Инвестиция ағыны алтынға деген сұранысты рекордтық деңгейге жеткізді. Не күтеміз?
Алтынға деген сұраныс екінші тоқсанда жаңа рекорд орнатты. Бұл кезде бағалы металл бағасы бір троя унциясы үшін 3,5 мың долларға жетіп, осы деңгейге жақын тұрды. Бұл туралы Дүниежүзілік алтын кеңесі (World Gold Council, WGC) хабарлады. Ұйымның мәліметінше, негізгі рөлді алтынмен қамтамасыз етілген ETF қорларына қаржының белсенді ағылуы атқарған. Миллиардер-инвесторлар Рэй Далио мен Томас Каплан активтердің бір бөлігін алтын түрінде ұстауға кеңес береді. Далио — дәстүрлі валюталардың құнсыздануынан қорғану үшін, ал Каплан — алтынның бір унциясы 10 мың доллардан асады деген болжаммен қолда сақтай тұрған жөн санайды.
Егжей-тегжейі
WGC дерегіне сәйкес, сәуір мен маусым айлары аралығында жаһандық алтынға деген сұраныс (биржадан тыс инвестицияларды қоса алғанда) былтырғы осы кезеңмен салыстырғанда 3 пайызға өсіп, 1249 тоннаға жетті. Ал ақшалай есептегенде сұраныс 45 пайызға ұлғайып, рекордтық 132 миллиард доллар болды.
Ұйымның тоқсандық есебінде бейресми деректер институционалдық инвестициялар көлемінің және ауқатты жекелеген инвесторлардың әлем бойынша қызығушылығының жоғары деңгейде қалғанын көрсетеді.
«Алтынмен қамтамасыз етілген биржалық қорларға (ETF) деген сұраныс екінші тоқсан қатарынан жалпы сұраныс өсімінің басты қозғаушы күшіне айналды. Инвестиция ағынына әлемдік сауда саясатының белгісіздігі, геосаяси тұрақсыздық және алтын бағасының өсуі әсер етті. Құйма мен монета сатып алатын инвесторлар да бұл үрдіске қосылды. Олар бағаның өсуі мен алтынның қорғаныс актив ретіндегі беделіне қызықты. Осы екі күшті тоқсан қатарынан құйма мен монетаға деген инвестиция көлемі бойынша 2013 жылдан бергі ең қуатты алғашқы жартыжылдықты қамтамасыз етті», – делінген есепте.
Инвесторлар мен сарапшылар не дейді?
Миллиардер-инвестор Томас Каплан Kitco жаңалық қызметіне берген сұхбатында 2025 жылғы алтын бағасының секірісі – орталық банктердің сатып алуы, деглобализация және сенімді ақша формалары туралы түсініктердің өзгеруі салдарынан басталған «ұзақ толқынның» басы ғана екенін айтты.
«Қазір біз алтын үшін мінсіз дауыл жағдайын көріп отырмыз», – деді Каплан. Ол ұзақ мерзімді келешекте алтын бір унциясы үшін 10 мың доллардан асып, күміс 50 доллардан жоғары деңгейге шығады деп болжайды.
Капланның айтуынша, ондаған жылдар бойы алтын өзін «әлемдегі ең тиімді валюта» және «ең табысты биржалық тауар» ретінде көрсетіп келеді. Ол мысал ретінде 2007 жылдан бері алтын бағасы шамамен бес есе өскенін келтірді. Сол жылы ол энергетика саласындағы инвестицияларды тастап, алтынға бет бұрған еді. Ал сол уақыт аралығында мұнай бағасы екі есе арзандап, доллар еуроға қатысты нығайған.
Ал инвестициялық гуру Рэй Далио The Master Investor подкастында инвесторларға өз портфелінің шамамен 15 пайызын алтынға немесе биткоинге бөлуді ұсынды. Себебі оның айтуынша, АҚШ және онымен бірге бүкіл әлем «экономикалық инфаркт» шегінде тұр.
Далионың пікірінше, 1970 немесе 1930 жылдардағыдай фиат валюталар бір-біріне қатысты емес, алтын секілді қатты валюталарға қатысты құнсызданатын болады.
Баға болашағы қандай?
Қазір алтын бағасы жазғы тыныш кезеңнен өтіп жатыр. Алайда алда шыдамды инвесторларды қуантарлық үлкен серпіліс күтіп тұр. Бұл туралы Midas Touch Consulting компаниясының басқарушы директоры Флориан Груммес пікір білдірді.
Kitco News-ке берген сұхбатында ол қазіргі жағдайды «crack-up boom» деп сипаттады. Бұл – үдеген инфляция салдарынан фиат ақшаның, яғни еуро немесе доллар болсын, сатып алу қабілеті жойылатын кезең.
«Менің ойымша, жыл соңына дейін біз алтынның бір унциясы үшін 4 мың доллардан асқанын көруіміз әбден мүмкін», – деп болжады ол.
