Кэти Вудтың қорлары Tesla-дaғы үлесін қысқартты. Ол роботакси болашағына күмәнді ме?
Өткен аптада Кэти Вуд Tesla акцияларындағы үлесін үш рет қысқартты. Оның басқаруындағы биржалық қорлар көлік компаниясы акцияларын сата бастады — бұл Tesla-ның көптен күткен роботакси қызметін маусымда іске қосуға дайындалып жатқанына қарамастан орын алып отыр. Вуд бұған дейін автономды көлік жүргізудің болашағына және Tesla-ның осы жобасына бірнеше рет жоғары баға берген болатын. Оның бағалауынша бұл бастаманың арқасында компания акциялары 2029 жылға дейін 660%-ға өсуі мүмкін.
Егжей-тегжейлі
Кэти Вудтың негізгі ARK Innovation ETF қоры 27 мамыр, сейсенбі күні Tesla-ның 27,4 мың акциясынан құтылды, сәрсенбі күні – 15,8 мыңын, ал жұма күні тағы 6,5 мыңын сатты, деп хабарлайды Barron’s сауда туралы есептерге сілтеме жасап. Барлығы шамамен 50 мың акция сатылған, олардың жалпы құны шамамен 17 млн доллар деп бағаланады.
ARK Barron’s-тің түсініктеме беру туралы сұранысына жауап бермеді.
Акциялардың жай-күйі
3 маусымдағы кеңейтілген сауда сессиясының басында Tesla акциялары 0,6%-ға төмендеді, бірақ кейін бұл төмендеуді қайта қалпына келтіріп, сәл өсті. Алдыңғы күнгі сессия қорытындысы бойынша компания құны 1,3%-ға азайды. Бұған Tesla электромобильдерінің Еуропаның бірнеше елінде (Норвегиядан басқа) сатылымының қысқаруы себеп болды. Сатылымдар қатарынан бес ай бойы төмендеп келеді, ал жалпы нарық ауқымы ұлғайып жатыр. Жыл басынан бері Tesla акциялары шамамен 15%-ға арзандаған.
Дегенмен, мамыр айында Tesla акциялары 23%-ға өсті. Бұл өсімге Илон Масктың Ақ үйдегі қызметін аяқтап, бизнеске қайта толық назар аударатыны туралы жаңалық түрткі болды, деп жазады Barron's. Сонымен қатар, бағамдардың өсуіне маусымда іске қосылуы тиіс CyberCab автономды такси қызметі туралы оптимизм де әсер еткен болуы мүмкін, деп жазады Zacks. Компания атап өткендей, «қызығушылық бұл акциялар бағасына әлдеқашан қосылған», ал «Tesla өз уәдесін орындай ала ма жоқ па — бұл әлі белгісіз».
Уолл-стрит сарапшыларының басым бөлігі компанияға оң көзқараста: 28 сарапшы сатып алуға кеңес береді, 15-і ұстауға, ал 12-сі сатуға кеңес береді, деп көрсетеді MarketWatch. Орташа мақсатты баға $308,7 шамасында — бұл 2 маусымдағы жабылу бағасынан 9,7% жоғары.
Инвестор үшін маңыздысы
Роботакси қызметінің іске қосылуы нарықтағы негізгі өсім драйверлерінің бірі ретінде қарастырылып келді. Сәуір айында инвесторлармен сөйлесу барысында Илон Маск маусым айында Техаста толық автономды тасымал қызметін іске қосуды жоспарлап отырғанын айтты, бірақ нақты күнді атамады. Өткен аптада ол X әлеуметтік желісінде Tesla Model Y көліктерінің автономды режимде сынақтан өтіп жатқанын және әзірге бірде-бір оқыс оқиға тіркелмегенін жазды. Bloomberg дереккөздерге сілтеме жасай отырып, бұл қызметтің іске қосылуы 12 маусымға жоспарланғанын хабарлады, бірақ компания бұл ақпаратты растамады да, жоққа да шығармады.
Кэти Вуд — Tesla акцияларының белсенді қолдаушыларының бірі және компанияның автономды көлік жүргізу нарығында жетекші орын алатынына сенімді. ARK қорының бағалауынша Tesla акциялары 2029 жылға дейін $2600-ге дейін өсуі мүмкін, яғни 660%-ға артады. Бұл өсімнің шамамен 90%-ы дәл осы роботакси жобасының арқасында болады, деп жазады Benzinga.
Жуырда автокомпания акцияларын сатқанымен, Tesla Кэти Вудтың қорындағы ең ірі позиция болып қалып отыр — жалпы қор портфелінің шамамен 13%-ын құрайды. Ағымдағы нарықтық бағамен есептегенде бұл шамамен $715 млн, деп жазады Investor’s Business Daily.
Сәуір айында Вуд сатылым деңгейінің төмендігі мен акция бағасының құлдырауына қарамастан компания акцияларына қатысты оң көзқарасын сақтап отырғанын айтқан болатын. Оның пікірінше роботакси қызметі тұтынушыларға автокөлік сатып алуға кететін ірі шығындардан арылуға көмектеседі: «Адамдар болашақта да бүгінгі Uber мен Lyft сияқты қажет кезде ғана жолақысын төлеп отырады, бірақ бұл әлдеқайда арзан болады және жүргізуші үшін қосымша ақы төлеудің қажеті болмайды», — деді ол.
Tesla-ға сенетін тағы бір белгілі оптимист — Wedbush компаниясының сарапшысы Дэн Айвз. Өткен аптада ол Tesla акциялары бойынша өз мақсатты бағасын Уолл-стриттегі ең жоғары деңгейге дейін көтеріп, $500 деп белгілеген. Бұл шамамен 46% өсу әлеуетін білдіреді. Айвз де роботакси қызметінің іске қосылуы, сондай-ақ Tesla-ның жасанды интеллект пен автономды көліктер нарығындағы мүмкіндіктері компания құнын айтарлықтай арттыра алады деп есептейді.
Масктың Ақ үйден ресми түрде кеткені туралы жаңалықты Айвз «инвесторлар үшін жағымды жаңалық» деп бағалады. «Трамп Маск кеңесші болып қалады дегенімен, біз оның саясаттағы күндері аяқталғанын, бұл эксперимент Tesla брендіне бедел жағынан теріс әсер еткенін айқын көрсетіп берді», — деді сарапшы.
Кэти Вуд тағы не сатты?
Benzinga басылымының жазуынша Кэти Вудтың қорлары жасанды интеллектке арналған бағдарламалық қамтамасыз етуді әзірлеуші Palantir Technologies компаниясындағы үлесін де қысқартты. ARK 17,5 мың акцияны сатты, 2 маусымдағы деректер бойынша олардың құны шамамен 2,3 миллион долларға бағаланған. Басылым бұл шешімнің құпиялылыққа қатысты алаңдаушылық пен жеке деректердің теріс пайдаланылуы мүмкін деген күдікке байланысты қабылданғанын атап өтеді. Жұма күні The New York Times газеті Трамп әкімшілігі Palantir компаниясымен АҚШ азаматтары туралы түрлі федералды агенттіктерден ақпарат жинау үшін жасырын түрде әріптестік орнатқанын жазды.
