JPMorgan 2027 жылы мұнай бағасы 30 долларға дейін төмендеуі мүмкін екенін ескертті
Әлем мұнайдың артық ұсынысына тап болуы мүмкін. Ондай болса Brent бағасын 2027 жылдың соңына қарай барреліне 30 $ деңгейіне дейін түсіреді. Мұндай ескерту JPMorgan сарапшыларының 24 қарашада клиенттерге жолдаған жазбасында айтылды, деп жазады CNBC. Бұлай болмас үшін жеткізуді шектеу шаралары қажет, деп атап өтеді инвестбанк.
Егжей-тегжейі
2026 жылы нарық тәулігіне 2,8 млн баррель профицитке, ал 2027 жылы 2,7 млн баррель артық өндіріске тап болуы мүмкін. Ұсыныстың мұндай көлемде асуы Brent құнын 2027 жылы барреліне 42 $ деңгейіне, ал жыл соңына қарай, егер өндіріс қысқармаса, 30 долларға дейін түсіруі ықтимал, деп ескертті сарапшылар.
Соған қарамастан, JPMorgan-ның ғаламдық тауар нарықтары стратегиялары бөлімінің жетекшісі Наташа Канева «күтілетін дисбаланстың толық көлемде жүзеге асуы екіталай» деп санайды. Банк сарапшылары Brent бағасы 2026 жылы барреліне 58 $, ал 2027 жылы 57 $ болады деген болжамды сақтап отыр. Бұл өндірушілер нарықты тұрақтандыру үшін өз еркімен өндірісті қысқартады деген жорамалға негізделген. Егер мұндай араласу болмаса, төмен бағалар сұранысты өздігінен ынталандырып, ОПЕК-тен тыс өндірушілерді өндірісті азайтуға итермелейді. Бұл да тепе-теңдікті қалпына келтіруі мүмкін, деп атап өтеді Канева. Алайда тіпті осы деңгейлерде де бағаны тұрақтандыру үшін «айтарлықтай күш қажет», дейді JPMorgan сарапшылары.
Сұраныс пен ұсыныс балансы
Пессимизм басым болғанына қарамастан, 2025 жылы мұнайға деген сұраныс тұрақты болып, тәулігіне 900 мың баррельге артты, деп жазады JPMorgan. 2027 жылы сұраныс өсімі тәулігіне 1,2 млн баррельге дейін жеделдеуі мүмкін. Алайда ұсыныс биыл және келесі жылы үш есе жылдам өседі деп күтіледі. Оның жартысы ОПЕК+ одағына кірмейтін экспорттаушыларға тиесілі, деп атап өтеді банк сарапшылары.
Жыл басынан бері Brent 16%-ға, ал америкалық WTI 19%-ға арзандады. ОПЕК+ көпжылдық шектеулерден кейін өндірісті ұлғайтуды жалғастырып келеді. Дүйсенбі күні Brent барреліне 62 доллардан жоғары, ал West Texas Intermediate 58 доллардан сәл жоғары бағада саудаланды.
