реакциясы
WSJ мақаласы шыққаннан кейінгі постмаркеттік саудада Exxon Mobil акциялары 0,5%-ға дейін арзандады. Кейін баға төмендеуді ішінара өтегенімен, құбылмалылық сақталды. Мәтін жарияланған сәтте котировкалар аздап плюсте тұрды.
