Micron акциялары қымбаттады. Бәсекелесі чиптерге сұраныстың «суперциклін» болжады
Micron Technology компаниясының акциялары премаркетте қымбаттап кетті. Бұған Оңтүстік Кореялық SK Hynix компаниясының мәлімдемесі себеп болды. Олар жасанды интеллектке салынған инвестициялар аясында жад чиптеріне сұраныстың «суперциклінің» басталатынын айтты. Micron акциялары жыл басынан бері 160 пайыздан астам өскеніне қарамастан, сарапшылар акция бағасының әлі де өсетініне сенімді. Олар ЖИ-дің кеңінен қолданылуы мен өндірушілердің шектеулі мүмкіндіктері жад бағасын әрі қарай көтереді деп болжап отыр.
Егжей-тегжейі
Micron акциялары 29 қазанда премаркетте 3,6 пайызға өсті. Бұл SK Hynix компаниясының болжамынан кейін орын алды. SK Hynix – бұл нарықтағы Micron-ның ең ірі бәсекелесі әрі Nvidia компаниясының басты жеткізушілерінің бірі. Компания жасанды интеллектке сұраныстың артуына байланысты чиптерге деген қызығушылық күшейеді деп отыр. Биыл Micron акциялары 164 пайызға өсті.
SK Hynix келесі жылға арналған өндірістік қуатының барлығы сатылып кеткенін хабарлады. Компанияның айтуынша, ЖИ үшін чиптерге сұраныс күрт артқандықтан дәстүрлі DRAM жадының өндірісі шектеулі болады.
«DRAM жетіспеушілігі ұзаққа созылатын суперциклді қолдайды. Себебі өндіріс сұраныстан артта қалып жатыр», – деді компанияның DRAM маркетинг бөлімінің басшысы Ким Кю-хён.
Сонымен қатар, 29 қазанда SK Hynix 8 миллиард доллар көлемінде рекордтық операциялық табыс туралы хабарлады. Бұл өткен жылмен салыстырғанда 62 пайызға жоғары. Компанияның жалпы табысы 40 пайызға артқан.
Micron 2026 жылдың 30 қарашасында аяқталатын алғашқы қаржылық тоқсан нәтижелерін 17 желтоқсанда жариялайды.
Бұл нені білдіреді?
Micron мен SK Hynix — жоғары өткізу мүмкіндігі бар жад чиптерін (HBM) шығаратын санаулы компаниялардың қатарында. Бұл чиптер — жасанды интеллектке арналған негізгі компоненттердің бірі. Micron-ның соңғы өнімдерінің бірі — HBM3e чипі. Бұл қазіргі уақытта жоғары сұранысқа ие Nvidia Blackwell графикалық процессорларында қолданылып жатыр.
Аналитиктер не дейді?
Citigroup сарапшысы Кристофер Дэнли осы аптада Micron акцияларының мақсатты бағасын 25 доллар қосып, 275 долларға дейін көтерді. Бұл 28 қазандағы жабылу бағасына қарағанда 24 пайыздық өсімді білдіреді. Сарапшы DRAM чиптерінің бағасы тоқсан ішінде соңғы отыз жылда болмаған қарқынмен өседі деп болжайды. Бұған ЖИ-ге сұраныс пен шектеулі өндірістік қуаттар себеп болады. Ол Micron-ның табысы шамамен 20 пайызға артуы мүмкін деп отыр.
28 қазанда Mizuho да Micron акцияларының мақсатты бағасын 240 доллардан 265 долларға дейін көтеріп, «сатып алуға ұсынылады» деген рейтингін сақтап қалды. Бұл 19,4 пайыздық өсімді білдіреді.
Компания акцияларын бақылап отырған 39 сарапшының 33-і оларды сатып алуға кеңес береді. Бесеуі бейтарап ұстанымда, ал біреуі ғана сатуға кеңес берген.
