«Үйлену тойына ұқсайды»: Klarna акциясы алғашқы саудада 15% қымбаттады
Нью-Йорк қор биржасындағы дебют күні шведтің онлайн-банкі Klarna-ның акциясы алғашқы орналастыру бағасынан 43% күрт өсті, ал сауда қорытындысында өсім шамамен 15%-ды құрады. Финтех-стартаптың капитализациясы $17 млрд болды. Klarna-ның сәтті IPO-сы Уолл-стриттің жаңа эмитенттерге деген қызығушылығының артып келе жатқанын тағы бір рет дәлелдеді, деп санайды CNBC.
Егжей-тегжейлі
Алғашқы сауда барысында Klarna акциясы IPO-ның белгіленген бағасынан 43% күрт өсіп, $57,2-ға жетті, бірақ сессия соңына қарай котировка өсімі баяулады. Сауда күні акция $46,4 деңгейінде аяқталды. Бұл бастапқы бағадан 14,6% жоғары. Компанияның жалпы құны жабылу кезінде $17,3 млрд болып бағаланды.
«Қазір сатып ал — кейін төле» форматындағы танымал өнімдерімен белгілі Klarna 34,3 млн акцияны бір қағаз үшін $40 бағамен орналастырды. Бұл жарияланған бағалық диапазонның ($35–37) жоғарғы шегінен айтарлықтай жоғары болды. Нәтижесінде IPO $1,37 млрд қаражат тартты.
«Мен үшін бұл шынымен де маңызды белес, — деді CNBC-ге берген сұхбатында Klarna-ның теңқұрушы әрі бас директоры Себастьян Семятковски. — Үйлену тойына ұқсайды. Ұзақ дайындалып, жоспарлап, мереке жасайсың. Бірақ аяғында — отбасылық өмір басталады».
IPO-дан кім ұтты, кім ұтылды?
Орналастыру Klarna-ның бұрынғы инвесторларына миллиардтаған доллар пайда әкелді. Тап солар нарыққа қағаздың көп бөлігін — 28,8 млн акцияны шығарды. Орналастыру бағасы $40 болғанда, бұл $1,2 млрд-тан астамға тең. Ал компанияның өзі небәрі $222 млн тартты.
Klarna-ға алғаш рет 2010 жылы инвестиция салған Sequoia Capital жалпы есепте $500 млн құйған. IPO барысында венчурлық қор өзіндегі 79 млн акцияның 2 миллионын сатып, орналастыру бағасы бойынша шамамен $2,65 млрд пайда тапты, деп есептейді CNBC.
Алайда барлық инвесторларға бірдей жолы түсе қойған жоқ. Жапондық SoftBank 2021 жылы Klarna-ның $46 млрд-қа бағаланған қаржыландыру раундын басқарған еді. Содан бері оның үлесінің құны күрт төмендеді.
Контекст
Klarna IPO-сы биылғы технологиялық стартаптардың бірінен соң бірі жүзеге асып жатқан ірі жария орналастыруларын жалғастырды және Уолл-стриттің жаңа қағаздарға деген қызығушылығының артып келе жатқанын көрсетті, деп жазады CNBC. Бұған дейін стейблкоин эмитенті Circle мен дизайн жасауға арналған Figma платформасының акциясы күрт қымбаттаған еді. 12 қыркүйекте криптобиржа Gemini-дің IPO-сы күтілуде. Нью-Йорктегі 2025 жылғы қаражат тарту көлемі бойынша Klarna листингі төртінші орынға шықты — Venture Global ($1,75 млрд), CoreWeave ($1,5 млрд) және SailPoint ($1,38 млрд) орналастыруларынан кейін.
CNBC атап өткендей, Klarna-ның жария нарыққа шығуы Уолл-стриттің компания бизнесінің әрі қарайғы дамуына қаншалықты сенетініне сынақ болмақ. Соңғы айларда компания банктік қызметтерін кеңейтуге көңіл бөліп, АҚШ-та дебеттік картаны және жеке жинақ шоттарын іске қосты.
CNBC ескерткендей, компанияны реттеушілік қиындықтар күтуі мүмкін. Мәселен, Ұлыбритания билігі BNPL-қарыз нарығын ресми бақылауға алуды және мұндай қызметтер тұтынушы үшін қолжетімсіз болып қалмауына бағытталған жаңа ережелер енгізуді ұсынды.
IPO проспектісіне сәйкес, 2025 жылдың алғашқы жартысында компанияның табысы 15% артып, $1,5 млрд болды. Жартыжылдықтағы таза залал $152 млн-ды құрады — бұл өткен жылмен салыстырғанда шамамен бес есе көп. Сонымен бірге, 2024 жыл стартап үшін $21 млн пайдамен аяқталды, ал 2023 жылы $244 млн залал болған еді.
