Үш аптадағы ең ауыр күн: инвесторлар технологиялық акциялар индексін 2%-ға құлатты
4 қараша күні АҚШ нарығында акциялар күрт арзандады. S&P 500 және Nasdaq Composite индекстері үшін бұл соңғы үш аптадағы ең ірі құлдырау болды, деп жазады MarketWatch. Ең көп шығын технология саласына тиді. Жоғары бағаланған активтерге қатысты ескі қауіптер Goldman Sachs пен Morgan Stanley сияқты ірі ойыншылардың ескертуінен кейін қайта күшейді — олар инвесторларды нарықта түзетуге дайын болуға шақырды.
Егжей-тегжейі
– ЖИ саласына қатысы бар компаниялардың құлдырауына байланысты Nasdaq Composite индексі 2%-ға төмендеді. Palantir акциялары 8%-ға, ал Nvidia, Oracle және AMD — 4%-ға, Amazon — шамамен 2%-ға арзандады.
– S&P 500 индексі 1,2%-ға түсті.
– Dow Jones Industrial Average — 0,5%-ға төмендеді.
– Биткойн 6%-дан астам арзандап, маусымнан бері алғаш рет $100 000 межесінен төмен түсті.
– Алтын бағасы 1,7%-ға түсіп, унциясы $3946 болды.
Акциялар неге құлдырады?
Nasdaq Composite пен S&P 500 индекстері ЖИ саласындағы акциялар жаппай сатылған соң төмендеді. CNBC түсіндіруінше, инвесторлар бұл акциялардың бағасы тым жоғары және нарықтағы орнын ақтамайды деп қорқады. Мысалы, Palantir акциялары жыл басынан бері 150%-дан астам өсті, бірақ болашақтағы табысқа негізделген P/E мультипликаторы 200-ден асады. Бұл — инвесторлар табыс пен кірістің күрт артуын күтіп отыр деген сөз. Ал Майкл Бьюридің Palantir мен Nvidia-ға қарсы «аю бәсі» бұл қауіптерді одан әрі күшейтті.
FactSet деректеріне сәйкес, ЖИ секторындағы өсім S&P 500 индексіндегі акция бағасының күтілетін табысқа қатынасын 23 деңгейіне жеткізді. Бұл 2000 жылдан бергі ең жоғары көрсеткіштердің бірі.
Соңғы айларда ЖИ акциялары нарықты жоғары көтеріп келгенімен, Ameriprise сарапшысы Энтони Саглимбене мұндай бағалаулар түзетусіз тым артық көріне бастады дейді.
«Біз сәуірден бері айтарлықтай түзетуді көрген жоқпыз. Табыс жоғары, бірақ технологиялық алпауыттардың капиталдық шығындарын ескерсек, келесі жылы сол шығындарды ақтайтындай өсім бола ма — осы сұрақ мазалай бастады», — деді ол CNBC-ге берген сұхбатында.
Сарапшының айтуынша, нарықтың қозғалысы соңғы айларда тек тар секторлармен шектеліп отыр. Егер ЖИ және технологиялық компаниялар баяулайтын болса немесе қысқа мерзімді түзету орын алса, нарықты қолдай алатын басқа мықты сектор жоқ. «Ал егер экономикалық деректер әлсіз, ал компаниялардың табысы орташа болса, инвесторлар қайда бет бұрады?» — деп қосты ол.
Қосымша қысым Goldman Sachs пен Morgan Stanley басшыларының мәлімдемелерінен кейін пайда болды. Goldman басшысы Дэвид Соломон келесі 12–24 айда нарық 10–20% аралығында түзетілуі мүмкін деді. Morgan Stanley бас директоры Тед Пик: «10–15% төмендеуге дайын болуымыз керек, бұл міндетті түрде макроэкономикалық соққымен келмейді», — деді.
