JPMorgan Chase Қытай акцияларынан Үнді бағалы қағаздарына капитал ауыстыруды ұсынды
Уолл-стриттің ең ірі банкі JPMorgan Chase-тің ауқатты клиенттерге қызмет көрсететін бөлімшесі — JPMorgan Private Bank Қытай акцияларынан Үнді қағаздарына ауысуды қолайлы стратегия деп санайтынын мәлімдеді. Банктің пікірінше бұл Оңтүстік Азия елінің қуатты ішкі нарығы жергілікті бағалы қағаздардың салыстырмалы қымбаттығын толық өтей алады.
Егжей-тегжейлі
«Үнді қағаздарына ауысу үшін дәл қазір өте сәтті уақыт, себебі олар жалпы нарықтан айтарлықтай қалып қойған», — деп Bloomberg JPMorgan Private Bank стратегi Тимоти Фангтың сөзін келтіреді. Гонконгтың Hang Seng индексі төрт жылдық максимумға — 26 мың тармақтан жоғары деңгейге көтерілген соң, «фокусты Қытайдан Үндістанға бұруға қолайлы сәт туды», деді Фанг.
«ЖІӨ өсімі 6–7% деңгейінде болжанып, компаниялардың пайдасы екі таңбалы қарқынмен артуы мүмкін екенін ескерсек, үнді активтеріне ротация идеясы барған сайын тұщымды көрінеді», — деп түсіндірді JPMorgan стратегi. «Бұл — тек бағалауға қатысты ставка», — деп ол ерекше атап өтті. Сондай-ақ Hang Seng 24 мың тармаққа дейін төмендесе, банк Қытай қағаздарына қайта оралу нұсқасын қарастыратынын айтты.
Үндістанның Nifty 50 индексі болжамды жылдық пайдаға қатысты шамамен 21 еселік мультипликаторымен (Forward P/E) саудаланып отыр, ал Hang Seng үшін бұл көрсеткіш — 12,5. Алайда JPMorgan стратегиясын әзірлеушіні үнді акцияларының бағалаудағы жоғары премиясы алаңдатпайды: «тарихи тұрғыда Үндістан 20-дан жоғары мультипликатормен саудаланатын», — дейді Фанг.
«Үндістан кедендік тарифтердің кесірінен ұзақ уақыт бойы артта қалып келді, бұл үнді активтеріне қайта кіруге жақсы мүмкіндік береді, — деп есептейді Фанг. — Қазір бұл мүмкіндік әлі ашық тұр, ал инвесторлар Үндістанды Қытай сияқты жақсы түсінбегендіктен, портфельдерінде оны әлі де төмен үлеспен ұстап отыр». Оның айтуынша баж салықтары сақталған күннің өзінде Үндістан экономикасының өсуін ішкі сұраныс қолдап отыр және бұған Қытайдан өндірістердің көшірілуі де әсер етуде.
Контекст
Шетелдік инвесторларға қолжетімді Қытай нарығы саналатын Гонконг биржасы 2025 жылы жасанды интеллектке қатысты дүрблең мен АҚШ–Қытай қатынастарының жақсаруына байланысты 30% өсті. Ал керісінше, Үндістан нарығы биыл аймақтық көрсеткіштен айтарлықтай қалып қойып, соңғы онжылдықтағы ең үлкен алшақтықты көрсетті, деп жазады Bloomberg.
Дегенмен соңғы бірнеше аптада үнді акцияларының нарығы әлемдік алаңдардағы тұрақсыздыққа қарамастан ерекше беріктік танытты: қараша басынан бері Nifty шамамен 2% өссе, MSCI аймақтық индексі 4% төмендеді, деп атап өтеді агенттік. Bloomberg-тің деректерінше инвесторлар Вашингтонның Үндістанға қатысты 50%-дық импорттық баждарды төмендетуге бағытталған ықтимал сауда келісімі жақын қалды деген үмітті бағаларға енгізіп отыр.
