Nvidia табысы, АҚШ-тағы инфляция: инвесторға осы аптада не білу қажет
АҚШ Федералдық резерв жүйесінің төрағасы Джером Пауэлл Джексон-Хоулдегі сөзінде қыркүйекте-ақ мөлшерлемені төмендету мүмкіндігіне Уолл-стрит сенімін арттырғаннан кейін, осы аптада инвесторлардың назарында АҚШ реттеушісі үшін негізгі көрсеткіш саналатын инфляция болады, деп жазады Barron’s.
Корпоративтік есеп беру маусымы да жалғасуда. Жасанды интеллектке арналған чиптер нарығының көшбасшысы әрі әлемдегі ең қымбат жария компания Nvidia-ның тоқсандық есебі АҚШ акцияларын рекордтық максимумға жеткізген жазғы раллидің беріктігін сынайды, деп хабарлайды Yahoo Finance.
Дүйсенбі, 25 тамыз
АҚШ Халық санағы бюросы шілде айындағы жаңа тұрғын үйлерге сұраныс бойынша статистиканы жариялайды. FactSet консенсус-болжамына сәйкес маусымдағы 627 мыңнан кейін жеке жаңа үйлердің сатылымы маусымдық түзетумен 650 мыңға дейін өскен.
Тоқсандық есебін PDD Holdings ұсынады.
Сейсенбі, 26 тамыз
АҚШ Халық санағы бюросы шілде айындағы ұзақмерзімді тауарларға тапсырыс бойынша есебін жариялайды. Уолл-стриттің болжамынша жаңа тапсырыстар көлемі алдыңғы аймен салыстырғанда 3,5%-ға қысқарады. Маусымда ұзақ мерзімді тауарларға тапсырыс 9,4%-ға азайған болатын.
Conference Board тамыздағы тұтынушылар сенімінің индексін ұсынады. Экономистер орташа есеппен шілдедегі 97,2 тармақпен салыстырғанда 97 деңгейін күтуде.
Тоқсандық нәтижелерін Box, Okta және PVH жариялайды.
Сәрсенбі, 27 тамыз
Қытайда шілде айына қатысты өнеркәсіптік кәсіпорындардың пайдасы шығады. ING сарапшылары қытайлық компаниялардың табысы кемінде 2025 жылдың соңына дейін қысым астында қалады деп болжайды. Олардың пікірінше биліктің дефляцияны күшейтіп отырған баға соғыстарын тежеу шаралары шығындар мен артық өндірістік қуаттарды қысқартуда негізгі рөл атқарады, бірақ бұл процесс «өте баяу» жүреді, деп жазады The Wall Street Journal.
Nvidia «Ғажайып жетілік» технологиялық алпауыттарының соңғысы ретінде тоқсандық есебін ұсынады. FactSet сауалнамасына қатысқан талдаушылар сатылымның өткен тоқсанда шамамен 53%-ға өсіп, $45,81 млрд-қа жетуін және түзетілген акцияға шаққандағы табыстың өткен жылғы $0,68-ден $1-ға көтерілуін күтуде, деп жазады Barron’s.
Сондай-ақ тоқсандық табыстарын BYD, Chewy, CrowdStrike, Five Below, HP, Kohl’s, NetApp және Snowflake жариялайды.
Бейсенбі, 28 тамыз
АҚШ-тың Экономикалық талдау бюросы (BEA) екінші тоқсанға қатысты ЖІӨ-нің екінші алдын ала бағасын ұсынады. Алғашқы бағалауға сәйкес әлемнің ең ірі экономикасы жылдық есеппен 3% қарқынмен өскен.
ЕО тамыздағы тұтынушылық және іскерлік сенім деректерін жариялайды.
Тоқсандық есептерін Best Buy, Brunello Cucinelli, Dell, Dollar General, Dick's Sporting Goods, Gap, Marvell, Pernod Ricard, Petco, SentinelOne және Ulta ұсынады.
Жұма, 29 тамыз
BEA шілде айына қатысты жеке тұтыну шығындары бағалары индексін (PCE) жариялайды. FactSet консенсус-болжамы бойынша PCE маусыммен салыстырғанда 0,2%-ға өсті. Core PCE (тамақ пен энергия бағаларын есептемегенде) алдыңғы айға қарағанда 0,3%-ға, ал жылдық көрсеткіште 2,9%-ға өскен болуы ықтимал.
Өткен тоқсанға қатысты табыстарын Alibaba ұсынады.
