Таңғы шолу: Meta мен Micron-ның жаңа мегажобалары және $300 трлн қателік

Meta Platforms тарихтағы ең ірі жеке инвестициялық мәміле жасауға дайындалып жатыр — компания Луизиана штатында Hyperion деректер орталығын салу үшін шамамен $30 млрд тартпақ.

Сонымен қатар Нью-Йорк штаты Micron компаниясының $100 млрд тұратын чип зауытына арналған жоғары кернеулі электр желісін салуға рұқсат берді.

Осы және басқа маңызды жаңалықтар — 17 қазан таңындағы қысқаша шолуда.

Meta $30 млрд тартып, ең ірі деректер орталығын салмақ

Марк Цукербергтің Meta Platforms компаниясы тарихтағы ең үлкен жеке капитал қатысқан мәмілені жасамақ — Луизиана штатындағы Hyperion деректер орталығын салуға $30 млрд тарту жоспарлануда, деп хабарлайды Bloomberg.

Жоба Blue Owl Capital компаниясымен бірлесіп іске асады, ал Meta жобада 20% үлесін ғана сақтайды.

Morgan Stanley $27 млрд қарыз және $2,5 млрд үлестік қаржыландыруды арнайы SPV құрылымы арқылы ұйымдастырды. Бұл тәсіл компанияның балансында қарыз ретінде көрінбейді.

SPV — активтердің иесі әрі қарыз алушы ретінде әрекет етеді, ал Meta жобаның әзірлеушісі, операторы және жалға алушысы болады.

Орталықтың іске қосылуы 2029 жылға жоспарланған.

Мұндай схема технологиялық компанияларға инфрақұрылымды кредиттік рейтингке әсер етпей салуға, ал инвесторларға инвестициялық деңгейдегі физикалық активтерге қаржы салуға мүмкіндік береді.

Hyperion кешені Meta-ның 29 деректер орталығының ішіндегі ең ірісі болмақ: аумағы — 4 млн шаршы фут, қуаты — 5 ГВт, яғни шамамен 4 млн үйді жарықпен қамтамасыз етуге тең.

Сонымен бірге Meta Техас пен Огайо штаттарында да осындай жобаларды дамытып жатыр.

Micron зауытына арналған $100 млрд инфрақұрылым жобасы бекітілді

Нью-Йорк штатының коммуналдық қызметтер комиссиясы жаңа жер асты электр желісін салуға рұқсат берді. Ол Clay қосалқы станциясын болашақтағы Micron Technology зауытымен (Онайда округі) байланыстырады, деп хабарлайды Reuters.

Бұл туралы штат губернаторы Кэти Хоукл мәлімдеді.

Ұзындығы екі миль болатын, 345 киловольттық желі жобаның негізгі бөлігі саналады.

Бұл — штат тарихындағы ең ірі жеке инвестиция, жалпы құны $100 млрд.

Жоба 20 жыл ішінде 50 000-нан астам жұмыс орнын, оның ішінде Micron-да тікелей 9000 орынды ашуы тиіс.

Рұқсат жобаның бірінші кезеңіндегі экологиялық және құрылыс жоспарларын да қамтиды: Clay станциясын кеңейту және оны зауытқа қосу.

Өндіріс 2030 жылға қарай іске қосылады деп жоспарланып отыр. Micron сол уақытта АҚШ-тағы барлық чиптердің төрттен бірін шығару мақсатын қойып отыр.

Paxos $300 трлн стейблкоинді қате шығарып алды

PayPal-дың блокчейн серіктесі Paxos техникалық қате салдарынан $300 трлн PYUSD стейблкоинін кездейсоқ шығарып жіберді, деп хабарлайды CNBC.

Бұл транзакция Etherscan платформасында байқалып, компания мәселені тез анықтап, артық токендерді жойды. Paxos атап өтті: «Бұзу әрекеті болған жоқ, клиенттердің қаражаты қауіпсіз».

Қате ішкі аударым кезінде туындап, 20 минут ішінде түзетілді.

PYUSD — толықтай доллар, қазынашылық облигациялар және қолма-қол баламалармен қамтамасыз етілген стейблкоин. Ол 1:1 қатынасында АҚШ долларына айырбасталады.

Оқиға PYUSD тұрақтылығы оның смарт-келісімінен емес, PayPal беделі мен сыртқы аудитке деген сенімнен туындайтынын көрсетті, дейді CNBC.

Қазір PYUSD — әлемдегі алтыншы ірі стейблкоин, оның нарықтық капитализациясы $2,6 млрд-тан асады.

АҚШ-тың бюджет тапшылығы $1,78 трлн-ға дейін қысқарды

АҚШ Қаржы министрлігі хабарлағандай, 2025 қаржы жылында бюджет тапшылығы $41 млрд-қа азайып, $1,775 трлн болды. Бұл 2022 жылдан бергі алғаш рет төмендеу.

Бұл ретте мемлекеттік шығындар рекордтық $7,01 трлн-ға жетті.

Тапшылықтың азаюына басты себеп — кедендік түсімдердің $195 млрд-қа дейін өсуі. Бұл өткен жылмен салыстырғанда $118 млрд көп, себебі Дональд Трамп енгізген жаңа кедендік баждар өз әсерін көрсетті.

Бюджет кірістері $5,235 трлн болып, жылына 6% өсті.

Қыркүйекте — әдетте корпоративтік салық төлемдері есебінен профицит болатын айда — $198 млрд артық табыс тіркелді, бұл өткен жылмен салыстырғанда 147% жоғары, деп жазады Reuters.

Шығындар қысқаруы негізінен Білім министрлігінің бюджетін $233 млрд-қа азайтудан болды. Бұл өсіп келе жатқан әлеуметтік төлемдер, Medicare мен Medicaid бағдарламалары және қарыз қызметі шығындарын біршама теңестірді.

Қарызға қызмет көрсету көлемі $1,216 трлн-ға жетті — бұл Social Security бағдарламасынан кейінгі екінші ең ірі шығын бабы.

Нарықтағы жағдай