«Нағыз ессіздік»: Palantir басшысы «Қысқа ойын» фильміндегі инвесторға жауап берді
Palantir компаниясының бас директоры әрі негізін қалаушысы Алекс Карп Palantir мен Nvidia акцияларына қарсы бәс тіккен танымал инвестор Майкл Бьюрриді сынап шықты. Бұл Бьюри «Қысқа ойын» фильмінде көрсетілген шынайы кейіпкер ретінде танымал.
«Ол барлық табыс тауып жатқан екі компанияға қарсы бәс тігіп отыр. Бұл өте оғаш. Чиптер мен онтологияларды (жасанды интеллект негізінде қолданылатын логикалық құрылымдар — Oninvest) шортқа қою — бұл жай ғана ессіздік», — деді Карп CNBC арнасында.
4 қарашада Palantir акциялары кварталдық есеп жарияланғаннан кейін 9%-ға дейін төмендеді. Компания табысы мен кірісінің өскенін хабарлап, жылдық болжамын да жақсартқан. Бірақ CNBC жазуынша, инвесторлар ЖИ-компаниялардың бағасының тым жоғары екенін сезіп, күдікпен қарай бастады.
Осыдан кейін Бьюридің Scion Asset Management хедж-қоры үшінші тоқсан соңында Nvidia-ға қарсы $187 млн және Palantir-ге қарсы $912 млн көлемінде пут-опцион ұстағанын хабарлады. CNBC мәліметінше, есепте бұл келісімшарттардың мерзімі мен бағасы көрсетілмеген. Сондықтан Palantir акцияларының 4 қарашадағы құлдырауынан Бьюри пайда тапты ма — ол жағы белгісіз. Себебі бұл деректер 30 қыркүйектегі жағдайды көрсетеді, содан бері портфель өзгеруі мүмкін. Бьюри CNBC-ге Карптың пікірі немесе өз позициясы жайлы пікір беруден бас тартты.
«Шын мәнінде, ол бізге шын бәс тігіп отырғанына күмән бар. Ол, бәлкім, жай ғана “бұл позициядан қалай шығамын, әрі ақымақ болып көрінбеймін” деп ойланып жүрген шығар», — деді Карп CNBC эфирінде. Ол мұндай шортистердің әрекетін «өрескел» деп атап, олар қателескен кезде «қуаныштан билеп кететінін» айтты.
«Бұл шорттармен бәрі оңай емес... Шынымды айтсам, бұл нарықты манипуляциялау сияқты көрінеді. Біз бұрын-соңды болмаған жақсы нәтижелер көрсеттік. Бәлкім, бұл жай ғана позициядан шығудың бір жолы шығар. Бұл адамдар өздерін этикалық деп көрсетеді, бірақ шын мәнінде әлемдегі ең мықты бизнеске қарсы бәс тігуде», — деді ол.
