Goldman мен Morgan Stanley басшылары нарықта 10% түзету болуы мүмкін екенін айтты
Goldman Sachs пен Morgan Stanley компанияларының басшылары Гонконгтағы саммитте алдағы 12–24 ай ішінде нарықта 10%-дан астам төмендеу болуы мүмкін екенін ескертті, деп хабарлайды CNBC. 2025 жылғы раллиден кейін, оған жасанды интеллекттің өркендеуі мен АҚШ ФРЖ-нің жұмсақ саясаты түрткі болды, сондай-ақ үкіметтің тоқтап қалуы да тоқтата алмады делінген телеарна мәліметінде.
Goldman Sachs басшысы не деді?
Goldman Sachs компаниясының бас директоры Дэвид Соломонның айтуынша, алдағы 1–2 жылда жаһандық қор нарықтары 10–20% төмендеуі мүмкін. Оның пікірінше, бұл қалыпты жағдай: «Барлығы өсіп жатыр, бірақ кейде кері шегініс жасауға тура келеді. Себебі инвесторлар жағдайды қайта бағалауға тырысады».
Соломон технологиялық компаниялардың бағалары шегіне жеткенін мойындады, бірақ бұл бүкіл нарыққа қатысты емес дейді. Ол ұзақ мерзімді нарықта осындай түзетулердің жиі болатынын айтты: «Тіпті өсім кезеңінде де 10–15% төмендеулер жиі кездеседі. Бұл капиталды басқару тәсілін түбегейлі өзгертуге себеп емес».
Оның сөзіне қарағанда, Goldman клиенттерге нарықта қала беруді, тек портфель құрылымын сәл түзетуді ұсынады. Нақты қашан кіріп-шыққан дұрыс екенін болжауға тырыспау керек.
Morgan Stanley басшысы не деді?
Осы сессияда сөйлеген Morgan Stanley басшысы Тед Пик те уақытша төмендеулерді дағдарыстың белгісі емес, табиғи құбылыс ретінде қабылдау қажет екенін айтты, деп хабарлайды Bloomberg.
«Иә, нарық қымбат көрінеді... бірақ жүйелік қауіптер азайды», — деді ол. Дегенмен, АҚШ ФРЖ-нің саяси қателіктері мен геосаяси белгісіздікке де назар аудару қажет екенін ескертті.
Пиктің айтуынша, 2026 жылы инвесторлар компаниялардың кірісіне көбірек мән береді. Нәтижесінде нарықта айырмашылықтар арта түседі: мықты компаниялар алда болады, әлсіздері артта қалады. Ол IPO нарығының әлем бойынша белсенді екенін және инвесторлардың тәуекелге дайын екенін атап өтті.
«Егер ірі экономикалық күйзелістер болмаса, 10–15% төмендеу — нарық үшін қалыпты құбылыс», — деді Morgan Stanley басшысы.
Азиядан оң сигналдар
Екі банкир де алдағы жылдары Азия ең әлеуетті аймақтардың бірі болатынын айтты. Бұған АҚШ пен Қытай арасындағы сауда келісімі де әсер етеді. Goldman мәліметінше, жаһандық инвесторлар Қытай нарығына қызығушылық танытып отыр. Morgan Stanley Қытайға, сондай-ақ Жапония мен Үндістанға қатысты оң көзқарасты сақтап отыр. Пик Жапониядағы корпоративтік реформалар мен Үндістандағы инфрақұрылым дамуын ұзақ мерзімді инвестициялық бағыт деп атады. Қытайда ол жасанды интеллект, электромобиль және биотехнология салаларын ерекше атады.
Нарықтағы жағдай
Бұл мәлімдемелер акция бағасының жоғары болуына байланысты инвесторлар алаңдап жатқан сәтте жасалды. Мәселен, 4 қарашада Palantir Technologies акцияларының бағасы төмендеді. Компания жақсы есеп бергенімен, акция бағасы 7%-дан астам құлдырап, Nasdaq және S&P индекс фьючерстеріне де әсер етті.
S&P 500 индексі сәуір айындағы ең төменгі деңгеймен салыстырғанда 35%-дан астам өсті. Қазір оның бағалау мультипликаторы (P/E) — 23, ал соңғы 5 жылдағы орташа мәні — 20. Nasdaq 100 индексінде бұл көрсеткіш — 28, ал 2022 жылы — 19 болған.
