Meta Еуроодақпен қақтығыста: Facebook пен Instagram заңсыз контент үшін айыпталуда
Еуропалық Одақ америкалық Meta Platforms компаниясын (Facebook және Instagram иесі) заңсыз контентті өңдеу жүйесінде тәртіп бұзды деп айыптады, деп хабарлайды The Wall Street Journal. Бұл — ЕО-ның онлайн-контентті реттеуге арналған басты құжаты — Цифрлық қызметтер туралы акті (Digital Services Act, DSA) аясындағы Meta-ға тағылған алғашқы осындай айып.
Негізгі талаптар
Еуропалық комиссияның мәлімдеуінше Meta пайдаланушыларға заңсыз контент туралы хабарлаудың жеңіл тәсілін ұсынбайды, сондай-ақ жарияланымдар жойылған немесе аккаунттар бұғатталған жағдайда шағым беруге арналған құралдар жеткіліксіз.
Бұл заңды бұзу компанияның жылдық жаһандық табысының 6%-ына дейін айыппұл салуға әкелуі мүмкін, деп жазады WSJ.
Айыптаулар АҚШ президенті Дональд Трамп әкімшілігінің наразылығын тудыруы ықтимал. Бұған дейін Ақ үй ЕО-ның цифрлық регламенттері америкалық технологиялық алпауыттарға әділетсіз бағытталғанын және еуропалықтар америкалықтарды цензураға алғысы келетінін мәлімдеген болатын.
Компания болса айыптаулармен келіспейтінін және Еурокомиссиямен келіссөздерді жалғастырып жатқанын хабарлады.
«Біз DSA талаптарын бұзған жоқпыз деп есептейміз және жаңа заң күшіне енген сәттен бастап контент модерациясы мен шағымдану процестерін жетілдірдік», — деді Bloomberg-ке Meta өкілі.
Meta акциялары 24 қазан күні премаркет саудасында 0,5% өсті. Жыл басынан бері компанияның бағалы қағаздары 25%-дан астамға қымбаттаған.
Айта кетейік, сол күні Еуропалық комиссия қытайлық ByteDance (TikTok) компаниясына да ұқсас заң бұзушылықтар бойынша шағым түсірді.
