Майкл Бьюрри Big Tech-ті жалған пайда жасағаны үшін айыптады
Танымал инвестор, «The Big Short» кітабы мен фильміндегі кейіпкердің прототипі Майкл Бьюрри Meta мен Oracle секілді гиперскейлерлерді өз активтерін «пайдалы пайдалану» арқылы өздері пайда көрсеткішін қолдан көтерді деп айыптады.
Егжей-тегжейлі
«Активтердің қызмет ету мерзімін ұзарту арқылы амортизацияны төмендету — пайданы қолдан арттырудың ең кең тараған тәсілдердің бірі,» — деп жазды 2008 жылғы ипотекалық дағдарысты болжаған Майкл Бьюрри X әлеуметтік желісінде.
Ол гиперскейлерлердің капиталдық шығындарды белсенді арттырып, Nvidia чиптері мен серверлерін сатып алып жатқанын еске салды. Әдетте олардың қызмет ету мерзімі екі-үш жыл ғана, алайда оны «қағаз жүзінде» ұзарту компанияларға амортизациялық шығындарды ұзақ мерзімге бөлуге мүмкіндік береді. Бұл есептегі шығындарды азайтып, тиісінше таза пайданы қолдан ұлғайтады, деп жазды Seeking Alpha. Бьюридің есебі бойынша, мұндай түзетулер 2026–2028 жылдар аралығында амортизацияның жиынтық төмен бағалануын $176 млрд шамасында құрауы мүмкін.
Оның есебінше, 2028 жылға қарай Oracle мен Meta өз пайдасын тиісінше 26,9 % және 20,8 % деңгейінде қолдан арттыруы мүмкін.
Бьюрри сонымен қатар компаниялардың 2020 жылдан бері өз активтерінің «пайдалы пайдалану мерзімін» біртіндеп ұзартқанын көрсетті. Мысалы, Meta компаниясында желілік жабдықтың қызмет ету мерзімі үш жылдан бес жарым жылға, Alphabet компаниясында үш жылдан алты жылға, ал Oracle компаниясында бес жылдан алты жылға дейін ұзартылған. Microsoft пен Amazon да мерзімді алты жылға дейін созған.
Бьюрри 25 қарашада осы тақырып бойынша нақтырақ деректерді жариялайтынын айтты. Seeking Alpha-ның жазуынша, Alphabet, Amazon, Meta, Oracle және Microsoft компаниялары бұл мәселеге қатысты ресми пікір білдірмеді.
Акция ахуалы
11 қараша күні премаркетте Meta акциясы 1,3 % құлады. Қазан айының соңында тоқсандық есеп жарияланған сәттен бастап компанияның котировкасы 20 % төмендеп, бұл оның нарықтық капитализациясынан шамамен $240 млрд-ты өшірді, деп есептеді Financial Times. MarketWatch-тың жазуынша, инвесторларды Meta-ның болашақ капиталдық шығындарын $100 млрд-қа дейін арттыру жоспары алаңдатты. Осы құлдыраудың нәтижесінде Meta биылғы жылы «Керемет жетілік» арасындағы ең нашар көрсеткішке ие акцияға айналды.
11 қарашада Oracle қағазы 1,1 %, Alphabet — 0,64 %, Microsoft — 0,3 %, ал Amazon — 0,2 % арзандады. Бұл компаниялардың есептері де ЖИ-инфрақұрылымға капиталдық шығындардың өскенін көрсетті. Сонымен қатар, сектор акцияларының бағалауының шамадан тыс жоғары болуы туралы бұрыннан бар алаңдаушылық Morgan Stanley және Goldman Sachs сияқты Уолл-стрит алпауыттарының нарықтық түзету болуы мүмкін деген ескертулерінен кейін күшейе түсті.
Контекст
Майкл Бьюрридің басқаруындағы Scion Asset Management хедж-қоры өткен тоқсанда ЖИ-нарығының сүйіктілері — Nvidia мен Palantir акциясына қарсы қысқа позициялар ашты, деп көрсетілген оның 13F есебінде. Seeking Alpha-ның пікірінше, бұл — инвестордың жасанды интеллект төңірегіндегі ажиотажға сақтықпен қарайтынын білдіреді. Дәл осы фактор биыл қор нарығының негізгі драйверлерінің бірі болған еді.
Бьюрридің есебі жарияланған сәтпен шамалас уақытта ол X әлеуметтік желісінде бұлттық табыстың өсуінің баяулауы мен технологиялық сектордағы инвестициялардың шамадан тыс қызуын көрсететін графиктерді жариялады. Ал бірнеше күн бұрын өз парақшасында нарықта «көпіршік» пайда болуы мүмкін екенін меңзеп, «кейде ең ұтымды қадам — ойынға мүлде қатыспау» деп жазды.
