Netflix есебі алдында сарапшы акцияны сатып алуға кеңес берді. Ол не күтеді?
Seaport Research Partners сарапшысы Netflix компаниясының акциясын «сатып алуға болады» деп бағалап, оның нарықтық құны тағы 19%-ға өсуі мүмкін екенін айтты. Сарапшылардың пікірінше, компания акцияларының өсуіне арзан жарнамалық тарифке деген қызығушылықтың артуы және көрермендер белсенділігінің тұрақты өсуі себеп болады. Netflix жарнамадан түсетін табысын биыл екі еселеп, 2030 жылға дейін $16 млрд-қа жеткізе алады деп болжануда.
Егжей-тегжейі
Barron’s мәліметінше, сарапшы Дэвид Джойс Netflix акциясының рейтингін «бейтараптан» (Neutral) «сатып алуға» (Buy) ауыстырып, мақсатты бағасын $1230-дан $1385-ке дейін көтерді. Бұл — 6 қазандағы жабылу бағасынан 19% жоғары. Оның айтуынша, соңғы уақытта тұрақсыз қозғалған Netflix акциялары жарнамалық тарифке қызығушылық артқан тұста қайта өсе бастайды. «Біз үшінші тоқсанның есебі жарияланбас бұрын, яғни 21 қазанға дейін акцияны сатып алуды ұсынамыз», — деді сарапшы.
Қазір Netflix теледидар көру нарығында тек Disney мен YouTube TV-ден кейінгі орында. Бұл платформаның жарнама арқылы табыс арттыруына мүмкіндік береді. Джойстың айтуынша, платформаның аудитория белсенділігі жоғары күйінде қалып отыр. Ал «Кальмар ойыны» сияқты танымал жобалар халықаралық көрерменді қызықтырып, контент шығындарын тиімді бөлуге көмектеседі. Бұл – компанияның маржасын арттырады.
Осы факторлар негізінде Seaport Netflix-тің жарнамадан түсетін табысы мен операциялық пайдасы бойынша болжамын көтерді. Сарапшының есебінше, жарнамалық табыс 2024 жылы $3,1 млрд-қа жетіп, 2030 жылға дейін $16 млрд-қа өседі. Бұл жылдық өсімнің орташа қарқыны 48% болатынын көрсетеді. Сонымен қатар, Netflix операциялық маржасы 2024 жылы 32%-дан асып, онжылдық соңына қарай 41%-ға жақындайды деп болжануда.
Акция бағасы қандай деңгейде?
8 қазандағы саудада Netflix акциялары 3,2%-ға өсіп, $1201-ге жетті. 2025 жылдың басынан бері компанияның нарықтық құны 33,5%-ға өсті. Салыстыру үшін: осы кезеңде АҚШ-тың басты индексі S&P 500 бар болғаны 14%-ға өскен.
Басқа сарапшылар не дейді?
8 қазанда BBA Securities Netflix акцияларын бақылауға алып, оларға «артық салмақ» (Overweight) рейтингі берді. Бұл – «сатып алу» дегенді білдіреді. Мақсатты баға — $1514, яғни акция бағасы тағы 30%-ға өсуі мүмкін. Бұған дейін, 3 қазанда Oppenheimer сарапшылары да акцияға оң көзқарасын сақтап, «нарықтан жоғары» (Outperform) рейтингін және $1425 мақсатты бағасын растаған. Олар үшін басты фактор — қолданушылар белсенділігі. «Үшінші тоқсанда көрілім уақыты жылдық есеппен 20%-ға артты. Бұл көрсеткіш алдағы уақытта да өсе береді, өйткені Netflix тікелей эфир бағытында да белсенді дамып жатыр», — деп жазды сарапшылар Investing.com-ға берген пікірінде.
MarketWatch дерегінше, 54 сарапшының 37-сі Netflix акциясын сатып алуға кеңес береді (Buy және Overweight рейтингтері). Тағы 15-і бейтарап көзқараста (Hold), тек 2 сарапшы ғана сатуға кеңес берген. Уолл-стрит сарапшыларының орташа мақсатты бағасы — $1373. Бұл 6 қазандағы жабылу бағасынан 18%-ға жоғары.
