Нью-Йорктегі таң: акциялар коррекция кезеңіне өтті
Freedom Capital Markets Research ұйымы директорының орынбасары Михаил Денисламов ұсынған АҚШ қор нарығына арналған күнделікті шолу мен болжам.
Бүгіннен не күтеміз
4 қарашадағы сауда ашылуына дейін АҚШ индекс фьючерстері шамамен 1%-ға төмендеуде. Бұған ФРЖ-ның алдағы әрекеттеріне қатысты белгісіздік пен акциялардың шамадан тыс қымбаттағаны жөніндегі инвесторлардың алаңдаушылығы себеп болып отыр. Бұл көңіл күй Goldman Sachs басшысы Дэвид Соломон мен Morgan Stanley жетекшісі Тед Пиктің Гонконгте өткен Қаржы көшбасшыларының жаһандық инвестициялық саммитіндегі мәлімдемелерінен кейін күшейе түсті. Олар алдағы 12–24 айда нарықта 10%-дан астам түзету қаупі жоғары екенін айтты. Спикерлердің пікірінше қазіргі бағалау деңгейлері аса сақ болуды талап етеді.
Осының аясында Palantir (PLTR) компаниясы мықты тоқсандық есеп жариялағанына қарамастан акциялары премаркетте шамамен 4%-ға төмендеп жатыр. Компанияның кірісі жылдық есеппен 63%-ға өсті, ал жасанды интеллект платформасы AIP-ке жоғары сұранысқа байланысты жылдық болжам да жақсартылды. Palantir бағамының негізгі сессиядағы қозғалысы нарықтағы ІІ-сектор көңіл күйінің индикаторы ретінде мұқият бақыланбақ.
Күн ішіндегі нарық динамикасы ФРЖ өкілдерінің пікірлеріне және компаниялардың есептеріне тәуелді болмақ. Негізгі оқиға — ФРЖ басқарушылар кеңесінің мүшесі, «қыран» ұстанымымен белгілі Мишель Боуманның сөз сөйлеуі. Инвесторлар оның мәлімдемесінен ақша-несие саясатының келесі бағытын аңғаруға тырысады.
Негізгі сессияға дейін есептерін Pfizer (PFE), Shopify (SHOP), Uber Technologies (UBER), Spotify (SPOT), Eaton (ETN), Energy Fuels (UUUU) және Ferrari (RACE) ұсынады. Сауда жабылғаннан кейін есептерін Advanced Micro Devices (AMD), Super Micro Computer (SMCI), Arista Networks (ANET), Asteral Labs (ALAB), Tempus AI (TEM), Marathon Digital (MARA) және Beyond Meat (BYND) жариялайды.
АҚШ индекс фьючерстері теріс динамика көрсетіп тұр. Тәуекелдер балансын біз жоғары құбылмалылық жағдайында жағымсыз деп бағалаймыз. S&P 500 индексі бойынша 6765–6890 пункт (алдыңғы жабылудан -1,3% пен +0,5% аралығы) диапазонында қозғалыс күтеміз.
Назарда
— Hims & Hers Health (HIMS) акциялары премаркетте 3%-дан астамға көтерілуде. Онлайн-медицина платформасы үшінші тоқсандағы кіріс бойынша болжамнан асып түсті, оған жазылушылар санының жылдық есеппен 21%-ға өсуі әсер етті.
— Navitas Semiconductor (NVTS) қағаздары негізгі сауда басталмай тұрып шамамен 15%-ға құлдырады. Компанияның тоқсандық кірісі мен пайдасы нарықтың орташа күтулерінен төмен болды және төртінші тоқсанға болжамы да көңіл көншітпеді.
— Vertex Pharmaceuticals (VRTX) премаркетте шамамен 4%-ға төмендеп жатыр, компания пайданы консенсус болжамынан жоғары көрсеткеніне қарамастан. Инвесторларды муковисцидозға қарсы басты препарат Trikafta сатылымының әлсіздігі алаңдатты. Сонымен қатар, жылдық кіріс болжамының жаңартылған нұсқасы нарық күтулерімен ғана сәйкес келіп, жаңа өсу драйверлері болмайтынына ишара етті.
— Williams Companies (WMB) қағаздары негізгі сессия алдында 3%-дан астамға түсіп кетті. Газ тасымалдаудан түскен табыстың өсуін операциялық және пайыздық шығындардың артуы толықтай жойып, компания пайдасының қысқаруына алып келді.
Кешегі сауда нарығы
3 қарашадағы АҚШ қор нарығы саудасы аралас нәтижемен аяқталды. S&P 500 0,17%-ға, Nasdaq 100 — 0,44%-ға өсті; Dow Jones 0,48%-ға төмендеді, ал Russell 2000 0,33%-ын жоғалтты. Нарыққа қолдау көрсеткен — «Ғажайып жетілік» компанияларының акциялары. Әсіресе Amazon (AMZN: +4%) қағаздары OpenAI-мен $38 млрд көлеміндегі келісім жаңалығынан кейін белсенді сатып алынды. Соның арқасында тұтынушылық тауарлар секторы (XLY: +0,94%) өсім көшін жалғастырды. Ал байланыс қызметтері секторы артта қалды (XLC: -1,06%).
Күннің басты макродерегі — өндірістік сектордағы іскерлік белсенділік индексі (ISM Manufacturing). Қазан айында ол 48,7 тармаққа түсіп, күтілген 49,6-дан төмен болды. Сектордағы құлдырау қатарынан сегіз ай бойы жалғасуда. Алайда жаңа тапсырыстар мен жұмыспен қамту көрсеткіштері жақсарды, бағалық қысым әлсіреді — бұл инвесторларға экономиканың «жұмсақ қонуы» сценарийіне үміт береді.
ФРЖ өкілдерінің пікірлері нарыққа қысым түсірді. Басқарушылар кеңесінің мүшелері Стивен Миран мен Лиза Кук қатаң ақша-несие саясатын сақтауды жақтаған мәлімдеме жасап, желтоқсандағы мөлшерлеме төмендету ықтималдығына деген сенімді азайтты.
Компаниялар жаңалықтары
— M&A нарығы үшін маңызды жаңалық — Kimberly-Clark (KMB: -14,6%) компаниясының Kenvue-ді (KVUE: +12,3%) $48,7 млрд-қа сатып алатынын жариялауы. Бұл — алдыңғы жабылу бағасынан 46% жоғары ұсыныс. Дегенмен, инвесторларды келісім құнының жоғары болуы және интеграция тәуекелдері алаңдатты.
— Beyond Meat (BYND: -16%) акциялары күшті қысымға түсті, себебі компания тоқсандық есебін 11 қарашаға кейінге қалдырды. Басшылық бұл шешімді активтер құнсыздануына байланысты ақшалай емес шығындарды бағалаумен түсіндірді — нарық бұны теріс белгі ретінде қабылдады.
— IREN (IREN: +11,5%) қағаздары Microsoft-пен $9,7 млрд көлемінде бұлттық қызмет көрсету арқылы ІІ инфрақұрылымын дамыту келісіміне қол жеткізгені жайлы жаңалықтың арқасында айтарлықтай өсті.
— Micron (MU: +4,9%) және басқа жад чиптерін өндірушілер үшін оң жаңалық — Samsung компаниясының DDR5 жадын жеткізу келісімдерін сұраныстың ұсыныстан артық болуына байланысты кейінге қалдыруы. Нәтижесінде апталық спот бағалар 25%-ға өсті.
— IDEXX Laboratories (IDXX: +14,8%) компаниясының мықты тоқсандық есебі мен жылдық болжамының жақсаруы оның акцияларын күрт көтерді. Әсіресе үй жануарларына арналған өнімдер сегментіндегі нәтижелер ерекше сенімді болды.
