Неліктен инвесторлар сарапшылардың кеңесіне құлақ аспайды?
Жеке инвесторлар Уолл-стрит сарапшыларының ескертулерін елемей, тәуекелі жоғары активтерге белсенді инвестиция салып жатыр. Мысалы, жоғары құбылмалы акцияларға бағытталған Invesco биржалық қоры соңғы бес жылдағы ең жақсы тоқсандық нәтижесін көрсетіп отыр — бұл қор «қорғаныс» ETF-терден озып кеткен. Инвесторлардың тәуекелге деген қызығушылығы нарық өсімі аясында күшейіп, S&P 500 индексінің жаңа рекордқа жақындауымен одан әрі артып отыр. Енді сұрақ туындайды: бұл үрдісті тек бөлшек трейдерлер ғана қолдап жатыр ма, әлде ірі инвесторлар да қосылды ма?
Егжей-тегжейлі
Бөлшек инвесторлар тәуекелі жоғары әрі құбылмалы нарық сегменттеріне белсенді инвестиция салып жатыр, дейді Bloomberg. Жоғары құбылмалы акцияларға бағытталған Invesco S&P 500 High Beta ETF қоры тоқсандық көрсеткіші жағынан 2020 жылдан бергі ең жақсы нәтижені көрсетті. Бұл қор тұрақты, «қорғаныс» активтерге бағытталған Invesco S&P 500 Low Volatility ETF-тен озып кеткен. Сонымен қатар, әлсіз қаржылық жағдайы бар компанияларды бақылайтын Goldman Sachs индексі де S&P 500-ден қыркүйектен бері алғаш рет жақсы нәтиже көрсетті.
Нарықтағы тәуекелге деген қызығушылық жалпы оптимизммен қатар өсіп отыр. Granite Bay Wealth Management сарапшысы Пол Стэнлидің айтуынша, инвесторлар қазір сауда келіссөздеріндегі ілгерілеуге үміт артып, Таяу Шығыстағы шиеленістің бәсеңдеуін оң бағалауда.
Нарықтағы тәуекелдер әлі де жоғары болса да, инвесторлар сарапшылардың ескертулеріне мән бермей отыр, деп жазады Bloomberg. АҚШ-тағы баж салығына қатысты үзіліс екі аптадан кейін аяқталуы мүмкін, ел экономикасы баяулап келеді, тұтынушылар сенімі төмендеуде, ал геосаяси жағдай тұрақсыз күйде. Осы себепті Уолл-стрит стратегтері сапасы төмен активтерден сақ болуға және тұрақты қаржылық көрсеткіштері бар компанияларға назар аударуға кеңес береді.
«Шілдеден бастап [экономикалық] өсім бойынша болжам теріс болады», — деп ескертті Goldman Sachs басқарушы директоры Луис Миллер. «Күзге дейін сақталуы мүмкін жоғары инфляция экономиканы баяулатуы мүмкін, ал бұл ең алдымен тұрақтылығы төмен және баяулауға ең сезімтал нарық сегменттеріне қатты соққы болады», — деді ол. Миллер атап өткендей, сапасыз акциялардың өсуі компаниялардың нақты табысымен емес, шортистердің позицияларын жабуымен байланысты. Goldman-ның пікірінше, табыс әкелмейтін технологиялық компаниялардың бағасы нақты негізсіз өсіп жатыр, ал «мем-акциялар» да қауіп аймағында қалып отыр.
Неліктен бөлшек инвесторлар тәуекелді жалғастыруда?
«Бұл — FOMO, яғни пайдадан қалып қоюдан қорқу фазасының бастауы», — дейді Evercore ISI компаниясының жетекші акциялар стратегi Джулиан Эмануэль Bloomberg-ке берген түсініктемесінде. «Мұндай құбылыс тұрақты «бұқа» нарығының соңғы кезеңінде жиі байқалады. Жақында ғана нарық пессимистік күйде болғанын, ал экономикалық белгісіздік әлі де сақталып отырғанын ескерсек, инвесторлардың алыпсатарлық мәмілелерге мұншалықты тез қайта оралуы — таңғаларлық жағдай», — деп қосты ол.
Truist Advisory компаниясының инвестициялар жөніндегі директоры Кит Лернердің айтуынша, АҚШ пен Қытай арасындағы баж салығы мәселесі біршама басылғаннан кейін, инвесторлар қайтадан жасанды интеллект тақырыбына қызығушылық таныта бастады. Оның есебінше, биыл S&P 500 индексіндегі компаниялардың пайдасы 8%-ға, ал IT-секторда — 21%-ға дейін өсуі мүмкін. «Компаниялар есебінен не күтуге болатыны белгісіз кезеңде, инвесторлар ұзақмерзімді өсу әлеуеті айқын салаларға бет бұрады», — деп қорытындылады ол.
Ірі инвесторлар керісінше әрекет етуде
Жеке инвесторлар сарапшылардың ескертулерін елемей, тәуекелге бел буып жатқанда, ірі институционалдық инвесторлар керісінше — сақтық танытып, портфельдерін қорғауға көшті. Олар былтыр тамызда болғандай, жаппай сатылым қайталана ма деп қауіптенеді. Ол кезде жаһандық экономиканың баяулауы туралы алаңдаушылықтар жаздағы төмен сауда белсенділігімен тұспа-тұс келіп, қаржы нарықтарында баға қатты құбылған. Қазір де жағдай ұқсас: Таяу Шығыстағы бітім тұрақсыз, мұнай бағасы құбылып тұр, ал Дональд Трамптың сауда саясаты әлі де белгісіз.
