Morgan Stanley: Oracle-дың қарыз тәуекелі үш жылдағы максимумда. Кеңесі қандай?
Oracle-дың қарыз тәуекел индексі соңғы үш жылдағы ең жоғары деңгейге көтерілді. Morgan Stanley бұны тек бастамасы деп бағалады. ЖИ жобаларын қаржыландыру және ауқымды дата-орталықтар салу үшін қарыз алу көлемі өсіп жатқандықтан, дефолттан сақтану қымбаттап, компанияның қағазына қысым күшейіп отыр. Сарапшылар не байқап отыр және инвесторларға қандай қадамдарды ұсынды?
Егжей-тегжейлі
Бұлтты технологиялар алыбы Oracle қарыз тәуекелінің индексі қараша айында соңғы үш жылдағы максимумға жетті, ал 2026 жылы жағдай одан әрі нашарлайды, деді Morgan Stanley. Бұл бағалауды Bloomberg жариялады.
Сарапшылардың айтуынша, өсіп келе жатқан қаржыландыру тапшылығы, міндеттемелерге толы баланс және технологиялық ескіру қаупі — Oracle компаниясы тап болып отырған жасырын қауіптердің бір бөлігі ғана.
Oracle қарызын дефолттан сақтандыру құны (credit default swaps — CDS) 25 қарашада ICE Data Services деректері бойынша жылына 1,25 пайыздық пунктке дейін көтерілді. Morgan Stanley сарапшыларының пікірінше, жақын уақытта CDS бағасы 1,5 пайыздық пункттен асып, тіпті 2 пайыздық пунктке жақындауы мүмкін, егер компания жаңа жылға дейін жасанды интеллектке салынатын инвестиция стратегиясын нақты түсіндіріп бермесе. ICE Data Services мәліметінше, 2008 жылы Oracle-дың CDS көрсеткіші рекордтық 1,98 пайыздық пунктке жеткен. Сарапшылар компания өз ЖИ-жобаларын қаржыландыру үшін шамадан тыс қарыз алып жатқандықтан, CDS бағасы бұл рекордты жаңартуы мүмкін деп ескертті. Осыған байланысты банктер мен инвесторлар тәуекелдерді белсенді түрде хеджирлеп жатыр, деп жазды Bloomberg.
Oracle өкілі агенттіктің түсініктеме беру туралы сұрауына жауап берген жоқ.
Morgan Stanley-ді сақтандырған не?
Oracle жасанды интеллектке инвестиция салу жарысына қатысып отырған компаниялардың бірі. Соның нәтижесінде бұл дата-орталықтар алыбы кредиттік нарықтағы ЖИ-тәуекелдердің барометіне айналды, деп жазды Bloomberg. Қыркүйекте компания АҚШ-тағы жоғары сапалы облигациялар нарығынан $18 млрд тартты. Ал қараша басында шамамен 20 банк тобы Oracle жалға алатын Нью-Мексикодағы дата-орталықтар кампусын салу үшін тағы шамамен $18 млрд көлемінде жобалық несие ұйымдастырды.
Банктер сондай-ақ Техас пен Висконсинде Vantage Data Centers салып жатқан, ал Oracle жалға алуды жоспарлап отырған дата-орталықтарды қаржыландыру үшін $38 млрд көлемінде бөлек несие пакетін дайындап жатыр. Morgan Stanley пікірінше, банктердің бұл құрылыс жобаларына қатысуы — Oracle-ды болашақ жалға алушы ретінде байланыстыру — компанияның CDS нарығындағы сауда белсенділігінің күрт өсуінің негізгі себептерінің бірі болуы мүмкін, әрі бұл үрдіс жалғасуы ықтимал.
«Соңғы екі айда Oracle жалға алатын нысандарға арналған құрылыс несиелері туралы басылымдарда айтылып жүрген мәліметтер қазіргі уақытта да, болашақта да хеджирлеудің негізгі драйверіне айналуы мүмкін екені айқынырақ болды», — деп жазды сарапшылар.
Олар бұған қоса мынадай тәуекел бар екенін айтты: банктер бұл несиелерді кейін басқа қатысушыларға қайта бөлсе, олардың кейбір хедждері алынып тасталуы мүмкін. Дегенмен, басқа инвесторлар да тәуекелдерді кейін хеджирлей бастауы ықтимал, ал құрылысқа қажетті қаржыландыру Vantage жобаларымен және Нью-Мексико нысанымен ғана шектелмейді.
Oracle қағазының ахуалы
Бұл қауіптер Oracle акциясына да қысым жасап отыр. 26 қарашаға қарай компанияның котировкасы қыркүйек басындағы шегінен 40% төмендеді. Сарапшылардың айтуынша, бұл жағдай компанияны алдағы есепте қаржыландыру жоспарын егжей-тегжейлі ашуға итермелеуі мүмкін — оған OpenAI-мен бірлескен жасанды интеллект инфрақұрылымын құруға арналған Stargate жобасы, дата-орталықтар және капиталдық шығындар туралы ақпарат кіреді.
Oracle-дың кредиттік деривативтері кең инвестициялық CDX индексімен салыстырғанда әлсіз динамика көрсетіп отыр, ал компанияның корпоративтік облигациялары да Bloomberg-тің жоғары сапалы қағаздар индексінен қалып келеді — бұған хеджирлеуге сұраныстың күрт артуы мен көңіл-күйдің нашарлауы себеп, деп жазады агенттік.
Бұған дейін сарапшылар инвесторларға «базистік мәміле» аясында Oracle облигацияларын және кредиттік дефолттық своптарды (CDS) қатар сатып алуды ұсынған — өйткені CDS спредтері облигациялар спредтерінен тезірек өседі деп күтілді. Енді олар ең тиімді стратегия — тікелей CDS сатып алу деп санайды.
«Сондықтан біз облигация сатып алу бөлігін жауып, тек CDS арқылы қорғау алу компонентін қалдырамыз. Қазір тек CDS-ке ставка жасау тиімдірек және спредтердің үлкен қозғалысын береді», — деп жазды олар.
Oracle акциясын 44 қадағалап отыр. Оның ішінде «сатып алуға» — 30, «ұстауға» —10, ал «сатуға» — 2 сарапшы кеңес берді.
