«GENIUS Act бәрін өзгертті»: Visa крипто арқылы трансшекаралық төлемді іске қосады
Visa 30 қыркүйекте бизнеске арналған халықаралық төлемдерді қаржыландырудың жаңа тәсілін сынай бастайтынын мәлімдеді. Енді жергілікті шоттарға алдын ала ақша салудың орнына стейблкоиндар қолданылады, деп хабарлайды Reuters. Агенттіктің пікірінше, бұл қадам АҚШ-та қабылданған GENIUS (Guiding and Establishing National Innovation for U.S. Stablecoins) заңының арқасында ірі компаниялар арасында активтерге байланған криптовалюталарды — токендерді кеңінен мойындаудың артып келе жатқанын көрсетеді.
Егжей-тегжейлі
«GENIUS Act бәрін өзгертті. Ол бүкіл процеске айқын заңдылық берді. Бұл реттеушілік түсініктілік пайда болғанға дейін ірі қаржы институттары күту позициясында болды», — деді Reuters агенттігіне Visa-ның коммерциялық және төлем өнімдері бөлімшесінің басшысы Марк Нельсен. Оның айтуынша, стейблкоиндарға қолдау енгізілген соң клиенттер әлемнің кез келген нүктесінде шоттарын нақты уақыт режимінде толықтыра алады, осылайша қазіргі төлем жүйелеріне тән жұмыс істемейтін уақыттағы кідірістерден құтылады, деп жазады Bloomberg.
Visa Direct платформасы — әлемнің 195 елінде 11 млрд Visa картасына, банктік шоттарға және цифрлық әмияндарға нақты уақыт режимінде ақша жіберуге мүмкіндік беретін жүйе — пилоттық жоба аясында Circle Internet Group-тың доллармен (USC) және еуромен (EURC) қамтамасыз етілген стейблкоиндарын қолданбақ. Жоба банктерге, ақша аударумен айналысатын компанияларға және басқа да қаржы ұйымдарына дәстүрлі валюталардың орнына стейблкоиндармен алдын ала шоттарды толықтыруға мүмкіндік береді. Мұндай тәсіл трансшекаралық есептеулерді жылдамдатып, ликвидтілікті босатуы мүмкін, өйткені қазіргі кезде компаниялар жергілікті төлемдер жасау үшін түрлі елдердің валютасында қаражатты алдын ала ұстап отыруға мәжбүр.
Контекст
Стейблкоин — тұрақты құнын сақтауға арналған криптовалюта. Әдетте, стейблкоиндар доллар немесе мемлекеттік облигациялар сияқты дәстүрлі активтермен қамтамасыз етіледі. Олар халықаралық төлемдерді жылдамдату үшін қолданылғанда, төлем компаниялары мен банктер өз позициялары үшін алаңдайды. Алайда, Visa-ның пилоттық бағдарламасы дәстүрлі ойыншылардың стейблкоиндарды өз инфрақұрылымын күшейтетін құралға айналдыра алатынын көрсетеді, деп жазады Reuters.
