Nasdaq 2%-дан астам өсті: Nvidia есебі мен еңбек нарығы деректері раллиді бастады
20 қараша күні АҚШ-тағы үш ірі қор индексі сауда сессиясының басында күрт өсті. Бұған ЖИ чиптері нарығының көшбасшысы Nvidia-ның мықты есебі мен АҚШ-тағы қыркүйек айындағы жұмыс орындарына қатысты күткеннен жоғары көрсеткіштер себеп болды.
Егжей-тегжейі
– Технологиялық компаниялар көп шоғырланған Nasdaq Composite индексі Нью-Йорктегі биржалар ашылған бойда бірден 2%-ға көтерілді.
– S&P 500 индексі шамамен 1,6%-ға артты.
– Dow Jones («көк фишкалар» индексі) 1%-ға өсті.
– Nvidia акциялары сауда басталғанда 4,5%-ға қымбаттады.
– АҚШ Қаржы министрлігінің 2 жылдық облигацияларының кірістілігі 3,58%-ға, ал 10 жылдықтары 4,12%-ға дейін төмендеді (дереккөз: Barron's).
Сарапшылар не дейді?
Bloomberg жазуынша, ЖИ технологияларына байланысты оптимизм нарықты «өгіз көңіл-күйге» итермелеп, желтоқсандағы ФРЖ-ның мөлшерлемені төмендету үмітінің азаюын екінші орынға ысырып тастады.
Rosenberg Research сарапшысы Дэвид Розенбергтің айтуынша: «Nvidia — нарықты қозғай алатын сирек акциялардың бірі. Бұл компанияның нарықтық құны 5 трлн долларға жуық және S&P 500 индексінің 8%-ын құрайды. Олар табыс, пайда және болжам жағынан барлық үміттен асып түсті. Бұл соңғы апталардағы өсуге қатысты алаңдаушылықты басып тастады».
Muddy Waters Capital басшысы, танымал шорт-селлер Карсон Блок Bloomberg-ке берген сұхбатында: «ЖИ саласында көпіршік бар деген ескертулер көбейгенімен, АҚШ-тың ірі технологиялық компанияларына қарсы ойнауға болмайды. Nvidia немесе басқа ірі техкомпанияларды шортқа қою — ұзаққа бармайтын әрекет».
Resonate Wealth Partners компаниясының сарапшысы Александр Джулиано: «Жұмадағы жұмысқа орналасу есебі еңбек нарығы әлсіз емес екенін көрсетті. ЖИ тақырыбы өзектілігін сақтап отыр. Қараша басындағы түзету желтоқсандағы өсім мүмкіндігін арттырды» деп мәлімдеді (дереккөз: Bloomberg).
Контекст
19 қарашада Nvidia соңғы тоқсанда табыс пен пайда бойынша Уолл-стриттің күткенінен асып түскенін және келесі тоқсанға да мықты болжам жасап отырғанын хабарлады. Компанияның сатылымы 65%-ға өсіп, рекордтық 57,01 млрд долларға жетті. Алдағы тоқсандағы күтілетін табыс — 65 млрд доллар (қателік шегі ±2%). Тіпті ең төменгі көрсеткіштің өзі сарапшылар үмітінен жоғары.
20 қарашада АҚШ-тың Еңбек статистикасы бюросы ауыл шаруашылығына жатпайтын салаларда 119 мың жаңа жұмыс орны ашылғанын хабарлады. Бұл көрсеткіш Bloomberg жинаған 67 болжамның бәрінен жоғары болды. Осыдан кейін трейдерлер желтоқсандағы мөлшерлемені төмендету мүмкіндігін сәл арттырды — қазір бұл ықтималдылық 35,6% (CME FedWatch дерегі).
Goldman Sachs Asset Management өкілі Кей Хейгтің пікірінше, жұмыссыздық деңгейі жоғары болғандықтан, желтоқсанда мөлшерлемені төмендету әлі де мүмкін. Ал TradeStation сарапшысы Дэвид Рассел керісінше, қарашадағы жәрдемақыға өтініштер жақсы еңбек нарығын көрсетеді, сондықтан ФРЖ-да мөлшерлемені төмендетуге негіз аз дейді.
