Novo қарт америкалықтар үшін Ozempic бағасын 71%-ға төмендетпек
АҚШ үкіметі фармөндіруші Novo Nordisk-тің ең сұранысқа ие дәрілері — Ozempic пен Wegovy — бойынша Medicare қарттар бағдарламасы үшін 2027 жылдан бастап 71% жеңілдік алуға қол жеткізді. Бұл туралы Medicare және Medicaid қызметтері орталығы хабарлады. Сонымен қатар Pfizer-дің қатерлі ісікке қарсы Ibrance препаратының құны да 50%-ға арзандайды.
Егжей-тегжейлі
Үкімет Ozempic пен Wegovy-дің 30 күнге арналған дозасы үшін бұрынғы $959 орнына $274 төлейтін болады. Financial Times жазғандай, Novo Nordisk бұл шешім 2026 жылы жаһандық сатылым өсімін «төмен бір таңбалы деңгейге» (шамамен 1–3%) түсіретінін мәлімдеді. Компания Bloomberg-ке берген жауабында «инфляцияны шектеу туралы заңның (Inflation Reduction Act) науқастарға әсері жайлы қатты алаңдайтынын және бағаны мемлекеттік реттеуге қарсы екенін» атап өтті.
26 қарашадағы АҚШ премаркетінде Novo компаниясының депозитарлық қолхаты (ADR) 0,4%-ға арзандады, ал Копенгаген биржасында акциялар керісінше 1,2%-ға көтерілді. Бір күн бұрын АҚШ-тағы сауда 4,7% өсіммен аяқталған — оған қант диабетін емдеуге арналған жаңа препаратқа қатысты оптимизм әсер етті. Pfizer акциялары Нью-Йорктің таңғы сессиясында 0,2%-ға қымбаттады.
Novo үшін не өзгереді
Bloomberg-тің жазуынша бұл келісім — АҚШ-та денсаулық сақтау шығындарының өсуіне және ел ішінде өндірістің жеткіліксіздігіне байланысты Ақ үй жүргізіп отырған кең ауқымды келіссөздер жүйесінің бір бөлігі. Дональд Трамп әкімшілігі фармацевтикалық компанияларға қысым жасау үшін кедендік саясатты, реттеуші тетіктерді және құқықтық құралдарды белсенді қолданып келеді. Қарашада Novo Nordisk пен оның америкалық бәсекелесі Eli Lilly әкімшілікпен бағаларды төмендету жөнінде келісімге келген — оған Ozempic пен Wegovy де кіреді. Reuters мәліметінше, келесі келіссөздер кезеңі ақпанда басталып, тағы 15 рецептті және аурухана препаратын қамтымақ.
BMO-ның денсаулық сақтау саласы бойынша зерттеулер жетекшісі Эван Сайгерман FT-ке берген түсініктемесінде: Medicare-ге арналған бұл жеңілдіктер Уолл-стрит күткендей болды және бақылауда деп бағалады.
Оның айтуынша:
«Біз Novo мен Eli Lilly арасындағы алдыңғы келісімді семіздікке қарсы препараттар өндірушілері мен жалпы сектор үшін үлкен позитив деп санаймыз. Дәрілерге кең қолжетімділік көлемді күрт арттырып, бағаның төмендеуінен болатын шығындарды артығымен өтейді», — деді Сайгерман.
Medicare бұрын да фармкомпаниялардан қомақты жеңілдіктер мен қайтарымдар алатын, бірақ билік мұндай ақпаратты әдетте жарияламайтын. Bloomberg-тің мәліметінше жаңа бағалар Джо Байден әкімшілігі қабылдаған заңның нәтижесі ретінде 2027 жылы күшіне енеді.
