Meta акциялары құлдырады: жасанды интеллект нарығы «қызып кетті» ме?
Meta аптаның басынан бері 4%-дан астам жоғалтты. Негізгі төмендеу дүйсенбі және сейсенбі күндері тіркелді — инвесторлар пайдасын бекітіп, ІІ (жасанды интеллект) нарығының «қызуы» жайлы сигналдарға жауап қатты. 20 тамызда The Wall Street Journal Meta-ның ІІ бөлімшесінде кадр қабылдау тоқтағанын хабарлап, компания стратегиясының тұрақтылығына қатысты күмәнді күшейтті. Алайда нарықтағы оптимистер қысым уақытша құбылыс деп санайды.
Егжей-тегжейлі
Meta Platforms акциялары 18–19 тамызда 4%-дан астам құлдырады — бұл сәуірдегі АҚШ тарифтерінен кейінгі ең ірі төмендеу, деп жазады MarketWatch. Құлдырау MIT зерттеу институтының есебінен басталды. Онда компаниялардың 95%-ы ІІ-ден әлі пайда көрмей отырғаны айтылды. Бұған қоса, OpenAI бас директоры Сэм Альтман ІІ нарығында «көпіршік» барын мәлімдеді. Бұл факторлар технологиялық сектордағы қызығушылықты суытты.
20 тамызда WSJ Meta-ның ІІ бөлімшесінде кадр қабылдауды тоқтатқанын жазып, қысымды одан әрі арттырды. Ал 21 тамыз премаркетінде Meta тағы 0,04% жоғалтты. Nasdaq Composite соңғы бес күнде 2,5%-ға төмендеді.
Жұмысқа қабылдауды тоқтату Meta-ның соңғы алты айдағы төртінші ірі қайта құрылымдауы болды. Компания бұған дейін ІІ бағытын күшейтіп, бәсекелестерден 50-ден астам инженер мен зерттеушіні тартқан еді. Нарықтағы өсім дәл осы ІІ жобаларына деген үмітпен байланысты болатын.
Meta бұл қадамды «әдеттегі ұйымдастырушылық жоспарлау, суперинтеллект жобаларына тұрақты құрылым құру және жылдық бюджеттеу» деп түсіндірді.
Бұл неліктен маңызды?
WSJ жазғандай, инвесторлар технологиялық алыптардың ІІ-ге кетіп жатқан шығындарына алаңдай бастады. Meta-дан бастап Microsoft, Alphabet және Amazon сияқты компаниялар миллиардтаған долларды дата-орталықтар салуға және ІІ зерттеулеріне бағыттап отыр.
Axios-тың дерегінше S&P 500 индексіндегі ең ірі он компания (капитализацияның 40%-ына жуығы) бір-біріне де басты тапсырыс берушілер. Келесі жылы бұл төртеу (Meta, Microsoft, Alphabet, Amazon) ІІ-ге шамамен $400 млрд салмақ. Бұл шығындар Nvidia мен Broadcom сияқты серіктестердің кірісіне айналады. Бірақ шығынды бір компания азайтса, бүкіл сектордың табысына соққы болады.
Barings компаниясының активтерді басқару бөлімінің жетекшісі Тревор Слейвеннің айтуынша: «Мұндай инвестициялық бум кезінде сұраныс шексіз болып көрінеді, бірақ уақыт өте келе артық өндіріс кезеңі басталмай қоймайды».
ІІ нарығының «қызып кетуі» акция бағасына да әсер етуде. 20 тамызда Meta-мен бірге Amazon мен Apple шамамен 2%-ға, Alphabet 1%-ға арзандады. Nvidia болса алдындағы 3,5% құлдыраудан кейін аз ғана төмендеумен сауданы жапты, деп жазады Yahoo Finance.
Сарапшылар Meta жайлы не деп отыр?
Meta акциялары соңғы жылда тек алты рет 5%-дан астам қозғалыс көрсеткен. Сондықтан ағымдағы құлдырау бизнеске фундаменталды баға беруден гөрі жаңалықтың салмағын көрсетеді, дейді StockStory.
Екі апта бұрын ғана Meta акциялары 3,5%-ға көтерілді — компанияның күшейтілген қаржылық есебі және Уолл-стриттің жоғары баға таргеттерінен кейін. Екінші тоқсанда компания кірісі жылдық 22%-ға өсіп, $47,52 млрд-қа жетті, ал бір акцияға пайда 38%-ға артып, $7,14 болды.
Wedbush аналитигі Дэн Айвз сияқты оптимистер қысым уақытша деп есептейді. Оның ойынша технологиялық сектордың өсуі әлі 2–3 жыл жалғасады, ал қысқамерзімді тербелістер ұзақмерзімді трендті өзгертпейді.
Meta акциялары биыл 28%-ға өсіп, Big Tech ішінде тек Nvidia-дан (+35%) кейінгі орында тұр. Компанияның капитализациясы $1,92 трлн-ға жетіп, $2 трлн межесіне таяп қалды. Бұл шектен шықса, Meta Nvidia ($4 трлн-нан астам), Microsoft пен Apple ($3 трлн-нан жоғары), сондай-ақ Alphabet пен Amazon қатарында элиталық клубқа қосылады.
