«Күн тәртібінде жоқ»: OpenAI әзірге IPO-ға шығуға дайындық жүргізіп жатқан жоқ
OpenAI акциясын биржаға шығару жақын перспективада «күн тәртібінде жоқ», деді компанияның қаржы директоры Сара Фрайер WSJ Tech Live конференциясында. Оның айтуынша, ChatGPT жасаушысының жаңа корпоративтік құрылымға көшуі IPO-ға дайындықты білдірмейді — қазір компанияның басты назары пайда әкелуге емес, өсу мен зерттеулерге бағытталған.
«IPO қазір біздің күн тәртібімізде жоқ, — деді Фрайер. — Біз компанияны барған сайын ірі масштабта жұмыс істеуге дайындап жатырмыз, сондықтан IPO идеясының өзіне тым әуестенгіміз келмейді».
Қазанда OpenAI Microsoft-тен тәуелділікті азайтқан қайта құрылымдау процесін аяқтағанын хабарлады. Соның нәтижесінде жалпы құны $500 млрд болатын OpenAI Group PBC (Public Benefit Corporation — қоғамдық игілік корпорациясы) атты коммерциялық ұйым құрылды. Коммерциялық ұйым акцияларының шамамен 27%-ын Microsoft, ал 26%-ын OpenAI Foundation — компанияның коммерциялық қызметін директорлар кеңесі арқылы бақылайтын коммерциялық емес қор алды. Қалған акциялар басқа инвесторлар мен компанияның қазіргі және бұрынғы қызметкерлеріне бөлінді.
OpenAI-дың қайта құрылымдауды аяқтауы компанияның IPO өткізу мүмкіндігін арттырды. The Wall Street Journal дерегінше, бұл 2027 жылы өтуі ықтимал. Ал Reuters-тің мәліметінше, IPO тіпті 2026 жылдың соңында да жүзеге асуы мүмкін. Агенттік дереккөздерінің айтуынша, OpenAI бүкіл компанияны $1 трлн деп бағалап, кемінде $60 млрд тартуды қарастырып отыр.
