Gucci иесінің акциялары соңғы 14 айдағы ең жоғары деңгейге жетті. Нарық нені күтеді?
Gucci және басқа люкс брендтерге иелік ететін француздық Kering холдингінің акциялары 14 айдағы ең жоғары межеге көтерілді. Бұған жаңа бас директор Лука де Меоға байланысты оптимизм түрткі болды. Инвесторлар антикризистік тәжірибесі бар менеджер компания шығындарын қысқартып, Gucci сатылымын қайта жандандырады деп үміттеніп отыр. Кейбір сарапшылар Kering қиындықтарға қарамастан 2026 қаржы жылынан бастап қайта қалпына келе бастайды деп болжайды.
Егжей-тегжейі
29 қыркүйекте Париж биржасында Kering акциялары 4,7%-ға өсіп, €287,9-ға жетті. Бұл 2024 жылдың шілдесінен бергі ең жоғары жабылу бағасы. Соңғы үш айда акциялар 60%-дан астамға қымбаттап, жыл басынан бері 21% өсім көрсетті. Дегенмен, 2021 жылғы шарықтау кезеңімен салыстырғанда компанияның нарықтық құны әлі де 60%-дан астам төмен.
Reuters атап өткендей, соңғы апталардағы оптимизм 15 қыркүйекте қызметке кіріскен жаңа басшыдан күтілетін нәтижелермен байланысты. Renault компаниясын басқарған, антикризистік менеджер ретінде танымал Лука де Мео Kering сатылымын жандандырып, шығындарды азайтады деген үміт бар.
Сарапшылардың пікірі
UBS сарапшысы Зузанна Пуш дүйсенбіде Kering акцияларына нейтралды рейтингті сақтап, мақсатты бағасын €215-тен €251-ге көтерді. Бұл көрсеткіш соңғы жабылудан 13% төмен болса да, сарапшы Gucci-де қалпына келудің алғашқы белгілері байқала бастағанын айтты. Оның сөзінше, биылғы бірінші жартыжылдық нәтижелері Gucci-де тұрақтанудың басталғанын және шығындарды бақылаудың күшейгенін көрсетті.
«Kering-тің инвестициялық әлеуеті өзгеріп жатыр. Кадрлық ауыс-түйістер компанияға соңғы жылдардағы құлдыраудан кейін қайта тұрақтануға мүмкіндік береді. Алдағы нәтижелер сату қарқынының баяу төмендеуін көрсетіп, компанияны бәсекелестерінен озық шығара алады», — деді Пуш.
AlphaValue зерттеу компаниясы да бағасын жақсартты. 17 қыркүйекте ол Kering қағаздарына берілген рейтингті Sell-ден Reduce деңгейіне көтеріп, мақсатты бағаны €279 деп қалдырды. Бұл соңғы жабылудан 3% төмен болғанымен, сарапшы жаңа басшының алғашқы қадамдарын оң бағалады: ол Gucci басшылығында өзгерістер жасап, Valentino Eyewear бизнесін Kering Eyewear құрамына қосты. Бұл шаралар компанияның 2026 жылдан бастап қайта көтерілу ықтималдығын арттырады. Сарапшы Kering-тің ұзақ мерзімді табыс өсімі бойынша болжамын 3%-дан 4,5%-ға көтерді, бірақ нарықтың күрделі күйінде қала беретінін атап өтті.
FactSet деректеріне сүйенсек, Kering қағаздары бойынша сатып алу жөніндегі ұсыныстар қазір жетіге жетті — бұл бір ай бұрынғыдан үш есе көп. Алайда 25 сарапшының жартысы Hold рейтингін сақтап отыр, ал алтауы сатуға кеңес береді. Орташа мақсатты баға — €224,2, бұл 29 қыркүйектегі жабылу деңгейінен 22%-ға төмен.
Контекст
Жаңа басшы Лука де Мео компанияны қайта өсіру міндетін алды. Kering АҚШ тарифтері мен Қытайдағы сұраныстың төмендеуінен қысым көріп отыр. Екінші тоқсанда компанияның сатылымы өткен жылмен салыстырғанда 15%-ға азайды, ал флагмандық Gucci кірісі 25%-ға құлдырады. Бұдан бөлек, холдингтің қарыз жүктемесі де үлкен — шамамен €9,5 млрд.
