Рождество қарсаңында АҚШ биржаларындағы негізгі сауда сессиясы әдеттегіден үш сағат ерте аяқталады. Нарықта маңызды жаңалықтар аз болады, сондықтан сауда салыстырмалы түрде тыныш өтеді деп күтіледі. Инвесторлардың негізгі назары апта сайын жарияланатын жұмыссыздық бойынша жәрдемақыға өтінімдер санына ауады. Сарапшылардың болжамы бойынша алғашқы өтінімдер саны өткен аптадағыдай 224 мың деңгейінде қалады, ал қайталама өтінімдер 1,897 млн-нан 1,9 млн-ға дейін өседі. Бұл деректердің тұрақты болуы ФРЖ-ның алдағы қадамдарына қатысты күтулерді өзгертпей, нарықта айтарлықтай реакция тудырмайды.

Бүгін жеті жылдық қазынашылық облигацияларды орналастыру аукционы өтеді. Сұраныстың сапасы табыстылық қисығының қысқамерзімді бағытына әсер етуі мүмкін. Алайда базалық сценарийде сұраныс тұрақты болады деп күтіледі, сондықтан облигация табыстылықтарының күрт өсу қаупі төмен, бұл акциялар үшін жағымды фактор.

АҚШ индекс фьючерстері қазір нөлге жақын деңгейде қозғалып жатыр. Алдағы саудада тәуекелдер теңгерімді, құбылмалылық төмен болады деп бағалаймыз. S&P 500 индексі 6880–6940 пункт аралығында (-0,4% пен +0,4%) ауытқуы мүмкін.

Нарық назарындағы оқиғалар

— Ramaco Resources (METC) компаниясы алдағы екі жылда $100 млн-ға дейінгі акцияларды кері сатып алу бағдарламасын іске қосатынын хабарлады. Бұл жаңалықтан кейін акциялар 7%-ға өсті.

— Organogenesis Holdings (ORGO) акциялары құбылмалы болды. Себебі компания тізе остеоартритін емдеуге арналған ReNu препараты бойынша FDA-ға өтінімді кезең-кезеңімен тапсыра бастағанын мәлімдеді. Егер препарат мақұлданса, ол АҚШ-та осы санаттағы алғашқы операциясыз терапия болуы мүмкін.

— UiPath (PATH) акциялары компанияның S&P MidCap 400 индексіне қосылу жаңалығынан кейін шамамен 7%-ға қымбаттады. Индекске ену әдетте компанияға инвесторлар назарын арттырады.

Алдыңғы күнгі нарық

23 желтоқсанда АҚШ қор нарықтары негізінен өсіммен жабылды.

S&P 500 индексі 0,46%-ға өсіп, жабылу кезінде жаңа тарихи максимум орнатты. NASDAQ 100 – 0,5%-ға, Dow Jones – 0,16%-ға көтерілді. Ал Russell 2000 индексі 0,69%-ға төмендеді. Сұраныс негізінен ірі технологиялық компаниялардың акцияларына түсті. Энергетика секторы ең жақсы нәтиже көрсетті (+0,66%), ал күнделікті тұтыну тауарларын өндірушілер ең әлсіз болды (-0,48%). «Ғажайып жетіліктің» ішінде NVIDIA акциялары 3%-ға өсіп, негізгі үлес қосты.

Макроэкономикалық деректер

Жарияланған статистика аралас көрініс көрсетті. Үшінші тоқсанда АҚШ ЖІӨ-і жылдық есеппен 4,3%-ға өсті, бұл күтілген 3,3%-дан жоғары. Тұтынушылық шығындар да жақсы өсім көрсетті. Экспорттың артуы мен импорттың қысқаруы да ЖІӨ-ге оң әсер етті. Алайда бұл деректер үкіметтік шатдаунға байланысты кешігіп жарияланғандықтан, ФРЖ саясатына қатысты күтулерге ықпалы шектеулі болды.

Сонымен қатар, қазан айындағы ұзақ мерзімді тауарларға тапсырыстар 2,2%-ға төмендеді, ал желтоқсанда тұтынушылар сенімі индексі 89,1 пунктке дейін түсті. Бұл еңбек нарығындағы жағдайдың әлсіреп жатқанын көрсетеді.

Осының нәтижесінде нарық ФРЖ мөлшерлемені 2026 жылдың соңына дейін төмендету көлемін бұрынғыдан шамамен 10 базистік пунктке азайтып, 41 базистік пункт деңгейінде бағалай бастады.

Технологиялық сектор үшін жағымды жаңалық — АҚШ билігі Қытайдан әкелінетін жартылай өткізгіштерге тариф енгізуді 2027 жылдың жазына дейін кейінге қалдырды.

Компания жаңалықтары

— Sable Offshore (SOC) акциялары 36,3%-ға өсті: компания 2015 жылдан бері тоқтап тұрған Las Flores Pipeline жүйесін қайта іске қосуға рұқсат алды.

— ServiceNow (NOW) Armis компаниясын $7,75 млрд-қа сатып алу келісімін растады.

— Asana (ASAN) операциялық директоры Энн Раймонди 160 мыңнан астам акция сатқанын жариялады.

— Viking Therapeutics (VKTX) акциялары Novo Nordisk-тің салмақ азайтатын ауызша препараты мақұлданғаны туралы жаңалықтан кейін 2,9%-ға өсті.

#S&P 500