Нарық ФРЖ саясатының өзгеруін күтуде. «Облигация королі» қандай инвестицияны ұсынды?
Қор нарығы ФРЖ-ның ақша-несие саясатын жұмсартуын күтіп отыр, доллар әлсіреп, ал алтын қымбаттап келеді. DoubleLine Capital инвестициялық компаниясының негізін қалаушы, «облигациялар королі» ретінде танымал инвестор Джеффри Гандлах ФРЖ саясатының бағыты алдағы айларда өзгереді деп санайды. Оның пікірінше, инвесторларға табыс әкелетін активтер қандай?
Болжам: саясат жұмсаратыны анық
Гандлах CNBC телеарнасына берген сұхбатында 2025 жылы ФРЖ-ның кемінде екі рет пайыздық мөлшерлемені төмендететінін күтетіні туралы айтты. Бұл болжамын ол жыл басынан бері айтып жүрген, алайда 1 тамыздадағы күтпеген еңбек нарығының әлсіз есебінен кейін үшінші рет төмендету де болуы мүмкін екенін жоққа шығармады. Оның айтуынша, шілдеде жұмыс орындарының өсу қарқыны баяулағанын көрсеткен мәліметтер — нағыз «бомба» болған, ал көрсеткіштерді қайта қарау жағдайды күрт өзгертті.
1 тамызда шыққан есепте мамыр мен маусым айларындағы жұмыспен қамту өсімі төмендетіліп қайта қаралған — жаңа жұмыс орындары бұрынғы болжамнан бірнеше мыңға аз болған. Бұл — COVID кезеңін есепке алмағанда, 1979 жылдан бергі жұмыспен қамту деректеріне жасалған ең үлкен түзету болды.
Гандлахтың айтуынша, тамыз айының басында федералды қор мөлшерлемесі мен екі жылдық қазынашылық облигациялардың кірістілігі арасындағы алшақтық күрт өсіп, 70 базистік пунктке жеткен. «Бұл былтырғыдай аса күрделі жағдай емес, сол кезде екі жылдық облигациялардың кірістілігі ФРЖ мөлшерлемесінен 100 базистік пунктке төмен болған, бірақ 70 деген де тарихи өлшеммен үлкен көрсеткіш», — деді ол. Инвестордың сөзінше, егер келесі еңбек нарығы есебі де сондай әлсіз болса не тағы да төмен қарай қайта қаралса, ФРЖ мөлшерлемесін 50 базистік пунктке бірден төмендету мүмкіндігі туралы әңгімелер айтылып жатыр.
ФРЖ позициясына не әсер етеді?
Гандлахтың айтуынша, ФРЖ бағытының өзгеруіне әсер ететін негізгі факторлардың бірі — макроэкономикалық деректердің ауқымды қайта қаралуы. Ол сондай-ақ статистиканың сенімділігі төмендеп жатқанын атап өтті: «Бұрын CPI көрсеткішіндегі бағалардың шамамен 8%-ы бағалау арқылы алынатын — оларды енгізілген бағалар деп атайды. Қазір бұл үлес 35%-ды құрайды, бұл — күрт өсім. Демек, соңғы есептегі инфляцияны есептеу үшін қолданылған деректердің 35%-ы шын мәнінде ойдан шығарылған». Оның пікірінше, бұл елдегі экономикалық ахуалды нақты бағалауды қиындатады.
Гандлах инфляциялық тәуекелдер де біртіндеп өзекті болмай бара жатыр деп есептейді. Ол экономист Милтон Фридманның инфляция ең алдымен монетарлық құбылыс деген теориясына сілтеме жасайды. Импорт пен экспорт бағасының өсуі нысаналы деңгейден аспай отыр, ал M2 ақша массасы да алаңдатарлық белгі көрсетпейді. Оның айтуынша, доллардың әлсіреуі мен жаңа баж салығы ақша ұсынысы артпаса, инфляцияның тұрақты өсуіне себеп бола алмайды.
Инвесторлар не істеуі керек?
Гандлахтың пікірінше, мөлшерлеменің төмендеуі акциялар нарығына қолдау береді. Бұл облигациялармен болатын бәсекені азайтып, болашақ ақшалай ағындардың дисконтын төмендетеді, соның арқасында акцияларды бағалау жеңілдей түседі. DoubleLine компаниясының негізін қалаушы АҚШ-та да, халықаралық нарықтарда да өсім болатынын күтеді, әсіресе доллар әлсіреген жағдайда, бұл АҚШ-тан тыс активтердің кірістілігін арттырады.
Сонымен қатар, Гандлах ұзақ мерзімді қазынашылық облигациялар сегментінде ұстамды позиция ұстанады және бұл бағытта «аюлы» көзқараста. Ол кірістілік қисығының одан әрі тік көтерілуін болжайды: 2 және 30 жылдық облигациялардың кірістілігі арасындағы айырма 150 базистік пунктке дейін артуы мүмкін.
Гандлахтың негізгі инвестициялық идеяларының бірі — алтын. Оның айтуынша, бұл актив барлық көрсеткіштер бойынша ұтымды: мөлшерлемелердің төмендеуі, әлсіз доллар және техникалық жағдайдың қолайлығы. «Егер сіз алтын ұстап отырсаңыз, еш уайымдаудың қажеті жоқ», — деді ол.
