Ірі инвесторлар нарық құлдырауынан сақтана бастады. Олар қандай активтерді таңдауда
Ірі инвесторлар демалыс маусымына жоғары сақтықпен қадам басып, өз портфельдерін қорғауды күшейтіп жатыр. Олар өткен жылдың тамыз айындағыдай жаппай сату жағдайынан қауіптенеді. Ол кезде жаһандық экономикалық өсімнің баяулауына қатысты алаңдаушылық маусымдық төмен сауда көлемімен қатар келіп, бүкіл әлемдегі қаржы активтері бағасының күрт құбылуына әкеп соққан еді. Қазір де жағдай ұқсас — Таяу Шығыстағы атысты тоқтату келісімі тұрақсыз көрінуде, мұнай бағасы бірде өсіп, бірде құлдырап жатыр, ал Дональд Трамптың сауда саясаты бұрынғыдай болжап болмайтын күйде.
Егжей-тегжейлі
«Алдағы үш айда нарықтар бағаларға алдын ала енгізілген оң сигналдарды шын мәнінде ала алмайды деп есептейміз», — деді Reuters-ке HSBC Asset Management-тің инвестициялар жөніндегі директоры Ксавье Баратон. Ол нарықтағы төмендеуден сақтану үшін акцияларға пут-опциондар сатып алғанын мәлімдеді.
Goldman Sachs инвесторларға нарықтағы төмендеуден қорғану құралдарын белсенді қолдануға кеңес берді. Бұлар: құбылмалылық құралдары (мысалы, VIX опциондарын немесе құбылмалылық фьючерстерін сатып алу, олардың бағасы нарықтағы дүрбелең кезінде өседі), пайыздық ставкалар бойынша туынды құралдар (ставкалардың өзгерісіне ойнауға арналған деривативтерді сатып алу) және трендтік стратегиялар (нарық бағытын қадағалап, соған ілесетін алгоритмдер).
Royal London Asset Management компаниясының мультиактивті стратегиялар жөніндегі басшысы Тревор Гритэм Reuters-ке берген сұхбатында алгоритмдердің акция сатып алу туралы белгі бергенін айтты. Алайда басқарушылар бұл ұсынысты орындамай, керісінше, акциялар үлесін қысқартуға шешім қабылдаған — бұл тәуекелдерді азайту үшін жасалды.
АҚШ пен ЕО арасындағы сауда келісімі бойынша дедлайн — 9 шілде. Келіссөздерде ілгерілеу байқалмайды, бірақ нарықтар ешқандай қауіп жоқтай әрекет етуде. LGIM компаниясынан Крис Джеффри айтуынша егер бұл қауіптер ескерусіз қала берсе, тәуекелден сақтану шаралары одан да өзекті бола түседі.
UBS компаниясының еуропалық акциялар стратегиясы жөніндегі бөлім бастығы Джерри Фаулердің пікірінше опциондар нарығындағы сигналдар трейдерлердің тамыз айындағыдай бір күндік құбылмалылықтың қайталануын күтіп отырғанын көрсетеді. «Бәріне түсінікті — бұл жаз көптеген нарықтық катализаторларға толы, сондықтан демалысқа баратын адамдар саны әлдеқайда аз болады», — деп қорытты ол.
Blackrock қалай әрекет етуде
Инвестициялық алып Blackrock осы аптаның басында алты–он екі айлық тактикалық көкжиекте АҚШ пен Жапония акцияларына артықшылық беріп отырғанын және Еуропаның корпоративтік облигацияларын тартымды деп санайтынын хабарлады.
— АҚШ акциялары жаһандық нарықтағы көшбасшы рөлін қайтадан иеленеді: жасанды интеллект тақырыбы қысқа мерзімде корпоративтік табысты қолдауды жалғастыруда және ұзақ мерзімде өнімділіктің артуына ықпал етуі мүмкін, деп санайды Blackrock.
— Жапония акцияларына корпоративтік басқару реформалары қолдау көрсетіп отыр, олар акционерлердің мүдделеріне бағытталған. Blackrock инвестицияны валюта хеджирлеусіз жасауды жөн көреді, өйткені нарықтағы күйзеліс кезеңдерінде иена әдетте нығаяды.
— Еуропалық корпоративтік облигациялар Blackrock-тың бағалауынша америкалықтардан тартымдырақ — олар кең спрэдтер есебінен көбірек пайда береді. Компания АҚШ-тың қысқа мерзімді мемлекеттік облигацияларына артықшылық береді, оларды қолма-қол ақшаның баламасы ретінде қарастырады. Сонымен қатар ол ұзақ мерзімді қазынашылық облигациялардың үлесін азайтып отыр — АҚШ-тың өсіп келе жатқан мемлекеттік қарызы мен деглобализация бұл активтерді азырақ болжамды етеді және мерзімге байланысты сыйақының өсуіне алып келуі мүмкін, дейді Blackrock.
