Meta Prada брендімен смарт-көзілдірік шығарады – CNBC. Бұл неліктен маңызды?
Ray-Ban брендімен жасанды интеллекті бар смарт-көзілдіріктер шығарып жүрген Meta мен EssilorLuxottica компаниялары енді Prada және спорттық әрі жоғары технологиялы оптикамен танымал Oakley брендтері аясында жаңа үлгілерді шығаруды жоспарлап отыр. Жаңа құрылғылар спортқа арналған өнімдер ретінде ұсынылады. Prada-ның бұл жобаға қатысуы — Meta компаниясының сәннің люкс сегментіне ену жолындағы алғашқы қадамы ретінде бағалануда, деп хабарлайды CNBC.
Егжей-тегжейі
CNBC дерегінше, EssilorLuxottica мен Prada арасындағы көзілдірік шығару жөніндегі келісім жақында ұзартылып, енді Meta-мен бірлескен ақылды құрылғылар желісін іске қосуға негіз болмақ. Бұл — технологиялық алпауыттың сәнді премиум брендтер нарығына алғашқы қадамы.
Meta-ның бұрынғы қызметкерлерінің айтуынша, Prada көзілдіріктері кең құлақ ілгектерімен ерекшеленетіндіктен, ол бөліктерге микрофондар мен чиптер секілді қажетті компоненттерді орналастыруға ыңғайлы. Сондықтан бұл брендтің кейбір модельдері смарт-құрылғылар үшін өте қолайлы болуы мүмкін.
Жаңа өнімнің қашан ресми түрде таныстырылатыны әзірге белгісіз.
Meta дүйсенбі күні Oakley брендімен жаңа модельдің шығатынын тұспалдап, Instagram желісінде «Oakley | Meta» атты аккаунт ашты. Ондағы сипаттамада «Келесі даму кезеңі — 20 маусым» деп жазылған. CNBC мәліметінше, бұл гаджет спортшыларға арналмақ. Компания Ray-Ban смарт-көзілдіріктерінің иелері оларды теннис, шаңғы және басқа да белсенді әрекеттер кезінде видео түсіруге жиі пайдаланатынын байқағаннан кейін, белсенді қолданушыларды тартуға ниетті.
CNBC дереккөзіне сүйенсек, Oakley көзілдіріктері шамамен 360 доллар тұрады. Алғашқы нұсқада 2023 жылы шыққан Ray-Ban Meta желісіндегі технологиялар қолданылады, бірақ ол ауа райына төзімдірек болмақ.
EssilorLuxottica мен Meta арасындағы серіктестік 2019 жылы басталып, 2023 жылы Ray-Ban Meta көзілдіріктерінің екінші буыны жарық көрді. Бұл модель Meta AI дауыс көмекшісімен жабдықталған және смартфонға қосылғанда, қалалық нысандарды тану, ингредиенттерге қарап рецепт табу, WhatsApp пен Messenger арқылы дауыс хабарламаларын жазу және жіберу сынды функцияларды орындай алады. Үшінші, көлемдірек буын алдағы мерекелік маусымға қарай, төртінші тоқсанда таныстырылады деп күтілуде. Онда бір линзада шағын дисплей болады деген болжам бар.
EssilorLuxottica басшысы Франческо Миллеридің ақпаратына сәйкес, 2023 жылдан бастап компаниялар екінші буындағы 2 миллионнан астам құрылғы сатқан. Олар 2026 жылдың соңына дейін бұл көрсеткішті жылына 10 миллион данаға жеткізуді жоспарлап отыр.
Counterpoint зерттеу порталының биылғы ақпандағы деректеріне қарағанда, өткен жылы жаһандық смарт-көзілдірік нарығы 210 пайызға өсіп, оның басты қозғаушы күші Meta құрылғылары болған. Компанияның үлесі жалпы жеткізілімдердің жартысынан астамын құраған. Биыл бұл нарық тағы 60 пайызға ұлғайып, 2029 жылға дейін жыл сайын шамамен 60 пайыздық тұрақты өсім көрсетеді деп болжануда. Бұл өсімге қолдану сценарийлерінің көбеюі, баға сегменттерінің әртараптануы және өндірушілер экожүйесінің кеңеюі ықпал етеді.
Counterpoint биыл «жүздеген смарт-көзілдірік үлгілерінің шайқасы» болатын жыл деп болжайды. Нарықтағы бәсеке жаңа деңгейге көтеріледі.
Бұл нарыққа басқа кімдер кірмек?
Мамыр айында Alphabet Warby Parker атты шағын компаниямен 150 миллион долларлық серіктестік жариялады. Осының аясында Google-дың Gemini дауыс көмекшісімен біріктірілген көзілдіріктер жасалмақ. Ал Bloomberg дереккөздері Apple компаниясы да кеңейтілген шынайылықсыз смарт-көзілдірік жасап жатқанын, оны 2026 немесе 2027 жылдары шығаруды көздеп отырғанын хабарлаған.
Өткен аптада Snap компаниясы Specs деп аталатын жаңа брендпен алтыншы буындағы көзілдіріктерді әзірлеп жатқандарын мәлімдеді. Жаңа құрылғы 2026 жылы шығады, кеңейтілген шынайылық технологияларын қолдайды және алдыңғы нұсқаларға қарағанда ықшам әрі жеңіл болады. Counterpoint бұл нарыққа кіруі мүмкін компаниялар ретінде Xiaomi, Samsung, Baidu және ByteDance-ті де атады.
Контекст
Meta-ның Reality Labs деп аталатын бөлімшесі смарт-көзілдіріктерді әзірлеп, шығару жұмыстарымен айналысады. Компанияның соңғы тоқсандық есебінде бұл бағыттағы табыс 412 миллион долларды құрағаны, ал операциялық шығын 4,2 миллиард долларға жеткені көрсетілген. Meta бұл саланы табысты ету жолдарын іздеуде және соның аясында Пентагонға арналған жасанды интеллекті бар тактикалық дулыға әзірлеуді де қарастырып отыр.
