Micron акциясы биыл 170% қымбаттады. Неліктен сарапшы тағы 30% өсім күтеді?
Needham сарапшысы Micron Technology акциясына мақсатты бағаны компанияның 17 желтоқсанда жарияланатын тоқсандық есебі алдында $200-дан $300-ға дейін көтерді, деп хабарлады Barron’s. Жад микросхемаларын өндіруші 2025 жылы ең үздік нәтижелердің бірін көрсетті: акциясы 175% қымбаттады, ал Nasdaq Composite индексі осы кезеңде небәрі 19% өсті.
Егжей-тегжейлі
Needham сарапшысы Куинн Болтон Micron Technology акциясына мақсатты бағаны $200-дан $300-ға дейін көтерді. Бұл ағымдағы деңгейден 30% өсу әлеуетін білдіреді және сарапшы акцияға сатып алу кеңесін растады, деп хабарлады Barron’s. Оның айтуынша, жад чиптеріне бағаның өсуі алдағы бірнеше тоқсан бойы жалғасып, Micron акциясына оң әсер етеді.
«Дата-орталықтар нарығында сұраныс тұрақты болып отыр. Біз спот-нарықтағы бағаның күрт өсуі алдағы бірнеше тоқсанда келісімшарттық бағалардың да көтерілуіне әкеледі деп күтеміз», — деп жазды сарапшы.
Болтонның айтуынша, Micron-ның бірінші қаржы жылындағы тоқсанында жад микросхемаларының орташа бағасы өткен жылдың осы кезеңімен салыстырғанда 162% өскен. Сарапшы жақын уақытта жад микросхемаларының ұсынысы шектеулі күйінде қалады деп күтеді, өйткені ірі өндірушілер өндірісті айтарлықтай арттыра алмайды. «Саладағы сұраныс пен ұсыныс арақатынасы одан әрі қатаңдап келеді, ал 2026 қаржы жылында жағдайдың жақсаруы күтілмейді», — деп атап өтті Болтон.
17 желтоқсандағы сауда ашылған кезде Micron акциясы 1,4% өсіп, $232,51-дан $235,76-ға дейін көтерілді.
Бұл неге маңызды?
Micron үстел компьютерлері мен серверлерде қолданылатын динамикалық жедел жады (DRAM), сондай-ақ смартфондар мен қатқыл жинақтағыштарда пайдаланылатын флэш-жад (NAND) өндіретін әлемдегі ең ірі компаниялардың қатарына кіреді.
Bloomberg атап өткендей, жасанды интеллект трендінен пайда көріп отырған көптеген компаниялармен салыстырғанда, Micron-ның бағалануы салыстырмалы түрде төмен. Биылғы өсімді ескергеннің өзінде, компания акциясы алдағы 12 айға болжанған пайдасынан 11 есе жоғары бағалап отыр. Bloomberg дерегінше, бұл — ірі чип өндірушілер арасындағы ең төмен мультипликаторлардың бірі.
TrendForce деректеріне сәйкес, DRAM және NAND жад нарығын жаһандық деңгейде Samsung, SK Hynix және Micron бақылап отыр. Бұл үштікте Micron шамамен 20–26% үлеспен үшінші орында. Сонымен қатар, компания жоғары өткізу қабілетті жады (HBM) сегментіндегі позициясын жылдам күшейтіп, жасанды интеллект серверлеріне арналған шешімдердің негізгі жеткізушілерінің бірі болуды көздеп отыр.
Контекст
Needham сарапшысының Micron акциясына мақсатты бағаны көтеруі компанияның 17 желтоқсанда сауда жабылғаннан кейін жарияланатын тоқсандық есебі қарсаңында болды.
Күтулер жоғары. Bloomberg түсіндіргендей, ЖИ секторының болашағына қатысты инвесторлар скептицизмі күшейіп, әсіресе Oracle мен Broadcom компанияларының нарықты көңілден шығармаған қаржылық көрсеткіштерінен кейін Micron-ға қысым артып отыр. «Компания [Micron] өсу қарқынын үдете түсуін жалғастыруы тиіс. Егер баяулау байқалса, бұл акция үшін өте ауыр соққы болуы мүмкін», — деді Navellier & Associates басшысы Луис Навельер агенттікке.
Micron нарықтық капитализациясы биыл 176% өсті, бұл S&P 500 индексіндегі бесінші ең жақсы нәтиже, деп есептеді Bloomberg. Осылайша компания 2013 жылдан бергі ең табысты жылына жақындап келеді. Алайда, 10 желтоқсандағы шегіне жеткеннен кейін Micron акциясы төмендей бастады: соңғы төрт күнде 12% жоғалтты. Bloomberg атап өткендей, тоқсандық есеп өсім серпінін қайтара да, төмендеуді күшейте де алады.
Уолл-стритте қарашада аяқталған тоқсан бойынша Micron табысы $12,9 млрд болады деп күтіледі, ал түзетілген бір акцияға шаққандағы пайда $3,96 деңгейінде бағаланып отыр. Ағымдағы тоқсанда компания табысы $14,3 млрд, ал бір акцияға шаққандағы пайда $4,78 болады деген болжам бар, деп хабарлады Barron’s.
MarketWatch деректеріне сәйкес, Micron акциясын қадағалап отырған сарапшылардың көбі сатып алуға кеңес берді. Сатып алуға — 37, ұстап тұруға — 2, ал сатуға — 1 сарапшы кеңес берді.
