Маск iPhone-да ChatGPT-ті әділетсіз жылжытты деп Apple-ді айыптады
Tesla-ның бас директоры Илон Маск Apple-дің App Store қосымшалар дүкені саясатын қатаң сынға алды.Ол iPhone өндірушісін жасанды интеллект жасаушысы OpenAI-ға негізсіз артықшылық беріп отыр деп айыптады.Масктың өзі бір кездері OpenAI-дың негізін қалаушылардың бірі болған.Кәсіпкер антимонополиялық тергеу бастаймын деп қорқытты.Масктың xAI стартапы ЖИ саласында OpenAI-мен бәсекелеседі.
Егжей-тегжейі
Tesla және xAI Holdings (Grok чат-боты мен X әлеуметтік желісі командасын біріктіреді) негізін қалаушы Масктың айтуынша, Apple OpenAI-дан басқа ешкімнің App Store чарттарының жоғарғы бөлігіне шығуына мүмкіндік бермейді.App Store — әзірлеушілерді жаһандық деңгейде жылжытудың негізгі алаңы.
X-тегі аккаунтында бекітілген жазбасында Маск: Apple «саясатпен ойнап» жүр ме, X пен Grok-ты жылжытпай отыр ма деп сұрақ қойды.Ол мұны антимонополиялық заңнаманы бұзу деп санап, «шұғыл түрде заңдық шаралар» қабылдайтынын мәлімдеді.
Bloomberg-тің атап өтуінше, бұл — маусым айында АҚШ президенті Дональд Трамппен қақтығысынан бері Маск кіріскен ең ірі жария даудың бірі. Сол кезде екеуі өз әлеуметтік желілерінде бір-біріне қатқыл сын айтқан еді.
OpenAI не деп жауап берді
OpenAI басшысы Сэм Альтман Маскпен көптен бері келісе алмай жүрген айыптауларға жауап ретінде әңгімені Масктың X әлеуметтік желісін басқару тәсіліне бұрды.«Естігенім бойынша, Илон X-пен манипуляция жасап, өзіне және өз компанияларына пайда әкеліп, бәсекелестеріне және ұнамайтын адамдарға зиян келтіреді екен», — деп жазды Альтман.
Apple неге OpenAI-ды жылжытады
OpenAI-дың ChatGPT чат-боты АҚШ-тағы iPhone-ға арналған ең көп жүктелген тегін қосымша болып тұр. Grok бесінші орында.Apple мен OpenAI соңғы iPhone үлгілеріне жасанды интеллектіні интеграциялау бойынша серіктестік орнатқан.
Соңғы айларда Apple OpenAI технологияларын өз өнімдеріне белсенді енгізіп жатыр. Бұған Siri дауыстық көмекшісі мен мәтін өңдеу құралдары Writing Tools кіреді. Негізгі назар — құпиялық пен қолайлылыққа аударылған.
Өткен аптада шыққан OpenAI-дың жаңа ЖИ-моделі GPT-5 қыркүйекте шығатын iOS 26, iPadOS 26 және macOS Tahoe 26 жаңа операциялық жүйелерімен бірге Apple Intelligence құрамына енеді. Бұл туралы Apple 9to5Mac сайтына хабарлады.
Techradar дерегінше, iPhone мен Mac пайдаланушылары GPT-5-ке бірнеше жолмен қол жеткізе алады. Ең айқын жол — Siri-ге өзі шеше алмайтын күрделі сұрақ қою.GPT-5, болжам бойынша, Apple Writing Tools құралына және iPhone камерасын қолданып, пайдаланушы көзіне түскен заттарды анықтайтын Visual Intelligence функциясына да біріктірілуі мүмкін.
