Nvidia мен Microsoft капитализациясы биыл жазда $4 трлн-ға жетеді — Wedbush
Nvidia мен Microsoft акциялары осы жазда $4 трлн капитализациясы бар компаниялар клубына қосылады — бұған жасанды интеллектке деген қызығушылықтың қарқынды өсуі себеп, деп болжайды Wedbush Securities. Бұл қағаздар жыл басындағы әлсіз кезеңнен кейін ағымдағы тоқсанда әсерлі түрде қайта өсе бастады, деп жазды инвестбанк сарапшысы Дэн Айвз. Оның технология секторы бойынша ұсыныстары оны жеке инвесторлар арасында кеңінен танымал етті.
Егжей-тегжейлі
Wedbush Securities-тің технологиялық зерттеулер бөлімінің жетекшісі Дэн Айвзтің пікірінше, инвесторлар Қытайға ЖИ-чиптерін жеткізуге қойылуы мүмкін шектеулер мен жаһандық баж салығы қаупін екінші орынға ысырып қойғандықтан, Nvidia мен Microsoft-тың нарықтық капитализациясы осы жазда $4 трлн-ға жетеді, деп жазады CNBC. «Алдағы 18 айда назар $5 трлн деңгейіне ауысады, өйткені технология секторының бұқалық нарығы енді ғана басталып жатыр, оның басты қозғаушы күші ЖИ-революция», — деп жазды сарапшы.
Айвз жасанды интеллекттің дамуына қатысты оптимистік көзқарасымен танымал, өткен аптада ол бұл саланы «Тақтар ойыны стиліндегі қару-жарақ жарысы» деп атаған. Жаңа жазбасында сарапшы ЖИ төңірегіндегі ажиотаж бен оған арналған инфрақұрылымға рекордтық инвестициялар техсектордың басты өсу драйверіне айналғанын еске салды. Nvidia мен Microsoft «ЖИ-революциясының басты ойыншылары» болып тұр.
«Дәл солар Уолл-стритте 25 жылдық жұмыс тәжірибемізде көрген ең ірі технологиялық трендтің өзегінде тұр», — деп жазды Айвз.
Акциялардың жай-күйі
Ағымдағы Nvidia-ның капитализациясы шамамен $3,83 трлн, ал Microsoft-тікі — $3,69 трлн.
Өткен аптада чипмейкер Nvidia-ның қағаздары бес сауда күн қатарынан өсіп, жаңа тарихи максимумға — $157,75-ке жетті. 30 маусым, дүйсенбі күні олар тағы бір рекорд орнатып, $157,99-ға нығайды. Бір ай ішінде Nvidia акциялары шамамен 17%, ал тоқсан басынан бері 44,5% қымбаттады.
Microsoft котировкалары да соңғы бес сессияда жоғарылады. Бір айда олар шамамен 8%, ал тоқсан басынан бері 32,5% өсті. Дүйсенбіде компания қағаздары $497,4-ке дейін нығайды.
ЖИ-циклінің бенефициарлары
Айвздің бағалауынша, Nvidia-ға салынған әрбір $1 технология секторының басқа бөліктеріне $8–10 көлемінде мультипликативті әсер береді. Бұл әсер гиперскейлерлерге — яғни үлкен көлемдегі деректерді өңдейтін бұлттық инфрақұрылымды басқаратын ірі компанияларға, сондай-ақ киберқауіпсіздік, бағдарламалық қамтамасыз ету, чиптер, интернет, автономды технологиялар мен робототехника салаларындағы ойыншыларға таралады.
Wedbush сарапшысы бенефициар компаниялардың ішінде Microsoft, Google және Amazon-ды атап өтті — олардың бұлттық бөлімшелері (Azure, Google Cloud және Amazon Web Services) қарқынды дамып келеді. Бұл «мерекеге» Advanced Micro Devices (AMD) те қатысып жатыр, деді Айвз.
«ЖИ-циклінің тұтынушы интернетіне әсері орасан зор болады, және ол AWS пен Google Cloud бұлттық платформаларынан басталады. Олар ЖИ-чиптерін сатып алып, соларға негізделген ЖИ-сервистер құрып, оларды өз клиенттеріне ұсынады», — деп түсіндірді сарапшы. Оның айтуынша, Microsoft, Amazon және Google қазірдің өзінде ЖИ-ды қолданудың басым бағдарламалық сценарийлерін анықтап, оларды әртүрлі салаларда жылдам дамытып жатыр.
«Бастысы — дәл осы сценарийлерді қолданудың өте жылдам өсімі бағдарламалық қамтамасыз ету мен чиптерге негізделген технологиялық трансформацияны алға жылжытып жатыр. Сондықтан біз технологиялар бойынша бұқалық болжамымызды сақтап отырмыз», — деп қорытындылады Айвз.
