Morgan Stanley: Kraft Heinz акциялары құлдыраудың шегіне жетті
Morgan Stanley азық-түлік алыбы Kraft Heinz акцияларын сату жөніндегі ұсынысынан бас тартты. Енді банк бейтарап ұстанымда және шамамен 12 пайыздық өсім күтіп отыр. Сарапшылардың айтуынша, компания қағаздары үшін ең ауыр кезең артта қалды, ал бизнесті екі бөлек бағытқа бөлу ұзақ мерзімді перспективада оң әсер беруі мүмкін. Дегенмен, басқа сарапшылар бұл көзқараспен келіспейді: кейбірі акциялардың бағасын төмендетіп, компанияның басты акционері Уоррен Баффет те бөлуге қатысты қанағаттанбағанын айтты.
Егжей-тегжейі
Morgan Stanley сарапшысы Меган Клапп Kraft Heinz акцияларының рейтингін Underweight-тен (сату ұсынысы) Equal Weight-ке (ұстау ұсынысы) көтерді. Сонымен қатар, мақсатты бағасын 28 доллардан 29 долларға дейін арттырды. Бұл 2 қыркүйектегі жабылу бағасынан 11,5 пайызға өсу әлеуетін білдіреді. Оның айтуынша, акцияларға қатысты ең жағымсыз сценарийлердің көбі жүзеге асып болды, болжамдар тұрақтанып келеді, ал операциялық маржа алғашқы тұрақтану белгілерін көрсетті. 2026 жылы қысым болуы мүмкін, бірақ компанияны бөлу тәуекелдерді азайтады.
Morgan Stanley бұл шешімді Kraft Heinz-тің екі бөлек бизнеске бөліну жоспарына байланысты жақсартты. Сарапшылардың ойынша, ұзақ мерзімде бұл қадам компанияның өсіміне ықпал етуі ықтимал.
Акциялар жағдайы
3 қыркүйектегі саудада Kraft Heinz қағаздары 3,5 пайызға өсіп, 26,9 долларға жетті. Дегенмен, жыл басынан бері компанияның нарықтық құны 12 пайыздан астам төмендеді. Ал негізгі АҚШ индексі S&P 500 осы кезеңде шамамен 9 пайызға өскен.
Басқа сарапшылар пікірі
Барлық Уолл-стрит сарапшылары Morgan Stanley сияқты оптимистік емес. Мысалы, BofA мен Wells Fargo мақсатты бағаны 29 доллардан 27 долларға дейін түсірді. BofA «сатудан төмен» рейтингін сақтаса, Wells Fargo «ұстау» деңгейін қалдырды. BofA-ның айтуынша, компанияның ең ірі акционері, 27,5 пайыз акцияға иелік ететін Уоррен Баффет бөлінуге көңілі толмайтынын ашық айтты. Бұл оның үлесін қысқартуы мүмкін деген алаңдаушылық туғызуда. Wells Fargo да «бөліну акционерлерге қосымша құн әкеле ме?» негізгі сұраққа бас қатырып отыр.
HSBC сарапшысы мақсатты бағасын 32 доллардан 29 долларға дейін төмендетті, Stifel – 30 доллардан 28 долларға дейін. Екеуі де бейтарап ұстаным (Hold) сақтап отыр. Stifel сарапшылары да Баффеттің Berkshire арқылы акция сату қаупін басты себеп ретінде атап өтті. Сондай-ақ, қысқа мерзімде компанияда өсімге түрткі болатын факторлар жоқ деді.
Moody’s агенттігі 2 қыркүйекте Kraft Heinz-тің несие рейтингін қайта қарауға шешім қабылдады. Агенттік компанияны бөлу жоспарынан туындайтын артықшылықтар мен тәуекелдерді бағаламақ.
Контекст
Kraft Heinz 2 қыркүйекте екі бөлек бағытқа бөлінетінін жариялады. Біріншісі ұзақ сақталатын өнімдерді (Heinz соустары, Philadelphia ірімшігі, Kraft Mac and Cheese), екіншісі ет өнімдері мен дайын асханалық тауарларды (Oscar Mayer, Lunchables, Kraft Singles) біріктіреді. Бұл қадам 2015 жылғы 46 млрд долларлық қосылудан кейінгі біріккен компанияны іс жүзінде қайта бөлу болып саналады.
Kraft пен Heinz-тің бірігуі Баффет пен 3G Capital бастамасымен жүзеге асқан еді. Жаңа компания әлемдегі бесінші ірі азық-түлік өндірушіге айналды. Бастапқыда тиімділік артады деп болжанғанымен, салауатты тамақтануға сұраныстың артуы өңделген өнімдердің сатылымын төмендетті. Ассортиментті жаңартуға кеткен шығын өсті, бірақ өсім әкелмеді. Соның салдарынан компанияның табысы азайды. 2016 жылы 26 млрд доллар болған түсім 2025 жылы 25 млрд доллар деңгейінде бағалануда, ал акцияға шаққандағы пайда 3,4 доллардан 2,6 долларға дейін түсті.
