Goldman Sachs: Еуропалық шағын компаниялардың акциялары әлі де арзан, өсуге дайын
2025 жылы Еуропадағы шағын капиталды компаниялардың акциялары жалпы нарықтан жылдам өсіп келеді және бұл серпін жалғасуы мүмкін. Goldman Sachs осындай болжам жасап отыр. Бұл көрсеткіштер АҚШ-тағы шағын компаниялардан ерекшеленеді. Олар ірі корпорациялармен салыстырғанда артта қалып жатыр.
Егжей-тегжейлі
Goldman Sachs-тың аға стратегi Шэрон Белл CNBC арнасына берген сұхбатында еуропалық шағын компаниялардың акциялары биыл нарықтан тез өсіп жатқанын және бұл үрдіс жалғасуы мүмкін екенін айтты.
Жыл басынан бері MSCI Europe Small Cap Index шамамен 11%-ға өсті. Ал Германиядағы 70 шағын компанияны қамтитын индекс 32%-дан астамға көтерілді. Салыстырып қарасақ, бүкіл Еуропа бойынша Stoxx 600 индексі осы уақыт ішінде 7,9%-ға ғана өскен.
Беллдің айтуынша, Еуропадағы жағдай АҚШ-пен салыстырғанда мүлде өзгеше. «АҚШ-та ірі капитализациялы компаниялар жақсы нәтижелер көрсетті», – дейді ол. Америка биржаларында саудаланатын шағын компанияларды қамтитын Russell 2000 индексі биыл кең нарықты білдіретін S&P 500 индексінен айтарлықтай қалып қойды.
Goldman Sachs сарапшыларының пікірінше Еуропадағы шағын бизнес акцияларының жоғары динамикасы ЕО экономикасының қалпына келуіне деген үмітпен және доллардың әлсіреуімен байланысты. Жыл басынан бері еуроның доллармен салыстырғандағы бағамы 12,5%-ға жуық өсті. Бұл – ішкі нарыққа бағытталған шағын компаниялар үшін айрықша маңызды фактор.
Сонымен қатар, Беллдің айтуынша қазіргі кезде шағын компаниялардың акциялары бағасы жағынан әлі де арзан саналады. Ал ірі компаниялардың акциялары тарихи максимумға жетіп, бағалауы тым жоғары. Бұл жағдай шағын компанияларды инвестиция үшін тартымды етеді. Бұған қоса, бұл тренд бірігу және қосып алу (M&A) мәмілелерінің жандануына әкеліп, мұндай күтілімдер акциялар бағасының өсуіне себеп болуы мүмкін.
Бетбұрыс сәті
CNBC келтірген Bank of America-ның шілдедегі сауалнамасы бойынша еуропалық қорларды басқаратын менеджерлердің 44%-ы алдағы 12 айда шағын компаниялар ірілерінен озатын болады деп күтеді. Бір ай бұрын бұл көрсеткіш небәрі 7% болған. Басылым мұны нарық үшін маңызды бетбұрыс деп атады.
