Nvidia мен Microsoft 4 трлн долларға жетті. Келесі кім?
BestBrokers сарапшылары нарықтық құны 4 трлн долларға жетуі мүмкін жаңа үміткерлерді атады. Есеп бойынша, бұл межеге Meta жақындауы ықтимал. Сонымен қатар 1 трлн долларлық межеге де жаңа ойыншылар қосылып, бәсеке күшейіп келеді.
Егжей-тегжейі
Meta Platforms, яғни Instagram мен Facebook-тың иесі, «4 трлн клубының» келесі үміткері болуы мүмкін. BestBrokers жаңа талдауында компанияның қазіргі нарықтық құны шамамен 1,89 трлн доллар екенін, ал 2027 жылдың ақпанына қарай ол екі еседен астам өсіп, 4 трлн-ға жетуі ықтимал екенін жазды, деп хабарлайды GuruFocus.
Бұл болжам Nvidia мен Microsoft алғаш рет 4 трлн долларлық межеден өткен соң жарияланды. Бұл жетістік жасанды интеллектке деген қызығушылықтың технологиялық компаниялардың бағасына қаншалықты әсер еткенін көрсетті. Сарапшы Пол Хоффманның айтуынша, Meta-ның ЖИ құралдары мен виртуалды және толықтырылған шындыққа негізделген кеңістікті дамытуға жасаған ставкасы инвесторлардың сенімін қайта арттырды, ал жарнама бұрынғыдай тұрақты табыс көзі болып қала береді.
Тағы кімдер үміткер?
Жасанды интеллект пен дата-орталықтарға арналған чип өндіруші Broadcom да бәсекеде. BestBrokers болжамынша, компания капитализациясы сұраныстың жылдам өсуіне байланысты 2027 жылдың мамырында 4 трлн-ға жетуі мүмкін. Хоффманның айтуынша, Broadcom-ның ЖИ чиптері мен дата-орталық технологияларындағы рөлі оның серпінді өсуін қамтамасыз етіп отыр.
Басқа технологиялық алыптар да бұл межеге ұзақ мерзімде жете алады. Мысалы, Amazon (құны шамамен 2,43 трлн доллар) мен әлемдегі ең ірі жартылай өткізгіш өндіруші TSMC (1,24 трлн доллар) 2028 жылы 4 трлн-ға жетеді деп күтіледі. Google-дың бас компаниясы Alphabet пен iPhone өндірушісі Apple баяу өсіп келеді: BestBrokers дерегінше, Alphabet 2029 жылдың тамызында, ал Apple 2031 жылдың қаңтарында межені еңсереді. Айта кету керек, Apple тарихта бірінші болып 1 трлн долларлық капитализацияға жеткен, кейін 2 трлн және 3 трлн межелерінен де өткен.
1 трлн үшін жарыс
Жарыстың тағы бір бағыты — 1 трлн доллар. JPMorgan банкі, Walmart ритейлері және Oracle бағдарламалық жасақтама жеткізушісі бұл межеге таяп қалды және келесі жылы жетуі мүмкін, деп жазады SeekingAlpha.
Жылдам өсіп келе жатқан компаниялардың ішінде күтпеген үміткерлер де бар: видеостримингтік Netflix және әскери әрі азаматтық қолдануға арналған ЖИ әзірлеушісі Palantir. Бұрын Palantir үшін 1 трлн межесіне жету үш жарым жылды алуы мүмкін делінсе, соңғы бір жылдағы серпін бұл мерзімді бір жыл жеті айға дейін қысқартты.
Сарапшылардың айтуынша, 4 трлн долларлық жарыс — тек бедел үшін емес, капитал қай салаға құйылып жатқанын көрсететін маңызды белгі. Қазір көшбасшылар — жасанды интеллект, жартылай өткізгіштер және цифрлық платформалар.
«2025 жыл өткен сайын 4 трлн долларлық капитализация жарысы жай ғана сандық көрсеткіш емес, ол инновация, стратегия мен инвестор көңіл-күйінің тоғысқан жерін көрсетіп отыр. Meta мен Broadcom күтулерді қайта жазып жатыр, ал саладағылар келесі рекорд иесінің кім болатынын қызыға бақылауда», — деді Хоффман.
