Morgan Stanley Dell акциясының рейтингін күрт нашарлатып, сатуға кеңес берді
Morgan Stanley дербес компьютерлер өндірушісі және AI-серверлер жинаушы Dell компаниясының акциясына қатысты рейтингті күрт нашарлатып жіберді, деп хабарлады CNBC. Банк бұрынғы «нарықтан жоғары» (Overweight) рейтингінен бас тартып, бұл қағазды сатып алуды ұсынуды тоқтатты және бірден «нарықтан төмен» (Underweight) рейтингіне түсірді – яғни сатуға кеңес берді. Инвестбанк бейтарап рейтингті мүлде айналып өткені – сирек кездесетін қадам.
Morgan Stanley сарапшылары Dell акциясының мақсатты бағасын $144-дан $110-ға дейін төмендетті. Бұл баға 14 қараша, жұма күнгі сауда жабылудан шамамен 18% төмендеуді білдіреді.
Банктің аға зерттеу директоры Эрик Вудрингтің айтуынша, Dell — шығындардың өсуіне ең осал компаниялардың бірі, себебі DRAM жедел жад чиптері мен NAND твердотелді қоймалары қымбаттап жатыр. Сарапшының бағалауынша, бұл факторлар алдағы 12–18 айда компанияның маржасына қысым жасайды және Dell бағаларының одан әрі төмендеуіне әкелуі мүмкін.
«Бұл маңызды, себебі тарихи тұрғыдан қарағанда маржасы төмендеген компаниялар, өсім қарқыны ұқсас, бірақ маржасы тұрақты немесе өсіп келе жатқан ойыншыларға қарағанда әлдеқайда нашар динамика көрсетеді, — деп атап өтті Вудринг. — Біздің талдауымыз DRAM/NAND бағасының өсуі мен Dell-дің жалпы маржасы арасында күшті теріс корреляция бар екенін көрсетеді. Әсіресе жад компанияның үш негізгі өнім сегментінің өзіндік құны құрылымында 25%-дан 70%-ға дейін үлес алатынын ескерсек».
Morgan Stanley рейтингті төмендеткеннен кейін Dell акциясы 7,9% құлдырады. Жыл басынан бері компанияның құны 16% өскен.
Уолл-стрит Dell перспективасын әлі оң бағалайды: қағазды 26 сарапшы қадағалайды. Сатып алуға кеңес беретіндер — 21 сарапшы, деп жазды CNBC LSEG дерегіне сілтеме жасап.
