Ferrari және тағы 4 компания: Еуропа автосаласындағы 2026 жылға ең үздік акциялар
Bank of America 2026 жылы Еуропаның кейбір автокөлік өндірушілерінің акциялары өсуі мүмкін деп есептейді. Себебі алдағы уақытта экологияға қатысты талаптар, әсіресе CO₂ шығарындылары бойынша ережелер, жұмсаруы ықтимал. CNBC-дің жазуынша BofA-ның автосала бойынша зерттеу бөлімінің басшысы Хорст Шнайдер бұл сектордағы акциялар әлі де арзан бағаланып отыр және «қуып жету» өсіміне әлеуеті бар дейді. Оның болжамынша 2026 жылы сала үшін бірінші тоқсан әдеттегідей күшті басталып, кейін түзету болады да, жыл соңына қарай қайта өсім байқалуы мүмкін.
Ferrari — басты фаворит
BofA 2026 жылға Еуропа автосаласындағы негізгі инвестициялық идея ретінде Ferrari-ді атап отыр. Соңғы уақытта люкс спорткар өндірушінің акциялары нарықтан қалып қойғанымен, қазіргі баға тәуекел мен табыстың арақатынасы жағынан өте тартымды. Аналитиктің айтуынша, Ferrari алғашқы электромобилін 2026 жылдың қазанында шығаруға дайындалып, әдейі сақ қадам жасап отыр. 2027–2028 жылдары компанияның бесжылдық жоспары қайта қаралып, болжамдар жоғарылауы мүмкін. Сонымен қатар, Еуропада экологиялық талаптардың жұмсаруы Ferrari-ге іштен жанатын қозғалтқышы бар модельдерді көбірек шығаруға мүмкіндік беріп, табыстылықты сақтауға көмектеседі.
Renault және Volkswagen
BofA атап өткендей, автосектордағы көптеген компаниялардың акциялары әлі де арзан. Volkswagen мен Renault акциялары нарықта жылдық пайдасының небәрі 4–5 есесімен бағаланып отыр — бұл саладағы ең төмен көрсеткіштердің бірі. Мұның себебі — инвесторлар бұл компаниялар толықтай электромобильдерге көше алмай, іштен жанатын қозғалтқыштарға тыйым салынған жағдайда қиындыққа тап болады деп қауіптенеді. Алайда CO₂ нормалары жұмсарса, бұл сценарий өзгереді. Толық күйреу емес, тек ішінара қысқару күтілсе, акция бағалау коэффициенттері де өсуі мүмкін.
Continental және Aumovio
BofA тағы бір қызықты нұсқа ретінде немістің шиналар өндірушісі Continental-ды атайды. Егер компания өзіне тиесілі ContiTech автокомпоненттер бөлімшесін шамамен €5 млрд-қа сатса, ірі дивиденд төлеуі мүмкін.
Сонымен қатар, аналитик Aumovio атты шағын автокомпонент жеткізушіге назар аударды. Компания 2025 жылдың қыркүйегінде Франкфуртта IPO өткізгеннен кейін, оның акциялары бәсекелестерінен 40–50% төмен бағамен саудаланып жатыр. Бұл инвесторлар үшін тартымды кіру нүктесі болуы мүмкін.
Уолл-стриттің пікірі қандай?
FactSet деректеріне сәйкес Ferrari, Volkswagen, Renault және Continental акциялары бойынша Уолл-стриттің ортақ пікірі — «нарықтан жоғары» (Overweight). Бұл тізімде Ferrari тағы да алда: компания акциялары бойынша 18 сатып алу ұсынысы бар, ал «ұстау» кеңесін бергендер — 7 ғана. Volkswagen акциялары сектордан жылдамырақ өседі деп 25 сарапшының 15-і сенеді, Renault бойынша — 22 сарапшының 13-і, Continental бойынша — 15 сарапшының 10-ы. Нарықтағы күмән өте аз: әр компанияда акцияны сатуға кеңес берген небәрі бір ғана аналитик бар.
