Кэти Вуд Netflix акцияларын арзандағанда сатып алды. Оның ізімен жүру керек пе?
Ark Invest қорының басшысы Кэти Вуд стриминг алыбы Netflix акцияларының есебінен кейін 10%-ға құлдырауын тиімді пайдаланып, шамамен $17,5 млн сомасына компанияның бағалы қағаздарын сатып алды. 22 қазанда жарияланған мәміле Вудтың нарықтағы құлдырауды ұзақмерзімді инвестициялық мүмкіндік ретінде қарастыратынын көрсетті.
Егжей-тегжейлі
Ark Invest 22 қазанда Netflix-тің 15 756 акциясын шамамен $17,5 млн-ға сатып алған, деп хабарлайды Seeking Alpha. Сауда Ark Next Generation Internet ETF қоры арқылы жүргізілді — бұл Вудтың технология мен цифрлық инновацияларға бағытталған белсенді басқарылатын қоры.
Netflix акциялары есеп жарияланғаннан кейін 10%-ға арзандаған еді. Ark Invest осы сәтті компания портфеліне стриминг қызметін қосуға ыңғайлы уақыт деп санаған. Бұған дейін Ark пен оның қорлары Netflix акцияларын ұстамаған.
Қазір Netflix қордың 49 активінің ішінде 40-орында, үлесі — 0,77%. Кішкентай позиция болғанымен, бұл қадам Кэти Вудтың стриминг нарығының ұзақмерзімді әлеуетіне сенетінін көрсетеді.
23 қазанда Netflix акциялары тағы 0,3%-ға арзандады. Дегенмен, жыл басынан бері компанияның нарықтық құны шамамен 30%-ға өсті.
Уолл-стрит не дейді?
Netflix-тің есеп нәтижелері аралас болды: пайда мен операциялық маржа күткеннен төмен, бірақ сарапшылар бұған сабырмен қарады. CNBC мәліметінше бұрын «сатып алу» ұсынған талдаушылар өз ұстанымдарын өзгертпеген.
Benzinga атап өткендей, аналитиктер компанияның ұзақмерзімді жағдайына алаңдамайды. Олар Netflix-тің басты өсу драйвері — жарнама бизнесі деп санайды.
Canaccord талдаушысы Мария Риппс Netflix акцияларының арзандауын сатып алу мүмкіндігі ретінде бағалады. «Компания аудиторияны тартуда рекордтық нәтижелерге жетті және жарнамадан түскен табыс айтарлықтай артты. АҚШ пен Ұлыбританияда Netflix үлесі тарихи максимумға жетті», — деді ол.
Bernstein сарапшысы Лоран Юн Netflix акцияларына Outperform (нарықтан жоғары) рейтингін беріп, мақсатты бағасын $1390 деп белгіледі — бұл шамамен 25% өсім әлеуеті. Ол да нарықтың реакциясын шамадан тыс деп бағалады.
«Netflix мұндай қысқа мерзімді құлдырауларды бұрын да бастан өткерген, бірақ әр жолы мықты негіздердің арқасында тез қалпына келген», — деді Юн.
Қазір Netflix акциялары бойынша 70% аналитик «сатып алуға» кеңес береді, 27% — бейтарап, ал тек 2 сарапшы «сатуды» ұсынады. Орташа мақсатты баға — $1366, бұл шамамен 22% өсу әлеуетін білдіреді.
Күмәнданушылар да бар
Goldman Sachs сарапшысы Эрик Шеридан Netflix-тің 2026 жылға нақты болжам бермегенін әлсіздік ретінде бағалады. «Компанияның басты сынағы — бәсекелестеріне қарағанда көрермен назарын ұстап тұру қабілеті», — деді ол.
Алайда Шеридан Netflix-тің операциялық маржасын ұлғайтуға әлеуеті барын, ал табыстың екі таңбалы қарқынмен өсуі жалғасатынын мойындады.
JPMorgan талдаушысы Даг Энмут компания акцияларының мақсатты бағасын $1300-ден $1275-ке түсірді. Дегенмен, бұл да шамамен 15% өсу мүмкіндігін білдіреді. Энмуттың пікірінше, үшінші тоқсанның нәтижелері мен төртінші тоқсанның болжамдары берік, бірақ бұрынғыдай қарқынды емес.
