Nextdoor әлеуметтік желісінің акциясы «мемдік» раллиге қосылды
Көршілерге арналған әлеуметтік желіні басқаратын Nextdoor компаниясының акциясы 11 желтоқсандағы таңғы сауданың алғашқы минуттарында 25%-дан астам шарықтап, алдыңғы күнгі раллиді жалғастырды. Бұл «мемоманияны» қайта жандандыруға себепкер болған EMJ Capital хедж-қоры компанияны жасанды интеллект саласындағы мүмкіндігін әлі толық ашпаған, «нарықтағы ең түсінілмеген платформалардың бірі» деп атағаннан кейін болды.
Егжей-тегжейлі
Nextdoor акциясы 11 желтоқсандағы таңғы сауданың алғашқы минуттарында 25%-дан астам шарықтап, $3,18-ға дейін көтерілді.
Осылайша котировка алдыңғы күнгі раллиді жалғастырды: 10 желтоқсанда компанияның котировкасы 26%-ға жуық өсіп, $2,53-ға дейін жетті. Бұл ақпан айының соңынан бергі ең жоғары жабылу бағасы болды.
Котировканың өсуіне Торонтодағы шағын хедж-қор EMJ Capital негізін қалаушы Эрик Джексон түрткі болды. Ол Nextdoor-ды жасанды интеллект бағытындағы мүмкіндігін әлі толық ашпаған, «нарықтағы ең түсінілмеген платформалардың бірі» деп атады, деп жазды Bloomberg. Nextdoor өзін 100 млн-нан астам пайдаланушысы бар әлеуметтік желі ретінде таныстырады. Онда жергілікті жаңалықтарды, көрші-қолаңның ұсыныстарын, хабарландыруларды және түрлі шаралар туралы ақпаратты табуға болады.
Джексонның айтуынша, Уолл-стриттегі трейдерлер компанияны әлі де перспективасы кішкентай жергілікті жарнама бизнесі ретінде бағалайды. Ал шын мәнінде Nextdoor жасанды интеллект дәуірінде аса қажет «идентификация деректерінің ең мықты жиынтығына» ие. Бұл — «identity graph» деп аталатын маркетингтік термин: қолданушы туралы әртүрлі ақпараттарды (құрылғылары, логиндері, e-mail, мінез-құлқы, өзара әрекеттесуі, қызығушылықтары) біртұтас байланысты модельге біріктіретін құрылымды дерекқор. Платформаның басты артықшылығы ретінде Джексон 100 млн-нан астам тексерілген үй шаруашылықтарын нақты деректермен және боттарсыз қамтуын атады.
Уолл-стритте бұл қағазға қатысты ең танымал рейтинг «ұстау» — 4 сарапшы. «Сатып алуға» — 1 ғана сарапшы кеңес берді, деп жазды MarketWatch. Ал орташа мақсатты баға — $2,65, бұл ағымдағы котировкадан төмен.
Эрик Джексон және оның EMJ Capital қоры несімен танымал?
Bloomberg Джексонды «мемоманияны» қайта жандандырған адам деп атайды. Ол АҚШ-та үйлерді сатып алу және сату платформасына ие Opendoor компаниясының акция раллиінің артында тұрған тұлға болды. Жыл басынан бері оның котировкасы 377,5% шарықтады, ал өсімнің басым бөлігі Джексон компания қағазы туралы белсенді айта бастаған маусымнан кейін болды.
Хедж-қор Better Home & Finance Holding — ипотекалық кредит беру компания акциясының қыркүйекте 176% серпілісіне де ықпал етті, деп жалғастырды Bloomberg. Бұл жағдай Джексонды YouTube пен Reddit-те Roaring Kitty атымен танылған Кит Гиллмен салыстыруға әкелді. Ол GameStop-тағы раллиді қоса алғанда, бірнеше «мемдік» раллидің басталуына себеп болған еді.
