Netflix акциялары екі есеге жуық қымбаттады. Пайданы тіркеу керек пе?
Соңғы 12 айда стриминг алпауыты Netflix-тің акциялары шамамен 100% шарықтап, инвесторларға S&P 500 компаниялары арасында ең жоғары кірістердің бірін әкелді. Алайда мұндай өсім акциялардың бағасын да қымбаттатып жіберді: баға мен болжамды пайданың арақатынасын көрсететін мультипликатор соңғы төрт жылдағы ең жоғары деңгейге жетті. Енді инвесторлар алдында екіұдай таңдау тұр: жоғары бағалауға қарамастан раллидің жалғасуына сеніп, ұстау ма, әлде пайданы тіркеу ме?
Егжей-тегжейлі
Маусымның соңғы үш сауда күнінде Netflix котировкалары тарихи максимумда жабылды, бірақ 1 шілдедегі саудада 3,4% қысқарды. Жыл басынан бері компанияның нарықтық құны 45% өсті, ал соңғы 12 айда екі есеге жуықтап, $550 млрд-қа жетті. Осылайша, Netflix Mastercard пен Exxon Mobil-ды басып озды. Bloomberg мәліметінше, инвесторлардың қызығушылығын жарнамадан түсетін табыстың өсуі, жазылым бағасының қымбаттауы және тарифтердің компанияға аз әсері арттырып отыр. Раллидің тағы бір себебі – Netflix акцияларын ұстаушылар қатарының күрт кеңеюі болды: Bank of America дерегінше, мамыр соңында ұзақ позиция ұстанатын қорлардың 49%-ы портфеліне Netflix акцияларын қосқан, ал 2016 жылы бұл көрсеткіш бар-жоғы 14% болған. Агенттіктің жазуынша, қазір Netflix институционалдық инвесторлар арасында ең танымал он технологиялық акцияның қатарына кіреді.
Мұндай өсімнің арқасында Netflix соңғы жылда S&P 500 компаниялары арасында ең жоғары кіріс әкелген көшбасшылардың біріне айналды, ал биыл Nasdaq 100 құрамында кіріс бойынша төртінші орынға шықты, деп жазады Bloomberg. Дегенмен бұл акциялардың болжамды табысқа шаққандағы бағасын көрсететін мультипликаторды 45-ке дейін көтерді – бұл 2021 жылдан бергі ең жоғары деңгей, сол кезде пандемия онлайн-видеоға сұранысты арттырған еді. Салыстыру үшін: Nvidia акцияларының мультипликаторы – 32, ал Nasdaq 100-дегі орташа көрсеткіш – 27. Мұндай жоғары баға тіпті оптимистік инвесторларды алаңдатуы мүмкін, өйткені күткен нәтижеден сәл ғана әлсіз есептің өзі түзетуді тудыруы ықтимал, деп түсіндіреді Bloomberg. Netflix қаржы нәтижелерін 17 шілдеде жариялайды. Агенттік болжамынша, 2025 жылы компанияның табысы 14% артады, ал 2024 жылы өсім 16% болған.
Уолл-стритте не дейді?
Көптеген инвесторлар Netflix акцияларының қымбаттығы оларды қорқытпайды, деп жазады Bloomberg. Мысалы, Mahoney Asset Management бас директоры Кен Махони Netflix акциялары үшін көп төлеуге тура келетінін мойындайды, бірақ компанияның нарықтағы жетекші позициясы бұған тұрарлық деп санайды. «Адамдар көбіне бағалауға тым қатты мән беріп, керемет компанияларды өткізіп алады. Ал мен Netflix ұсынатын нәрсеге көбірек төлеуде ешқандай мәселе көрмеймін», — деді Махони Bloomberg келтірген пікірінде. Оның айтуынша, Netflix бәрін дұрыс істеп жатыр, ал оның өсуі қар құрсағындай күшейіп келеді.
Уолл-стриттегі сарапшылардың көбі де Netflix акцияларына әлі де оң көзқараста. Олар компанияның контент күнтізбесі өте бай екенін атап өтуде: NFL матчтарын, бокс жекпе-жектерін көрсетуден бастап, «Өте оғаш істер» сериалының жаңа маусымына дейін бар. Маусымда Oppenheimer және басқа инвестбанк сарапшылары Netflix-тің стриминг нарығындағы бірегей позициясын атап өтіп, акциялардың мақсатты бағасын көтерді. 30 мамырда Evercore ISI сарапшысы да таргетті ұлғайтты, сол кезде Netflix акциялары тарихи максимумға жақын саудаланып жатқан еді. Ол өсу драйвері ретінде тікелей трансляция бағытының дамуын атады. Инвестбанктің сауалнамасы көрсеткендей, Netflix қолданушылардың қанағаттану деңгейі бойынша Amazon Prime Video мен Disney-дің Hulu қызметінен озық тұр.
Алайда күмәнданушылар да бар. Allspring Global Investments аға портфель менеджері Майкл Смиттің пікірінше, Netflix-тің негізгі көрсеткіштері мықты, бірақ бағалау базасы өзгеріп, мультипликаторлар осылай өсе береді деуге кепілдік жоқ. «Компанияның әлеуетіне сенемін: олар баға саясатын дұрыс жүргізіп, жарнама бағытында дамып, тікелей эфирлерге шығып жатыр. Бірақ қазіргі күтулер тым жоғары, сондықтан аздаған көңіл қалу да түзетуге әкелуі мүмкін», — дейді Смит.
Уолл-стрит сарапшыларының көбі — 52 сарапшының 36-сы Netflix қағаздарын сатып алуды ұсынады (Buy және Overweight рейтингтері). Тағы 15 сарапшы бейтарап ұстанымда (Hold), тек біреуі ғана сатуға кеңес береді. Ал Уолл-стриттің консенсус мақсатты бағасы 1208 долларды құрап отыр, бұл 1 шілдедегі жабылу бағасынан 6,6% төмен.
