Майкл Бьюрри төрт компанияны инвестициялауға лайық деп атады

2008 жылғы ипотекалық дағдарыстан пайда тапқан және «Қарсы ойнау» фильмінде бейнеленген миллиардер-инвестор Майкл Бьюрри жақында өзінің Scion Asset Management хедж-қорын АҚШ-тағы тіркеуден алып тастады. Енді ол Substack платформасындағы блогында өз инвестициялық көзқарастарымен ашық бөлісуде. Бьюрри әдеттегідей бағаланбай қалған, көбіне шағын әрі қатты арзандаған компанияларға қызығушылық танытады.

Оның ұсынған төрт компаниясының үшеуінің акциялары биыл 30%-дан астам арзандап, олардың нарықтық құны 25 млрд доллардан төмен түскен. Ал төртінші компания — мемлекеттік қолдауға ие құрылым, оның акциялары жекешелендіріледі деген сыбысқа байланысты шарықтап кеткен.

Бьюрридің таңдауы қандай?

– Lululemon — спорт киімі сататын ритейлер. Компания акциялары биыл 52%-дан астам құлдырады. Қазіргі бағасы болжамды табысқа қатысты еселігі (P/E) — 15-тен төмен.

– Molina Healthcare — табысы төмен және қарт америкалықтарға медициналық сақтандыру қызметін ұсынатын ұйым. Оның нарықтық құны 49%-ға азайған, мультипликаторы да 15-ке жетпейді.

– Shift4 Payments — қонақ үйлер, мейрамханалар, стадиондар және онлайн-дүкендер үшін төлем жүйелері мен коммерциялық шешімдер ұсынатын финтех-компания. Оның акциялары 2025 жылдың басынан бері 32%-ға түсті.

– Fannie Mae — ипотекалық несиелерді сақтандыратын және АҚШ тұрғын үй нарығын қолдайтын мемлекеттік агенттік. Бұл компания $4 трлн астам көлемдегі несиелерді қамтамасыз етеді. Ол Бьюрридің тізіміндегі жалғыз қор биржасынан тыс компания. 2025 жылдың басынан бері оның акциялары үш есе қымбаттады. Себебі Трамп әкімшілігі Fannie Mae мен оның серіктесі Freddie Mac агенттіктерін жекешелендіреді деген үміт пайда болды. Бұл агенттіктер 2008 жылғы дағдарыстан кейін мемлекет бақылауына алынған болатын.

Бірінші үш компания Scion Asset Management-тің өткен жылғы есептерінде де көрінген. Ал Fannie Mae позициясы алғаш рет жарияланып отыр. Себебі ол қор биржасынан тыс нарықта саудаланатындықтан, қор оны міндетті түрде есепке енгізуге тиіс болмаған.

«Менің портфолиомда Lululemon, Molina, Shift4 Payments бар екенін білесіздер. Олар маған ұнайды. Сондай-ақ Fannie Mae бар, бірақ ол «қызғылт жапырақ» бойынша жүретіндіктен, ешқашан жарияланбаған. Бұл компанияларды кемінде 3–5 жыл ұстаймын. Алдағы посттарда әрқайсысына жеке тоқталамын. Қазір $2–12 млрд капитализация аралығындағы компаниялар ең жемісті аймақ саналады», — деп жазды Бьюрри.

Ол сонымен қатар қазір «жылдың ең қолайлы уақыты» екенін айтты. Себебі көп акция жыл соңындағы салықты оңтайландыру және «көрсеткіш» үшін тым арзанға сатылып жатыр. «Көп қор менеджерлері жыл соңында портфельде сәтсіз акциялар бар екенін көрсеткісі келмейді. Бірақ мен үшін бұл маңызды емес», — деді Бьюрри.