Қарсы бағыттағы жолмен жүру: Tesla-ның роботаксиінің іске қосылуы қалай өтті
Tesla компаниясының акциялары алғашқы роботакси қозғалысқа шыққаннан кейін соңғы екі айдағы ең ірі күндік өсімді көрсетті – олар Техаста жолға шықты. Алғашқы сапарларға инвесторлар, сарапшылар және Tesla жанкүйерлері шақырылды. Олар сапарларын таспаға жазып, өз әсерлерімен бөлісті. Алайда бәрі мінсіз бола қойған жоқ, бір видеода такси қарсы жолаққа шығып, қос сызықты кесіп өтті, ал тағы бірінде – жылдамдық шектеу белгісін елемей өтіп кеткен.
Егжей-тегжейлі
23 маусымдағы сауда қорытындысы бойынша Tesla акциялары 8,2%-ға өсіп, $348,7-ға жетті. Бұл 29 мамырдан бергі ең жоғары жабылу бағасы. Сауда күні ішінде акциялар 11%-ға дейін қымбаттады – бұл 9 сәуірден бергі ең үлкен өсім, деп жазады Bloomberg. Инвесторлар Tesla компаниясының роботакси жобасын қарапайым түрде іске қосуын автопилот жол ережелерін бұзғаны жайлы ақпараттарға қарамастан оң қабылдады.
22 маусымда басталған алғашқы ашық сынақтарға Техастың Остин қаласында 10–20 шамасындағы көлік қатысты. Олар белгілі бір шектеулі ауданда жүреді. Бір сапардың бағасы – $4,2.
Алғашқы сапарлар қалай өтті
Жексенбі күні өткен іске қосылу рәсіміне жеке инвесторлар мен блогерлер шақырылды. Олар тікелей эфирде әсерлерімен бөлісті, деп хабарлайды Bloomberg. Сол күні кейбір аналитиктер де роботакси қызметін байқап көрді.
Tesla жанкүйері Герберт Онг бір видеода көліктің жылдамдығына және өздігінен тұраққа тұру қабілетіне тәнті болды. Басқа бір инфлюенсер Zack сапар адам жүргізгеннен де жайлы өткенін айтты. Tesla инвесторы және компанияға арналған парақша авторы Сойер Мерритт бұл тәжірибені «керемет» деп бағалады.
Алайда алғашқы ашық сынақтар барысында кейбір ақаулар да тіркелді. Tesla туралы подкасттың бұрынғы жүргізушісі әрі инвестор Роб Маурердің түсіріліміндегі видеода сегізінші минутта көлік солға бұрылуға арналған жолақтан тік жүруге шығып, қарсы жолаққа шығып кетті. Руль екі жаққа теңселіп, көлік қайта жолына оралу үшін қос сызықты кесіп өтеді.
Тағы екі видеода беспилотты Model Y жолаушылары көліктің жылдамдықты асырғанын түсірген. Мысалы, Сойер Мерритт отырған көлік 30 миль/сағ (48 км/сағ) шектеу белгісінен өткеннен кейін 35 миль/сағ (56 км/сағ) жылдамдықпен қозғалған.
Tesla өкілдері мен Остин полициясы Bloomberg-тің пікір сұрауына жауап бермеді. Алайда АҚШ-тың Жол қауіпсіздігі ұлттық басқармасы (NHTSA) бұл видеолардан хабардар екенін растады және қосымша ақпарат жинап жатқанын айтты, оның ішінде Tesla компаниясына жолданған ресми сұрау да бар.
«Бұл мәліметтер мен басқа да маңызды ақпараттарды талдағаннан кейін NHTSA жол қауіпсіздігін қамтамасыз ету үшін барлық қажетті шараларды қабылдайды», — делінген агенттіктің дүйсенбідегі мәлімдемесінде.
Сарапшылар не дейді
Barclays аналитигі Дэн Леви Bloomberg келтірген жазбасында бұл дебют «жалпы алғанда тыныш өтті», әрі ірі іркілістер болмағанын айтты. Ол бұл оқиғаны Tesla-ға сенетін инвесторлар үшін маңызды кезең деп бағалады.
UBS сарапшысы Джозеф Спэк дүйсенбідегі жазбасында: «Tesla жақсы позицияда тұрған сияқты, бірақ бұл мүмкіндік (роботакси сәтті жұмысы) акция бағасына әлдеқашан енген» деп мәлімдеді. Ол Tesla акцияларын сатуға кеңес беріп, мақсатты бағасын $190-нан $215-ке көтерді – бұл қазіргі бағадан 38%-ға төмен.
Guggenheim сарапшысы Рон Джузиков роботакси демалыс күндері ірі оқиғаға айналмағанын, бірақ инвесторларды уақытша қанағаттандыруға жеткенін айтты. Ол негізгі назарды сервисті кеңейту қарқынына аудару керек екенін атап өтті. «Жексенбіде Остинде жасалған алғашқы қадамдар – жақсы негіз. Олар Tesla-ның AI командасының атқарған жұмысын көрсетті. Бірақ шын мәнінде маңыздысы – инфлюенсерлер кеткеннен кейін не болатыны. Біз жыл соңына қарай кеңею қарқыны спринтке айналуы керек деп есептейміз. Себебі, қазіргі акция бағасына бұл үміттер енген», — деп жазды ол CNBC келтірген жазбасында.
Tesla-ға қатысты Уолл-стриттегі басты оптимист саналатын Wedbush компаниясының аналитигі Дэн Айвз тест-драйвтан кейін бұл тәжірибе оның күткенінен де асып түскенін мәлімдеді.
«Біз онсыз да әсерлі болады деп ойлағанбыз, — деді Айвз. — Бірақ сапардан кейін бір нәрсені анық айтуға болады: болашақ — дәл осы бағытта». Сынақтан кейін Айвз Tesla акцияларына Overweight рейтингін растады, бұл оларды сатып алуға кеңес береді дегенді білдіреді. Оның мақсатты бағасы — $500, бұл қазіргі таңда Уолл-стриттегі ең жоғары болжам болып қалуда.
Инвесторлар үшін бұл нені білдіреді
Bloomberg атап өткендей, компания үшін роботаксидің іске қосылуы — бұл Tesla-ның болашағы деп аталатын амбициялық бағыттың қарапайым бастауы. MarketWatch басылымы 2024 жылы Илон Маск акционерлерге сөйлеген сөзінде болашақта Tesla иелері өз көліктерін роботакси ретінде қолдана алатынын, бұл қызмет Airbnb мен Uber-дің комбинациясы болатынын айтқанын еске салады.
«Егер көлік біздің клиенттерге тиесілі болса, жүйе Airbnb сияқты жұмыс істейді: қалаған кезде көлігіңізді жүйеге қосып не алып тастай аласыз, – деді Маск. – Бір аптаға кетіп бара жатырсыз – қосымша арқылы бір батырманы басып, көлікті жүйеге қосасыз, ол сіз жоқта такси міндетін атқарып, ақша таба береді».
Масктың пікірінше осындай жағдайда иесінің табысы ай сайынғы көлік төлемінен асып түспек.
