Қытайлық электромобиль брендтерінің акциялары BYD жеңілдіктерінен кейін құлдырады
Әлемдегі ең ірі автонарықтағы сатылым өсімі баяулап келеді. Осыған байланысты автокомпаниялар бірінен кейін бірі бағаны төмендетуге мәжбүр болып отыр.
BYD компаниясы электромобильдерінің бағасын күрт төмендеткеннен кейін, инвесторлар Қытайдағы жетекші автокөлік өндірушілерінің акцияларын жаппай сата бастады. Жеңілдіктер 34%-ға дейін жетеді. Сарапшылардың пікірінше, басқа бәсекелестер де осындай қадамға баруы мүмкін, бұл өз кезегінде олардың кірісін азайтады. Инвесторлар мұны әлемдегі ең үлкен автонарықтағы (оның ішінде Tesla да күресіп жатқан) ауқымды баға соғысының белгісі ретінде қабылдап отыр.
Негізгі деректер
26 мамыр, дүйсенбі күні BYD акциялары Гонконг қор биржасында 8,6%-ға төмендеді. Қытайдағы басқа да автокомпаниялар нарық көшбасшысының артынан ілесті: Geely Automobile қағаздары 7,3%-ға, Great Wall Motor — 3%-ға, Li Auto — 5%-ға, ал Xpeng — 4,2%-ға арзандады. Bloomberg мәліметінше, инвесторлар бұл акцияларды сатуда. Себебі баға соғысы автокомпаниялардың табысын азайтады деген алаңдаушылық бар.
23 мамыр күні BYD Weibo әлеуметтік желісінде 22 электромобиль және гибрид үлгісінің жазғы жеңілдіктерге енетінін хабарлады. Бұл науқан маусымның соңына дейін жалғасады. Мысалы, BYD Seagull хэтчбегінің бағасы 69 800 юаньнан (9 688$) 55 800 юаньға (7 656$) дейін түсті — яғни 20%-ға арзандады. Seal гибрид седаны 34%-ға арзандап, 102 800 юань тұратын болды. Бұған дейін, жылдың басында, компания Han және Tang модельдерінің бағасын тиісінше 10,35% және 14,3%-ға төмендеткен еді.
BYD неге бағаны төмендетті?
Bloomberg жазуынша, Қытайда электромобиль сатылымдары жаңа рекордтарға жеткенімен, өсу қарқыны баяулап келеді. Елдегі жалпы экономикалық әлсіздік салдарынан тұтынушылық сұраныс бәсеңдеп, автокомпаниялар бағаны түсіруге мәжбүр. Қытайдың Жеңіл автокөліктер қауымдастығының дерегіне сәйкес, сәуір айының соңында дилерлер қоймаларында 3,5 млн көлік жиналған — бұл 57 күндік сақтау мерзіміне тең. Мұндай көрсеткіш 2023 жылдың желтоқсанынан бері алғаш рет тіркеліп отыр.
BYD соңғы айларда ескі үлгілерін, әсіресе, жаңа жүргізуші көмекшісі жүйесімен жабдықталмаған көліктерін белсенді түрде өткізіп жатыр. Компания бұл жүйені ақпан айынан бастап барлық автокөліктеріне тегін орната бастайтынын мәлімдеген еді. Morgan Stanley сарапшылары Bloomberg-ке берген түсініктемесінде: «Жекелеген жеңілдіктер сәуірден бастап болғанымен, енді ресми түрде жариялануы нарықтағы жағдайдың қаншалықты қиын екенін көрсетіп отыр», — дейді.
Алдағы болжамдар
BYD жеңілдіктері нарықтағы басқа ойыншыларға да қысым жасап отыр — олар да бағаны түсіруге мәжбүр болады. Мұндай жағдай компаниялардың кірісін одан әрі азайтады. Morgan Stanley пікірінше, бұл баға бәсекесі саланың қаржылық тұрақтылығына кері әсер етіп, шығындардың артуына және нарықтың бірігуіне әкеледі.
Citi Research сарапшылары да осы пікірде: «Біз BYD-ге ілесетін бәсекелестер болады деп күтеміз», — дейді олар. Мәселен, Changan компаниясы демалыс күндері Deepal S07 моделіне 25 мың юань көлемінде жеңілдік жариялады. Leapmotor болса, C16 (үлкен кроссовер) және C11 (орташа көлемдегі SUV) үлгілерінің бағасын төмендетті. Citi деректеріне сүйенсек, BYD жеңілдіктерінен кейін дилерлік орталықтардағы келушілер ағыны алдыңғы аптамен салыстырғанда 30–40%-ға артуы мүмкін.
MarketWatch деректеріне сүйенген UBS сарапшыларының пікірінше: «Қытай нарығындағы келесі ірі жеңімпаз немесе жеңілген кім болатынын болжау қиын. Бірақ біз BYD-ді сауда шектеулерінің күшеюіне қарамастан жаһандық деңгейге шығып жатқан жалғыз қытайлық автокомпания деп есептейміз». Сәуір айында BYD алғаш рет Еуропада Tesla-ны электромобиль сату бойынша басып озды. UBS айтуынша, Илон Масктың компаниясы Қытайда да позициясын жоғалтып жатыр және бұл нарықтағы негізгі ұтылған ойыншыға айналуда.
