Мұнай нарығы қатаң артық ұсынысқа және $60-тан төмен бағаларға тап болады — Macquarie
Алдағы тоқсандарда мұнай бағасы барреліне $60-тан төмен түсуі мүмкін, себебі өндірістің өсуіне байланысты нарықта «қатаң артық ұсыныс» қалыптасады деп ескертті Macquarie Group. Қаржылық топ баға болжамын нашарлатып, мұнай нарығындағы тепе-теңдіктің қалпына келуі тек уақытты ғана емес, сонымен қатар бірқатар факторлардың жиынтығын талап ететінін мәлімдеді.
Егжей-тегжейлі
Macquarie енді 2026 жылы Солтүстік Америка мұнайы WTI-дың орташа бағасы барреліне шамамен $57 болады деп күтуде — бұған дейін $60 деп болжаған. Қазір барреліне шамамен $66 тұратын Brent келесі жылдың бірінші тоқсанында $57, екінші тоқсанында $59 шамасында саудаланбақ.
«Біз энергетика секторына қатысты іргелі түрде «аюлы» көзқарасты сақтап отырмыз», — делінген Bloomberg келтірген Macquarie-дің шикізат нарығына арналған тоқсандық шолуында. ОПЕК+ тарапынан және картельден тыс өндірушілерден мұнай жеткізілімдерінің өсуіне байланысты, Macquarie базалық сценарийде биылғы жылдың қалған айларында және келесі жылдың бірінші тоқсанында айтарлықтай профицит күтілетінін айтты.
Сауд Арабиясы әзірге мұнай ұсынысын арттыру саясатын жұмсартатынына ешқандай белгі көрсетіп отырған жоқ, ал мұндай бұрылыс болмаған жағдайда төмен бағалар ұзақ уақыт сақталады, деп ескертті Macquarie. «Нарықтағы тепе-теңдікті қалпына келтіру үшін төмен бағалардың (ОПЕК-тен тыс ұсыныс өсімін баяулататын), жеткізілімдегі іркілістердің, ОПЕК саясатының өзгерістерінің және уақыттың (сұраныстың артық ұсынысты сіңіруі үшін) үйлесімі қажет», — деді қаржылық топ.
Рекордтық профицит
Macquarie 2026 жылдың қаңтар–наурыз айларында әлемдік мұнай профициті тәулігіне 4,63 млн баррельді құрайды деп күтуде, ал кейінгі үш тоқсанда ол біртіндеп қысқарады. Осы арада қыркүйекте Халықаралық энергетикалық агенттік (ХЭА) 2026 жылы әлемдік мұнай ұсынысы орта есеппен сұраныстан тәулігіне 3,33 млн баррельге артық болады деп болжап, бұл жылдық рекордтық дисбаланс болатынын мәлімдеді.
Контекст
Эталондық Brent мұнайы ОПЕК+ нарық үлесін қайтару үшін өндіріс шектеулерін жылдам әлсіретіп жатқандықтан, қатарынан үшінші ай арзандауда. Картельге мүше елдердің өкілдері алдағы демалыс күндері қарашадағы өндіріс көлемін анықтау үшін кездесуі тиіс. Bloomberg-ке сұхбат берген делегаттардың бірі күн тәртібінде үш ай ішінде жеткізілімді тәулігіне 500 000 баррельге жеделдетіп арттыру мүмкіндігі тұрғанын айтты. Алайда, ОПЕК-тің өзінде мұндай жоспарлардың жоқтығы жеткізілді.
