Nvidia Қытайға H200 ЖИ-чиптерін ақпанның ортасына дейін жеткізуді жоспарлап отыр
Nvidia ЖИ-чиптерін шығаратын компания қытайлық клиенттеріне өздерінің қуаты жағынан екінші орында тұрған процессорларын Ай күнтізбесі бойынша Жаңа жылға дейін (биыл 17 ақпан) Қытайға жеткізуді бастауды көздеп отырғанын хабарлаған. Бұл туралы Reuters-ке үш дереккөз айтқан.
Егжей-тегжейі
Агенттіктің екі дереккөзіне сүйенсек, алғашқы кезеңде Nvidia қоймадағы дайын қорды пайдаланбақ. Дереккөздердің айтуынша, жеткізу көлемі 5000-нан 10 000 модульге дейін болады. Бұл шамамен 40 000–80 000 H200 чипіне тең.
Үшінші дереккөздің айтуынша, Nvidia қытайлық серіктестеріне осы чиптердің өндіріс қуатын арттыру жоспары барын да жеткізген. Оның сөзінше, жаңа көлемге тапсырыс қабылдау 2026 жылдың екінші тоқсанында басталуы керек.
Сонымен қатар Қытай билігі әзірге H200 сатып алуға қатысты бірде-бір келісімді бекітпеген. Сондықтан мерзімдер саяси шешімдерге байланысты өзгеруі мүмкін екенін Reuters-тің үш дереккөзі де атап өткен. Nvidia да, Қытайдың Өнеркәсіп және ақпараттандыру министрлігі де агенттіктің пікір сұрауына жауап бермеген.
Дүйсенбі, 22 желтоқсанда сауда кезінде Nvidia акциялары 1,7% өсіп, $184,16 болды.
Контекст
Егер жеткізілім жүзеге асса, бұл H200-дің Қытайға алғашқы ресми жөнелтілімі болмақ. Бұған дейін АҚШ президенті Дональд Трамп желтоқсанда мұндай сатуға 25% экспорттық баж салығын төлеген жағдайда рұқсат берілетінін айтқан. Өткен аптада Reuters Трамп әкімшілігі Қытайға H200 жеткізуге экспорт лицензияларын қарастыра бастағанын хабарлаған. Бұл шешім Джо Байден әкімшілігінің саясатына қарама-қайшы: ол ұлттық қауіпсіздікке қатер бар деп, Қытайға озық ЖИ-чиптерін жеткізуге толық тыйым салған еді.
Nvidia акциялары 2025 жылы 36% қымбаттады. Талдаушылардың көбі сатып алуға кеңес береді: 54 Buy және тоғыз Overweight (“нарықтан жоғары”) рейтингі бар, ал бес Hold (“ұстау”) және бір Sell (“сату”) ғана. Орташа мақсатты баға $260,6, бұл соңғы жабылу бағасынан 44% жоғары өсімді білдіреді.
