Freedom қысқа мерзімде 20%-дан астам өсім әлеуеті бар акцияны атады
Freedom Broker мәліметінше, DXC Technology шағын IT-компаниясы акциялары алдағы екі айда 23%-дан астам өсуі мүмкін. Кейінгі жылдары бұл компанияның қағаздары қысымға ұшырап, қазіргі кезде бағаланбай отыр. Бұған қоса, компания қарыз жүктемесін азайтып келеді. Бұл өз кезегінде акционерлерге төленетін дивидендтерді ұлғайтуға мүмкіндік береді, дейді сарапшылар.
Егжей-тегжейі
DXC Technology компаниясы өз шешімдері арқылы бизнеске аса маңызды жүйелер мен операцияларды басқаруға көмектеседі. Freedom Broker инвестициялық жазбасында айтылғандай, осы компания акцияларының мақсатты бағасы екі ай ішінде 18 доллар болуы мүмкін. Бұл шілденің 24-індегі жабылу бағасынан 23%-дан жоғары.
Freedom DXC акцияларын сатып алуға кеңес береді. Бірақ портфельдің бұл қағаздардағы үлесі 2%-дан аспауы тиіс.
25 шілде, жұма күні сауда ашылғанда, DXC акциялары 0,9%-ға арзандады.
Freedom өз ұстанымын қалай түсіндіреді?
Freedom хабарлауынша, DXC Technology компаниясы 2026 қаржы жылында (сәуірден бастап) 150 миллион долларды қайта сатып алу бағдарламасына жұмсауды жоспарлап отыр. Бұл қаржылық жағдайының жақсаруы арқасында мүмкін болып отыр.
Өткен жылы компания таза қарызды 785 миллион долларға немесе 27,4%-ға азайтты. Соның нәтижесінде пайыздық шығындар 11%-ға төмендеп, 265 миллион долларға жетті.
Сарапшылардың пайымдауынша, 2025 жылдың қаңтарында DXC Technology 700 миллион еуро облигацияны өтеуі тиіс. Осыдан кейін компания қарызды азайтудан гөрі, акционерлерге қайта сатып алу арқылы төлемдерді арттыруға көбірек көңіл бөледі.
Freedom DXC акцияларын сатып алуды ұсынуының екінші себебі — олардың негізгі қаржылық көрсеткіштер бойынша төмен бағалануы. 2025 жылы компания капитализациясы шамамен 27%-ға төмендеді.
Yahoo Finance дерегінше, осы кезеңде үш бірдей инвестициялық компания DXC қағаздарының мақсатты бағаларын төмендеткен. Қазір орташа мақсатты баға — 16,5 доллар. Бұл қазіргі бағаға қарағанда 13% өсім әлеуетін білдіреді.
MarketWatch порталының мәліметінше, DXC Technology акциялары бойынша ең жиі ұсынылатын кеңес — «ұстай тұру». Мұндай көзқарасты Уолл-стриттің тоғыз сарапшысы ұстанады. Тағы үш сарапшы бұл акцияларды сатуға кеңес береді. Ал сатып алуға шақырған ешкім жоқ.
