HSBC Coreweave акцияларына ең төменгі болжам берді. Неліктен сатуды ұсынды?
Британдық HSBC банкі жасанды интеллектке арналған бұлтты қызмет жеткізушісі Coreweave компаниясына талдауын бастап, акцияларына Уолл-стриттегі ең пессимистік болжамын жариялады. Банк компания акциялары анағұрлым артық бағаланған деп, сатуды ұсынды.
Егжей-тегжейлі
HSBC сарапшысы Абхишек Шукла 17 шілдеде Coreweave акцияларына «азайту» (reduce) рейтингін берді — бұл HSBC жүйесінде «сату» дегенмен бірдей, дейді Barron's. 12 айға арналған мақсатты баға $32 деңгейінде белгіленді, бұл 17 шілдедегі жабылу бағасымен салыстырғанда акциялардың 77% төмендеуін білдіреді.
HSBC неге Coreweave акцияларын сатуға кеңес берді?
Сарапшы компания табысының жоғары шоғырлануына назар аударды: 2025 жылдың бірінші тоқсанында Coreweave табысының 72%-ы Microsoft-қа тиесілі болған. Microsoft пен OpenAI бірге компанияның орындалмаған тапсырыстарының басым бөлігін құрайды. Алайда негізгі клиенттер Microsoft, OpenAI және Nvidia Coreweave-тің өз бағдарламалық сервистерін қолданбайды, тек өз жобаларын іске қосу үшін жабдықты жалға алады. HSBC пікірінше, бұл клиенттердің тәуелділігін түсіреді және компания қызметтерінің құнын азайтады.
«Біз Coreweave-тің бәсекелік позициялары әлсіз деп есептейміз, және оның бәсекелік артықшылығы көбіне уақытша сипатқа ие», — деп атап өтті Шукла.
Наурыз айының соңындағы IPO-дан бері Coreweave акциялары 240%-дан астамға шарықтады, алайда Шукла олардың ағымдағы құны негізсіз жоғары деп есептейді. «Біз Coreweave акциялары анағұрлым артық бағаланған деп санаймыз», — деп жазады сарапшы.
Coreweave-тің жасанды интеллектке арналған есептеулерге мамандануы оның басты артықшылықтарының бірі болса да, бұл компанияның ахиллес өкшесіне айналуы мүмкін, дейді Шукла. HSBC мәліметінше, әмбебап бұлтты платформаларды ұсынатын компаниялар қызметтердің кең ауқымын қамти алады және тек ЖИ-бағыттағы провайдерлер секілді қатты бәсекелестікке тап болмайды.
Сарапшы өсімге қосымша кедергі ретінде активтердің төмен айналымдылығын және графикалық процессорларды әр 6–7 жыл сайын ауыстыруға кететін жоғары капиталды шығындарды атап өтеді. Бұл шығындар 2030 жылдан кейінгі табысты ағымдағы деңгейде ұстап тұру үшін қажет болады. Дәл осы аса жоғары капиталды талаптар HSBC-дің Coreweave-тің еркін ақша ағынына (free cash flow) төмен бағалау беруіне себеп болған.
HSBC сарапшылары ескерткендей, клиенттік база кеңейген сайын Coreweave-тің маркетинг пен зерттеуге жұмсайтын шығындары да сөзсіз артады — жаңа сегменттерді тарту мен қолдау үшін қосымша инвестициялар қажет болады.
HSBC сондай-ақ сарапшылар компания нәтижелеріне жалдау және пайыздық шығындардың ықпалын бағаламағанын атап өтеді. Деректер орталықтарын жалға алу шығындары 2025 жылдың бірінші тоқсанында табыстың 16%-ын құрады және сұраныс өсіп жатқан жағдайда бұл көрсеткіш артуы мүмкін. Сонымен қатар, сол кезеңде Coreweave қарыздары бойынша орташа пайыздық мөлшерлеме 12,4% болған. Шукла болашақта АҚШ Федералдық резерв жүйесі мөлшерлемелерді төмендетсе, компания үшін қарыз алу құны да азаюы мүмкін екенін айтады. Алайда несиелік рейтингі төмен жаңа клиенттерді тарту қаржыландыру шығындарын қайта арттыруы немесе қосымша акциялар шығаруды қажет етуі мүмкін. HSBC болжамынша, 2030 жылдың соңына дейін Coreweave-ке шамамен $42 млрд қарыз қаржыландыру керек болады. Бұл ретт, қарыздың орташа пайыздық мөлшерлемесі 9,6% құрайды, ол Уолл-стриттің 7,8%-дық консенсусынан жоғары, деп хабарлайды Barron's.
Уолл-стрит тағы не ойлады?
LSEG мәліметінше, 17 шілдедегі жағдай бойынша Coreweave акцияларына консенсус таргет $91-ды құрайды — бұл ағымдағы бағадан 31% төмен. CNBC деректеріне сүйенсек, Уолл-стриттегі рейтинг бойынша 23-тің 17-сі — «ұстау» (hold) ұсынысын білдіреді.
