Moody’s Kraft Heinz рейтингін қайта қарауда
Kraft Heinz компаниясының бизнесін бөлу туралы жоспары Moody’s агенттігінің оның несие рейтингін төмендету мүмкіндігімен қайта қарауына түрткі болды. Компанияның акциялары бір күн ішінде 7%-ға арзандағанымен, кәсіби инвесторлар оларды әлі де тартымды деп санамай отыр.
Егжей-тегжейлі
Moody’s агенттігі 2 қыркүйекте Kraft Heinz компаниясының бірінші кезекте өтелуге жататын қамтамасыз етілмеген қарыз міндеттемелері мен коммерциялық қағаздарына қатысты рейтингтерді қайта қарауға шешім қабылдады. Қамтамасыз етілмеген міндеттемелердің қазіргі рейтингі — Baa2, ал коммерциялық қағаздардікі — Prime-2 деңгейінде. Агенттік Kraft Heinz-тің барлық құрылымдары бойынша болжамды «тұрақтыдан» — «қайта қаралуда» деген күйге өзгертті.
Moody’s компанияны екі тәуелсіз активке бөлу туралы жақында жарияланған жоспардан туындайтын әлеуетті пайдалар мен тәуекелдерді бағаламақ. Бұл активтер шартты түрде North American Grocery (Oscar Mayer шұжықтары мен хот-догтары, Kraft Singles ірімшігі, Lunchables снэктері) және Global Taste Elevation (Heinz тұздықтары, Philadelphia ірімшігі, Kraft Mac & Cheese макарон өнімдері) деп аталады. Мұндай бөліну өз сегменттеріне көбірек шоғырлануға мүмкіндік беруі мүмкін, бірақ екі компания да «негізгі нарықтарында жетілу деңгейі жоғары болғанымен, тұтынушылар шығындарын азайтып жатқан кезеңде» жұмыс істейтін болады, деп атап өтті агенттік.
Moody’s мәлімдемесінде: агенттік «бөліну процесін іске асыру тәуекелдерін, Taste Elevation және NA Grocery бизнесінің операциялық келешегін, сондай-ақ екі компанияның жоспарланып отырған капитал құрылымы мен қаржылық саясатын» да зерттейтін болады, делінген.
Kraft пен Heinz бірігуі неге сәтсіз болды
Kraft пен Heinz бірігуінің бастауы 2013 жылдан алады. Сол кезде миллиардер инвестор Уоррен Баффет бразилиялық 3G Capital инвестициялық компаниясымен бірігіп, HJ Heinz компаниясын сатып алған болатын. 23 миллиард долларлық мәміле азық-түлік индустриясы тарихындағы ең ірі келісімдердің бірі болды.
Ал сол кезде Kraft Foods серіктес іздеп жүрген. 2011 жылы ол өз снэк-бизнесін бөліп шығарып, оны Mondelez International деп атады. 2015 жылы Баффет пен 3G Heinz бен Kraft-ты біріктіруге шешім қабылдады. Осылайша, жылдық табысы 28 миллиард доллар болатын әлемдегі бесінші ірі азық-түлік өндіруші құрылды.
Идея – ауқым арқылы табыстылықты арттыру болатын. Ол кезде «қаншалықты ірі холдинг болса, бухгалтерия сияқты қызметтерден соншалықты үнемдеуге болады» деген пікір үстемдік етті, деп еске алды Батыс Мичиган университетінің экономисі Рассел Званка Associated Press-пен сұхбатында. Алайда, салауатты тамақтану тренді бұл жоспардың жүзеге асуын қиындатты — тұтынушылар Kraft сататын жоғары өңделген өнімдерден бас тарта бастады. Ал жасанды хош иістендіргіштер мен бояғыштарды алып тастауға бағытталған Kraft Heinz-тің талпыныстары қосымша шығындарға әкеліп, сату көлемін елеулі түрде арттырған жоқ.
Соның салдарынан бұл компания соңғы онжылдықтағы саладағы ең нашар ойыншылардың қатарына енді, деп жазады Barron’s. 2025 жылға арналған компанияның болжамды табысы – 25 миллиард доллар, бұл 2016 жылғы 26 миллиард доллардан төмен. Ал бір акцияға шаққандағы болжамды пайда – 2,6 доллар, бұл 2016 жылғы 3,4 доллардан аз.
Акциялардың жағдайы
Kraft Heinz акциялары, басқа да көптеген азық-түлік өндірушілер сияқты, төмен бағамен саудалануда — 2025 жылғы болжамды табыстың 10 есесі шамасында, деп атап өтті Barron’s. Сонымен қатар, дивидендтік кірістілік шамамен 6% деңгейінде — бұл S&P 500 индексіндегі ең жоғары көрсеткіштердің бірі. Бөліну туралы хабарлай отырып, Kraft Heinz қазіргі дивидендтер деңгейін «жалпы алғанда» сақтайтынын уәде етті.
Crossmark Global Investments компаниясының бас нарықтық стратегi Виктория Фернандес 2 қыркүйекте Yahoo Finance-ке берген сұхбатында Kraft Heinz акциялары бір күнде 7%-ға арзандағанына қарамастан, PepsiCo компаниясына инвестиция салғанды жөн көретінін айтты. Оның пікірінше арықтататын дәрілердің танымалдығы PepsiCo-ға да әсер еткенімен, компанияға активист-инвестор Elliott Management-тің келуі өзгерістерге серпін беріп, Coca-Cola-дан қалып қоюды азайтуы мүмкін. Бұдан бөлек, PepsiCo-ның энергетикалық сусындар сияқты басқа да өсім нүктелері бар — тұтынушылардың талғамы дәл осы сегментке ауысуда, деп толықтырды ол.
