«Инвесторлар мазасыздана бастады»: Уолл-стритте қорғаныш акцияларына сұраныс артуда
Инвесторлар сарапшылардың нарықтың «қызып кетуі» туралы ескертулеріне құлақ аса бастады, деп жазады Bloomberg. Уолл-стритте нарық қатысушылары тәуекелі жоғары активтерден гөрі сапалы әрі «қорғаныш» қағаздарға бет бұрып жатқанын байқады. Дегенмен, рекорд жаңартып тұрған нарықта табыстан құр қалудан қорқып, олар акциялардан толық бас тартпай отыр.
Егжей-тегжейлі
Bloomberg-тің дерегінше Citigroup сарапшылары инвесторлардың құнды қағаздарға негізделген стратегияларға қайта орала бастағанының алғашқы белгілерін көрген. Шілде мен тамыздың басында олар қаржылық жағдайы тұрақты, бағалануы төмен компанияларды іздеген. Бұл, өз кезегінде, табыс әкелмейтін технологиялық компаниялар мен өзге де спекулятивті активтердің бағасының төмендеуіне әсер етті.
Goldman Sachs қадағалайтын S&P 500 индексіндегі ең мықты балансы бар компаниялардан құралған қоржын өткен аптада қаржылық жағдайы әлсіз компанияларға қарағанда сәуір айынан бергі ең жоғары табыстылықты көрсетті. Мысалы, қомақты қаржы резервтері бар Fastenal, Palantir және West Pharmaceutical Services секілді компаниялардың акциялары қатарынан үш апта бойы қымбаттап келеді — бұл сәуірден бергі ең ұзақ өсу кезеңі. Әсіресе телекоммуникация, коммуналдық және сақтандыру саласындағы компаниялар, сондай-ақ акциялары жыл басынан бері 40%-ға өскен Philip Morris секілді алпауыттар жақсы нәтиже көрсетуде, дейді SIA Wealth Management портфель менеджері әрі бас нарық стратегы Колин Цызыньски.
Қоржынды қайта құру инвесторларға ұзаққа созылған раллиге алаңдаса да, акцияларда қалуға мүмкіндік береді, бірақ сонымен бірге әлсіз қағаздардың үлесін қысқартады, деп түсіндіреді Bloomberg. Қаржылық тұрғыдан тұрақты эмитенттерді таңдау S&P 500 өсімі баяуласа, шығын қаупін азайтады.
«Біз инвесторлардың мазасыздана бастағанын сезіп отырмыз, — деді Annex Wealth Management бас экономисі Брайан Джейкобсен. — Қазіргі жағдайда абай болу керек».
Табыс қуалау
Мазасыздыққа қарамастан, инвесторлар раллиден қалып қоямыз ба деп қорқып, акция сатып алуды жалғастыруда, деп жазады Bloomberg. Өткен аптада жеке акцияларға капитал ағымы соңғы екі жылдағы ең жоғары деңгейге жетті — ақша қорғаныш секторларына да, циклдік секторларға да бағытталды, дейді агенттік BofA дерегіне сүйеніп. Нарықтағы оптимизмді Уолл-стрит стратегтерінің «бұқа» көңіл-күйі де күшейтіп отыр. Олар құлдырауларды сатып алуға кеңес беріп, рецессия болмайынша ірі түзету болмайды деп болжайды.
Cboe құбылмалылық индексі — Уолл-стриттің негізгі «қорқыныш барометры» — сәрсенбіде жыл ішіндегі ең төменгі деңгейге (14,5) түсті. Айдың басында ол 20-дан жоғары болса, қазір 24 желтоқсаннан бергі ең төменгі жабылуына жақындап қалды, деп жазады Barron’s. 20-дан төмен мән әдетте сауда қақтығыстары сияқты тұрақсыздық кезеңінен кейін инвесторлардың сабырға келгенін білдіреді.
«Қор нарығындағы бұл раллимен күресу, тіпті оның негізі тым әлсіз болып көрінсе де, ақымақтық болар еді. Бір сәтте АҚШ-тың ұзақмерзімді қазынашылық облигацияларының кірістілігінің өсуі егер олар өздігінен құламаса немесе біз күтпеген қадамды Трамптан көрмесек акцияларға соққы береді. Бірақ бұл сценарийді қазірден ойлаудың қажеті жоқ», — деді Bloomberg стратегы Марк Кадмор.
Акциялардың жағдайы не болып жатыр?
8 сәуірден бері S&P 500 индексі 29%-ға өсті және сейсенбіде жаңа рекордпен жабылды. Өсімнің басты қозғаушысы — жасанды интеллектке деген инвесторлардың қызығушылығы, оның арқасында Nvidia мен Microsoft капитализациясы $4 трлн-нан асты. Күшті корпоративтік есептер трейдерлердің Дональд Трамптың күтпеген сауда саясаты экономикаға зиян тигізбегеніне сенімін арттырды. Дегенмен, S&P 500 өсімін салалар бойынша талдасақ, оның табысының басым бөлігі технологиялық компаниялар мен оларға жақын секторлардан түскені байқалады, бұл тұтыну тауарлары мен өнеркәсіп жабдықтары өндірушілерінің әлсіздігін жасырып отыр, деп жазады Bloomberg.
Сарапшылар бірнеше аптадан бері S&P 500 өсімінің «Жетілік» компанияларға тым тәуелді болуынан туындайтын қауіптер туралы ескертіп келеді. Олар бұқа нарығы тым ұзаққа созылып, орташа мерзімінен асып кеткенін айтып, оның «пісіп жетілгенін» және аю нарығының басталуына жағдай жасалып жатқанын алға тартады, деп жазады агенттік. Ned Davis Research бас жаһандық инвестициялық стратегы Тим Хейс 7 тамызда: «Бұқа қартайды, енді аю нарығына жол ашатын жағдай қалыптасып жатыр», — деп жазды. Бұдан бөлек, өсіп жатқан акциялардың құлдырағандарға қатынасы да нашарлады: егер S&P 500 өсімінен технологиялық алыптардың әсерін алып тастасақ, соңғы 13 сессияның 10-ында индекс төмендеген болар еді, дейді Bloomberg.
