Micron акциясы 190% шарықтады. Morgan Stanley неге тағы 33% өсім күтеді?
Morgan Stanley жартылай өткізгіштер өндірушісі Micron акциясына қатысты «нарықтан жоғары» (Overweight) рейтингін сақтап, компанияның пайдасы бұрын жетпеген жаңа максимумдарға жетуі мүмкін екенін білдірді, деп жазды CNBC.
Банк Micron акциясы жыл басынан бері 191% қымбаттағанына қарамастан, мақсатты бағасын $220-дан $325-ға дейін көтерді. Бұл — қағаздың ағымдағы деңгейден тағы шамамен 33% өсуі мүмкін екенін білдіреді. Банк сарапшысы Джозеф Мур Micron-ды ең тартымды инвестициялық идеялардың бірі деп атады.
13 қарашадағы саудада Micron акциясы 1,5% төмендеді.
Неліктен Morgan Stanley Micron акциясының өсуін күтеді?
Мур DRAM жадындағы тапшылықты Micron акциясын «беймәлім аймаққа» шығарып, компанияның пайдасын жаңа максимумдарға көтеріп тұрған негізгі фактор ретінде атады. Оның айтуынша, бағалау Micron-ның ағымдағы құнынан гөрі, қысқа мерзімді перспективада компания бойынша болжамдардың айтарлықтай жоғары бағытта қайта қаралу әлеуетіне көбірек негізделген, деп жазды CNBC.
«Біз компанияның рейтингін Overweight деңгейіне көтергенімізге бір айдан сәл асқан уақытта, DRAM жедел жадының спот бағасы үш есеге өсті. Тарихи тұрғыдан қарасақ, мұндай баға қозғалысын табу үшін, мүмкін, 1990-жылдардағы циклдерге қайта оралу керек болар еді. Сондықтан, тапшылықтың деңгейі (сатып алушылар арасындағы байланыстарымыздың айтуынша) 2018 жылды көбірек еске түсіргенімен, сол кезде Micron циклге пайдасы нөлге жуық деңгейде кірген болатын, ал бүгінде пайда рекордтық деңгейде», — деп жазды Мур.
Оның пікірінше, Micron акциясы компанияның шын мәнінде қол жеткізе алатын өсімін толық көрсетіп тұрған жоқ. «ЖИ төңірегіндегі жалпы көңіл-күй оң қозғалысты болжайды, бірақ әлі де белгілі бір алаңдаушылық бар. Біз бұл тарихта пайда өсімінен бөлек, қосымша энтузиазмға орын бар деп ойлаймыз», — деп жазды Morgan Stanley сарапшысы.
Жалпы бағалауына сүйенсек, Мур бірінші және екінші тоқсанда бағалар 15–20% өседі деп күтеді. Алайда бағаны алдын ала белгілемеген сатып алушылар әлдеқайда жоғары транзакцияларға тап болуы мүмкін — яғни осы келісімшарттардан 50% және одан да қымбатқа.
Сарапшылар пікірі
Қараша айының басында Arete Micron Technology акциясының мақсатты бағасын $230-дан $280-ға дейін көтеріп, сатып алу (Buy) рейтингін сақтады. Оның таргеті акцияның 14% өсу әлеуетін білдіреді. Wells Fargo да компания қағазы бойынша Overweight рейтингін сақтап, мақсатты бағасын $220-дан $300-ға дейін көтерді. Бұл бағалау акцияның 22% өсуін білдіреді.
Micron қағазына баға берген 39 сарапшының 33-і оны сатып алуға кеңес берді. Бейтарап — 5, Сатуға — 1 сарапшы кеңес берді.
