Goldman: Tesla роботаксиі алдында екі артықшылық бар, бірақ белгісіз жайттар да көп
Tesla-ның роботакси қызметін іске қосу қарсаңында Goldman Sachs сарапшысы компанияның автономды жүргізу нарығындағы бәсекеде алда болуына көмектесуі мүмкін екі жағымды факторға назар аударды. Алайда ол Tesla бас директоры Илон Масктың бұл бизнесті кеңейтуге қатысты тым оптимистік болжамдарына күмән келтірді. Инвесторлар алдағы іске қосуды жіті бақылап, одан көп үміт күтіп отыр. Дегенмен Barron’s атап өткен бірнеше маңызды жайт бар, оларды елемеуге болмайды. Соңғы уақытта қиындықтарға тап болған Tesla акцияларына қолдау көрсетуі мүмкін трейдер нені ескеруі керек?
Үмітке негіз болатын жайттар
Остин қаласында маусым айында іске қосылуы күтіліп отырған Tesla роботакси жобасының алдында Goldman Sachs компаниясы автономды жүргізу нарығындағы бәсекеде Tesla-ның екі басты артықшылығын атады. Біріншісі — компания бизнесінің ауқымы мен бірегей инженерлік шешімдері: Tesla өз чиптерін пайдаланады әрі лидар мен радарға жүгінбейді, бұл бәсекелестермен салыстырғанда өндірісті арзандатуға мүмкіндік береді. Екіншісі — жасанды интеллектіні үйретудің фирмалық «тұтас» тәсілі: Tesla алдын ала жазылған алгоритмдерге емес, жаңа жағдайларға бейімделе алатын, ой қорытындылайтын бағдарламалық жасақтама әзірлейді. Бұл технологияны кең көлемде қолдануды жеңілдетеді.
Нақты емес тұстары
Goldman Sachs сарапшысы Tesla-ның автономды көлік жобасына қатысты оптимизммен қатар, кейбір күмәнін де білдірді. Мысалы, компания Остиннен тыс аймақтарға 2025 жылдың соңына дейін шығуды көздейді, ал 2026 жылға қарай жүздеген мың роботакси жолға шығады деп болжайды. Масктың айтуынша, бұл қызметті кеңейткен кезде бір мильге шаққандағы операциялық шығындар шамамен $0,40 болады. Алайда, Goldman Sachs-тың есебінше, қазір роботаксидің амортизация, сақтандыру және қашықтан басқару шығындары $1,34 құрайды, ал бұл шығындарды $0,40 деңгейіне дейін түсіру тек 2040 жылы болуы мүмкін. Сондай-ақ банк 2027 жылға дейін Tesla шамамен 2500 ғана роботакси іске қоса алады деп есептейді. Айта кетсек, маусым айының басында Goldman Sachs Tesla акциялары бойынша мақсатты бағасын $295-тен $285-ке дейін төмендетіп, бейтарап рейтингін растады (яғни, «ұстау» ұсынысы).
Goldman-ның өзі ғана емес, Tesla мақсаттарын тым жоғары деп санайтындар. Дүйсенбі күні Baird сарапшысы Бен Калло соңғы үш жылда алғаш рет Tesla акцияларының рейтингін Outperform («нарықтан жоғары», яғни сатып алуға кеңес) деңгейінен бейтарапқа дейін төмендетті. Сонымен бірге ол акциялардың мақсатты бағасын бұрынғыдай $320 деңгейінде қалдырды — бұл 11 маусымдағы жабылу бағасынан шамамен 2% жоғары. «Масктың роботакси жобасын іске қосу қарқынына қатысты мәлімдемелері тым оптимистік, және бұл үміттер акция бағасына әлдеқашан кіріккен», — деп жазды сарапшы. Baird компаниясын сондай-ақ Трамптың бюджет жобасында көзделген электромобильдерге берілетін салықтық жеңілдіктерді алып тастау мәселесі алаңдатады. Бұл құжат Маск пен Трамп арасындағы келіспеушіліктің бір себебі болды. Сонымен қатар сарапшы электромобиль нарығындағы бәсекенің күшеюі мен Tesla-ның нарықтық құнының жоғары екенін атап өтті.
Barron’s басылымы да инвесторлар назар аударуы тиіс, бірақ әлі жауабы жоқ бірнеше маңызды сұрақты бөліп көрсетті. Біріншісі — іске қосу кезінде нақты қанша көлік қолданылатыны. Екіншісі — жүйенің қауіпсіздігін кім және қалай бақылайды. Үшіншісі — Tesla-ның такси шақыруға арналған қосымшасы қалай көрінеді. Төртіншісі — бұл қызмет бәріне бірдей қолжетімді бола ма, әлде тек шақырту алғандарға ма? Маск бұған дейін жоба ең аз дегенде 10 көлікпен басталуы мүмкін екенін, ал қауіпсіздікті қамтамасыз ету үшін көліктерді қашықтан операторлар бақылап отыратынын айтқан. Сондай-ақ алғашқы қолданушылар арнайы шақыру арқылы таңдалуы мүмкін деген болжамдар да инвесторлар арасында айтылып жүр, деп атап өтеді Barron’s.
Контекст
Инвесторлар Tesla-ның роботакси қызметінің табысты болуына үлкен үміт артып отыр: олар бұл жобаның компания үшін жаңа өсім драйверіне айналады деп күтеді, деп жазады Investopedia. Маск соңғы бір жылдан астам уақыт бойы Tesla-ның негізгі бизнесі электромобиль емес, жасанды интеллект пен робототехника екенін айтып келеді. 2023 жылы компания өз суперкомпьютері — Dojo өндірісін бастаған еді, ал 2024 жылы қолмен басқарылатын Tesla моделін кейінге қалдырып, басты басымдықты роботакси жобасына берді.
Соңғы уақытта компания котировкалары қысымға ұшырады. Tesla сатылымдарының төмендеуі, Масктың АҚШ саясатына араласуы, бәсекенің күшеюі, салықтық жеңілдіктердің жойылуы қаупі және сауда тарифтері акциялар бағасының динамикасына кері әсер етті. Жыл басынан Tesla қағаздары шамамен 20% арзандаса, ал АҚШ-тың кең ауқымды нарықтық индексі S&P 500 керісінше 2,5% өскен. Соңғы бір айда бірден үш сарапшы Tesla акцияларын сатып алуға берген кеңесін қайтарып алды, ал бейтарап рейтингтердің саны керісінше үшеуге көбейді, деп көрсетеді MarketWatch. Қазір Tesla қағаздары бойынша 26 сарапшы сатып алуға (Buy және Overweight), бейтарап ұстануға кеңес — 18 сарапшы, ал 11 сарапшы олардан құтылуға ұсынады.
